މީޑިޔާ ބިލު ބޭރުނުކުރާނެކަމުގެ ވިސްނުން ހާމަވުމުން، އޭޖީގެ ޕްރެސްއިން ނޫސްވެރިންތަކެއް ނުކުމެއްޖެ

މީޑިއާ ރެގިއުލޭޓު ކުރުމުގެ ނަމުގައި ރައްޔިތުންގެ މަޖިލީހަށް ހުށަހަޅާފައިވާ ބިލު ބޭރުކުރުމުގެ ވިސްނުމެއް ނެތް ކަމަށް ބަންޑާރަ ނައިބު އަހުމަދު އުޝާމް ވިދާޅުވުމުން، އެކަމާ އިހުތިޖާޖު ކުރުމުގެ ގޮތުން ގިނަ ނޫސްވެރިންގެ އެ ނޫސްވެރިންގެ ބައްދަލުވުން ދޫކޮށް ނުކުމެއްޖެ އެވެ.

ގާނޫނުއަސާސީގެ ދަށުން ލިބިދޭ ހިޔާލުފާޅުކުރުމުގެ މިނިވަންކަން ދަމަހައްޓައި އާލާކޮށް، ނޫސްވެރިކަމުގެ މިނިވަންކަން ކުރިއަރުވައި ތަރައްގީކޮށް ދެމެހެއްޓުމަށް ކަމަށް ބުނެ، ޕީއެންސީ މެންބަރުންގެ ތާއީދާއެކު އެ ބިލު މަޖިލީހަށް ހުށަހެޅުއްވީ ތުޅާދޫ ދާއިރާގެ މިނިވަން މެމްބަރު އަބްދުލްހަންނާނު އަބޫބަކުރެވެ.

ދައުރުން ބޭރުން ޖަލްސާއެއް ބާއްވައި އިއްޔެ ވަނީ އެ ބިލު މަޖިލީހަށް ބަލައިގެންފަ އެވެ. އަދި، ދިރާސާ ކުރުމަށް މިނިވަން މުއައްސަސާތަކުގެ ކޮމެޓީއަށް ވަނީ ފޮނުވާފަ އެވެ.

މި ބިލާމެދު ނޫސްވެރިން ކަންބޮޑުވުންފާޅުކޮށް، އިހުތިޖާޖު ކުރަން ފެށުމުން އުޝާމް މިއަދު ވަނީ ނޫސްވެރިންގެ ބައްދަލުވުމެއް ބާއްވާފަ އެވެ.

މި ބިލާމެދު ނޫސްވެރިން ކަންބޮޑުވުންފާޅުކޮށް، އިހުތިޖާޖު ކުރަން ފެށުމުން އުޝާމް މިއަދު ވަނީ ނޫސްވެރިންގެ ބައްދަލުވުމެއް ބާއްވާފަ އެވެ. މި ބައްދަލުވުމުގައި އޭނާ ވިދާޅުވީ ބިލުގެ އެންމެ ބޮޑު އެއް ބޭނުމަކީ މޯލްޑިވްސް މީޑިއާ ކައުންސިލާއި ބްރޯޑްކާސްޓިން ކޮމިޝަން އެއްކޮށްލުން ކަމަށާއި ކުރީގެ ރައްޔިތުންގެ މަޖިލީހުން ވެސް އެފަދަ މަސައްކަތްތަކެއް ކޮށްފައިވާ ކަމަށެވެ.

އެގޮތުން އޭރު ބޭރުގެ އެކި ފަރާތްތަކާއިއެކު މަސައްކަތްތަކެއްކޮށް، ދިރާސާތަކެއް ކޮށްފައިވާ ކަމަށާއި، އޭރު ކޮށްފައި ހުރި މަސައްކަތްތަކަށް ބަލާއިރު، މިހާރު ހުށަހަޅާފައިވާ ބިލު އަނބުރާ ނުނަގައި، އިސްލާހު ކުރެވޭނެ ކަމަށް ފެނިވަޑައިގަންނަވާ ކަމަށް އުޝާމް ވިދާޅުވި އެވެ.

"އަޅުގަނޑު ގަބޫލެއް ނުކުރަން ބިލު އަނބުރާ ނަގަން ޖެހޭނެ ކަމަކަށް، އެއީ މިހާރު ކުރެވިފަ ހުރި ދިރާސާތަކުގެ އަލީގައި،" އުޝާމް ވިދާޅުވި އެވެ.

ސަބަބެއް ކަމަށް އުޝާމް ފާހަގަ ކުރެއްވީ 2022 ވަނަ އަހަރު މީޑިއާ ކައުންސިލުން މީޑިއާ ރެގިއުލޭޓް ކުރުމަށް ބަންޑާރަ ނައިބް އޮފީހަށް ހުށަހަޅާފައިވާ ބިލެއްގެ ޑްރާފްޓެވެ. 

މިހާރު އޮތް ބިލާ މެދު ނޫސްވެރިންގެ ކަންބޮޑުވުންތައް އަޑުނާހާނެތޯ ތަކުރާރުކޮށް ސުވާލުކުރުމުން ވެސް އުޝާމް ދެއްވީ އެއް ޖަވާބެކެވެ. ބިލާ މެދު ކަންބޮޑުވުމެއް އޮތް ނަމަ، ލިޔުމުން ހުށަހަޅައިގެން ކޮމިޓީ މަރުހަލާގައި އެ ބިލު އިސްލާހުކުރެވޭނެކަމަށް އޭނާ ވިދާޅުވި އެވެ.

އެ ބިލު ބޭރުނުކުރާނެކަމުގެ ވިސްނުން ސާފުވުމުން، ކުރާނެ އިތުރު ސުވާލެއް ނެތް ކަމަށް ބުނެ، އެތަނުގައި ތިބި ގިނަ ނޫސްވެރިން ވަނީ ނުކުމެފަ އެވެ. 

އެ ބިލަކީ މިނިވަން ނޫސްވެރިކަމަށް ވަރަށް ބޮޑު ހުރަސްތަކެއް ހުރި ބިލަކަށްވާތީ، ނޫސްވެރިން ދަނީ އިހުތިޖާޖު ކުރަމުންނެވެ. އެހެންވެ، ރައީސް ޑރ. މުހައްމަދު މުއިއްޒު މިއަދު ވަނީ ނޫސްވެރިންނާ ބައްދަލުކުރައްވާފަ އެވެ. މި ބައްދަލުވުމުގައި ބައެއް ނޫސްތަކުގެ އެޑިޓަރުންނާއި މީޑިއާ ކައުންސިލްގެ މެންބަރުން ބައިވެރިވެފައިވެ އެވެ.

ނޫސްވެރިންގެ ޑިމާންޑަކީ މަޖިލީހަށް ހުށަހަޅާފައިވާ ބިލު ބޭރުކޮށްލުމަށްފަހު، ނޫސްވެރިންނަށް ފަހިވާ ގޮތަށް އާ ބިލެއް ފަރުމާ ކުރުމެވެ. މިއަދުގެ ބައްދަލުވުމުގައި، އެ ބިލު އިސްލާހު ކުރުމަށްވުރެ އާ ބިލެއް ފަރުމާ ކުރުން މާ ރަގަޅު ވާނެ ކަމަށް ނޫސްވެރިން ވަނީ ރައީސަށް ދަންނަވާފަ އެވެ.

ރައީސް ވިދާޅުވެފައި ވަނީ އެކަންކަމާމެދު ވިސްނަވާނެ ކަމަށެވެ. އަދި، ބަންޑާރަ ނައިބްގެ ލަފާ ހޯއްދަވައިގެން އެކަން ކުރިއަށް ގެންދަވާނެ ކަމަށް ވެސް ރައީސް އޭރު ވިދާޅުވި އެވެ.