"މީޑިއާ ކޮންޓްރޯލް ބިލު އަނބުރާ ނަގަން ޖެހޭ ކަމަށް ގަބޫލެއް ނުކުރަން"

މީޑިއާ ރެގިއުލޭޓު ކުރުމުގެ ނަމުގައި ރައްޔިތުންގެ މަޖިލީހަށް ހުށަހަޅާފައިވާ ބިލު އަނބުރާ ނަގަން ޖެހޭ ކަމަށް ގަބޫލު ނުކުރައްވާ ކަމަށް އެޓާނީ ޖެނެރަލް އަހުމަދު އުޝާމް ވިދާޅުވެއްޖެ އެވެ. 

ގާނޫނުއަސާސީގެ ދަށުން ލިބިދޭ ހިޔާލުފާޅުކުރުމުގެ މިނިވަންކަން ދަމަހައްޓައި އާލާކޮށް، ނޫސްވެރިކަމުގެ މިނިވަންކަން ކުރިއަރުވައި ތަރައްގީކޮށް ދެމެހެއްޓުމަށް ކަމަށް ބުނެ، ޕީއެންސީ މެންބަރުންގެ ތާއީދާއެކު އެ ބިލު މަޖިލީހަށް ހުށަހެޅުއްވީ ތުޅާދޫ ދާއިރާގެ މިނިވަން މެމްބަރު އަބްދުލްހަންނާނު އަބޫބަކުރެވެ.

ދައުރުން ބޭރުން ޖަލްސާއެއް ބާއްވައި އިއްޔެ ވަނީ އެ ބިލު މަޖިލީހަށް ބަލައިގެންފަ އެވެ. އަދި، ދިރާސާ ކުރުމަށް މިނިވަން މުއައްސަސާތަކުގެ ކޮމެޓީއަށް ވަނީ ފޮނުވާފަ އެވެ.

މި ބިލާމެދު ނޫސްވެރިން ކަންބޮޑުވުންފާޅުކޮށް، އިހުތިޖާޖު ކުރަން ފެށުމުން އުޝާމް މިއަދު ވަނީ ނޫސްވެރިންގެ ބައްދަލުވުމެއް ބާއްވާފަ އެވެ. މި ބައްދަލުވުމުގައި އޭނާ ވިދާޅުވީ ބިލުގެ އެންމެ ބޮޑު އެއް ބޭނުމަކީ މޯލްޑިވްސް މީޑިއާ ކައުންސިލާއި ބްރޯޑްކާސްޓިން ކޮމިޝަން އެއްކޮށްލުން ކަމަށާއި ކުރީގެ ރައްޔިތުންގެ މަޖިލީހުން ވެސް އެފަދަ މަސައްކަތްތަކެއް ކޮށްފައިވާ ކަމަށެވެ.

އެގޮތުން އޭރު ބޭރުގެ އެކި ފަރާތްތަކާއިއެކު މަސައްކަތްތަކެއްކޮށް، ދިރާސާތަކެއް ކޮށްފައިވާ ކަމަށާއި، އޭރު ކޮށްފައި ހުރި މަސައްކަތްތަކަށް ބަލާއިރު، މިހާރު ހުށަހަޅާފައިވާ ބިލު އަނބުރާ ނުނަގައި، އިސްލާހު ކުރެވޭނެ ކަމަށް ފެނިވަޑައިގަންނަވާ ކަމަށް އުޝާމް ވިދާޅުވި އެވެ. 

"އަޅުގަނޑު ގަބޫލެއް ނުކުރަން ބިލު އަނބުރާ ނަގަން ޖެހޭނެ ކަމަކަށް، އެއީ މިހާރު ކުރެވިފަ ހުރި ދިރާސާތަކުގެ އަލީގައި،" އުޝާމް ވިދާޅުވި އެވެ.

ސަބަބެއް ކަމަށް އުޝާމް ފާހަގަ ކުރެއްވީ 2022 ވަނަ އަހަރު މީޑިއާ ކައުންސިލުން މީޑިއާ ރެގިއުލޭޓް ކުރުމަށް ބަންޑާރަ ނައިބް އޮފީހަށް ހުށަހަޅާފައިވާ ބިލެއްގެ ޑްރާފްޓެވެ. 

"އެ ބިލަށް ބަލާލާއިރު މައިގަނޑު ގޮތެއްގައި ތިބޭފުޅުންގެ [ނޫސްވެރިންގެ] ކަންބޮޑުވުމަކީ، މީޑިއާ ކައުންސިލުން ބަންޑާރަ ނައިބްގެ އޮފީހަށް ހުށަހަޅާފަ އޮތް ބިލާ، މިހާރު ހުށަހަޅާފަ އޮތް ބިލާ މާބޮޑެތި ތަފާތުތަކެއް ނެތް،" އުޝާމް ވިދާޅުވި އެވެ.

އުޝާމް ވިދާޅުވީ މިހާރު ހުށަހަޅާފައި އޮތް ބިލާ ގުޅިގެން މީޑިއާގެ އެންމެ ބޮޑު ކަންބޮޑުވުމަކީ ރައީސް އައްޔަނުކުރައްވާ މެންބަރުންތަކެއް، ބްރޯޑްކޮމް އާއި މީޑިއާ ކައުންސިލް އެއްކޮށްލުމަށްފަހު އުފައްދާ ކޮމިޝަންގައި ތިބުން ކަމަށެވެ. ނަމަވެސް މީޑިއާ ކައުންސިލްގެ ޑްރާފްޓް ބިލުގައި، ކޮމިޝަނުގައި ހަތް މެންބަރުން ތިބިއިރު، ދެ މެންބަރުންނަކީ ރައީސް އައްޔަނު ކުރައްވާ ދެ މެންބަރުން ކަމަށް ބަޔާންކޮށްފައިވާ ކަމަށް އޭނާ ވިދާޅުވި އެވެ.

"އެހެންވީމަ ތިބޭފުޅުން، މީޑިއާގެ ފަރާތުން މީޑިއާ ކައުންސިލުން ހުށަހަޅާފަ އޮތް ބިލުގަ ރައީސުލްޖުމްހޫރިއްޔާ ބޭނުންފުޅުވާ ބޭފުޅުންގެ ނަންތައް ކޮމިޝަނަށް ހުށަހެޅޭނެ ކަމަށް ބަޔާންކޮށްފަ އޮތްއިރު، އެއީ މައްސަލައަކަށް ނުވެފަ، މިހާރު ހުށަހަޅާފަ އޮތް ބިލުގައި އެއަށްވުރެ އިތުރު ލޭޔާއެއް ލުމަށްފަހު މެންބަރުން ހުށަހަޅާފައި އޮތް އޮތުން އެއީ މައްސަލައަކަށް ވާންޖެހޭ ސަބަބެއް އަޅުގަނޑަކަށް އެއްގޮތަކަށް ސާފެއް ނުވޭ،" އުޝާމް ވިދާޅުވި އެވެ.

އޭގެ އިތުރުން، މީޑިއާތަކާއި ނޫސްވެރިން ޖޫރިމަނާ ކުރެވޭނެ އަދަދުގެ ގޮތުގައި، މީޑިއާ ކައުންސިލުން ހުށަހެޅި ބިލުގައި މާ ބޮޑެތި އަދަދުތައް ހިމަނާފައިވާ ކަމަށް ވެސް އުޝާމް ވިދާޅުވި އެވެ. އަދި އެ ބިލު އޮތީ ޖިނާއީ ފިޔަވަޅު ވެސް އެޅޭ ގޮތަށްކަން އޭނާ ފާހަގަކުރެއްވި އެވެ.

"އަޅުގަނޑުގެ ކަންބޮޑުވުމަކީ މިހާތަނަށް މީޑިއާ ކައުންސިލުން ކޮށްފަ ހުރި މަސައްކަތްތަކުގެ އަލީގައި، މީޑިއާ ކައުންސިލުން ހުށަހަޅާފަ ހުރި ބިލްގައި ވަކި ނެތް އެކްސްޓްރީމް ކޮން ކަމެއްބާއޭ މިހާރު މަޖިލީހަށް ހުށަހެޅުފަ މިއޮތީ؟ މިހާރު ތިބޭފުޅުންގެ ފަރާތުން މީޑިއާ ކައުންސިލަށް ހުށަހެޅިފަ މިއޮތް ބިލުގެ މައްސަލަ ބިނާކޮށް އޭގަ އެހުރި ބާރުތަކަށާ އޭގަ އެހުރި ކޮމިޝަނަށް ލިބިފަ ހުރި ބާރުތަކަށާ ކަންތައްތަކަށް ބިނާކޮށް މިހާރު ހުށަހަޅާފަ އޮތް ބިލަށް އިސްލާހު ނުގެނެންވީ ސަބަބެއް އޮތްކަމަކަށް އަޅުގަނޑަކަށް ގަބޫލެއް ނުކުރެވޭ،" އުޝާމް ވިދާޅުވި އެވެ.

އޭނާ ވަނީ، މިހާރު މަޖިލީހަށް ހުށަހަޅާފައި އޮތް ބިލާމެދު އޮތް ކަންބޮޑުވުންތައް މަޖިލީހަށާއި އެ އޮފީހަށް ހުށަހެޅުއްވުމަށް ވެސް އެދިވަޑައިގެންފަ އެވެ. މިހާތަނަށް ނޫސްވެރިންގެ ކަންބޮޑުވުންތައް ހިއްސާކޮށްފައިނުވާކަން ވެސް ފާހަގަކުރެއްވި އެވެ.