ރައީސް ވިދާޅުވީ މީޑިއާ ކޮންޓްރޯލް ކުރައްވަން ނޫޅުއްވާ ކަމަށް

މީޑިއާ ރެގިއުލޭޓު ކުރުމުގެ ނަމުގައި ރައްޔިތުންގެ މަޖިލީހަށް ހުށަހަޅާފައިވާ ބިލާ ގުޅޭ ގޮތުން ނޫސްވެރިންގެ ހުރި ކަންބޮޑުވުންތައް އެއްސެވުމަށްފަހު، އެކަންކަމާ ގުޅިގެން ވިސްނަވާނެ ކަމަށް ރައީސް ވިދާޅުވެއްޖެ އެވެ.

ގާނޫނުއަސާސީގެ ދަށުން ލިބިދޭ ހިޔާލުފާޅުކުރުމުގެ މިނިވަންކަން ދަމަހައްޓައި އާލާކޮށް، ނޫސްވެރިކަމުގެ މިނިވަންކަން ކުރިއަރުވައި ތަރައްގީކޮށް ދެމެހެއްޓުމަށް ކަމަށް ބުނެ، ޕީއެންސީ މެންބަރުންގެ ތާއީދާއެކު އެ ބިލު މަޖިލީހަށް ހުށަހެޅުއްވީ ތުޅާދޫ ދާއިރާގެ މިނިވަން މެމްބަރު އަބްދުލްހަންނާނު އަބޫބަކުރެވެ.

ދައުރުން ބޭރުން ޖަލްސާއެއް ބާއްވައި އިއްޔެ ވަނީ އެ ބިލު މަޖިލީހަށް ބަލައިގެންފަ އެވެ. އަދި، ދިރާސާ ކުރުމަށް މިނިވަން މުއައްސަސާތަކުގެ ކޮމެޓީއަށް ވަނީ ފޮނުވާފަ އެވެ.

އެ ބިލަކީ މިނިވަން ނޫސްވެރިކަމަށް ވަރަށް ބޮޑު ހުރަސްތަކެއް ހުރި ބިލަކަށްވާތީ، ނޫސްވެރިން ދަނީ އިހުތިޖާޖު ކުރަމުންނެވެ. އެހެންވެ، ރައީސް މިއަދު ވަނީ ނޫސްވެރިންނާ ބައްދަލުކުރައްވާފަ އެވެ. މި ބައްދަލުވުމުގައި ބައެއް ނޫސްތަކުގެ އެޑިޓަރުންނާއި މީޑިއާ ކައުންސިލްގެ މެންބަރުން ބައިވެރިވެފައިވެ އެވެ.

ނޫސްވެރިންގެ ޑިމާންޑަކީ މަޖިލީހަށް ހުށަހަޅާފައިވާ ބިލު ބޭރުކޮށްލުމަށްފަހު، ނޫސްވެރިންނަށް ފަހިވާ ގޮތަށް އާ ބިލެއް ފަރުމާ ކުރުމެވެ. މިއަދުގެ ބައްދަލުވުމުގައި، އެ ބިލު އިސްލާހު ކުރުމަށްވުރެ އާ ބިލެއް ފަރުމާ ކުރުން މާ ރަގަޅު ވާނެ ކަމަށް ނޫސްވެރިން ވަނީ ރައީސަށް ދަންނަވާފަ އެވެ.

ރައީސް ވިދާޅުވެފައި ވަނީ އެކަންކަމާމެދު ވިސްނަވާނެ ކަމަށެވެ. އަދި، ބަންޑާރަ ނައިބްގެ ލަފާ ހޯއްދަވައިގެން އެކަން ކުރިއަށް ގެންދަވާނެ ކަމަށް ވެސް ވިދާޅުވި އެވެ.

އިތުރަށް ރައީސް ވިދާޅުވެފައި ވަނީ މީޑިއާ ކޮންޓްރޯލް ކުރައްވަން ސަރުކާރުން ބޭނުންނުވާ ކަމަށާއި، މިއީ 100 ޕަސެންޓް މީޑިއާ ޕްރޯ ސަރުކާރެއް ކަމަށެވެ. އަދި ސަރުކާރުގެ ފަރާތުން މީޑިއާއަށް އަބަދުވެސް އެއްބާރުލުން ލިބޭނެކަމަށާއި މީޑިއާއަށް ފަހި މާހައުލެއް ތަނަވަސްކުރުމަށް މިހާރުވެސް ގިނަ މަސައްކަތްތަކެއް ކުރަމުންދާ ކަމަށް ވެސް ވިދާޅުވި އެވެ.

އެ ބިލު ދިރާސާ ކުރުމަށް މިއަދު ބޭއްވި މަޖިލީހުގެ މިނިވަން މުއައްސަސާތަކުގެ ކޮމެޓީން ނިންމާފައި ވަނީ ދެ ހަފްތާ ތެރޭގައި ބިލުގެ މަސައްކަތް ނިންމުމަށެވެ. މިހާރު ވަނީ ބިލަށް އާންމުންގެ ހިޔާލަށްވެސް ހުޅުވާލައިފަ އެވެ.