އަބްދުއްރަހްމާން މަރާލި މައްސަލައިގައި ހައްޔަރު ކުރި އާޝިދުގެ ބަންދަށް އިތުރު 30 ދުވަސަ

އއ. މާޅޮހުގައި މިދިޔަ ޖުލައި މަހުގެ 13 ވަނަ ދުވަހުގެ ރޭ ދަންވަރު ބޮޑެތި ޒަހަމްތަކެއް ލިބުމުގެ ސަބަބުން އުމުރުން 65 އަހަރުގެ އެ ރަށު، އޯކިޑްމާގޭ އަބްދުލްރަހްމާން އާދަމް މަރުވި މައްސަލައިގައި ހައްޔަރުކުރި އެރަށު، ފިޔަ، އަހުމަދު އާޝިދު، 27އ، ގެ ބަންދު މުއްދަތު އިތުރު 30 ދުވަހަށް އިތުރުކޮށްފި އެވެ.

އަބްދުއްރަހުމާން މަރާލި މައްސަލައިގެ ތުހުމަތަށް މިމަހުގެ 21 ވަނަ ދުވަހު ހައްޔަރުކޮށްފައި ވަނީ، އާޝިދުގެ އިތުރުން މާޅޮސް، ލިލީފެހި، މުހައްމަދު ވިޝާމް، 22އ، އާއި އެރަށު ފިނިވާގެ، އަހުމަދު ފާރިސް، 27އ، އެވެ.

ވިޝާމް އާއި ފާރިސް ވަނީ މީގެ ކުރިން ޝަރީއަތް ނިމެންދެން ބަންދުކޮށްފަ އެވެ. އާޝިދުގެ ބަންދަށް އެންމެ ފުރަތަމަ ކޯޓުން ދިނީ ފަސް ދުވަހެވެ. އެ މުއްދަތު ހަމަވުމުން، ބަންދު މުއްދަތު އިތުރު ކުރަން މިދިޔަ އަންގާރަ ދުވަހު ކޯޓަށް ހާޒިރުކުރުމުން، 30 ދުވަހުގެ މުއްދަތެއް ވަނީ ޖަހާފަ އެވެ.

އެނގިފައިވާ ގޮތުގައި، ވަރަށް އެކުގައި އުޅޭ މި ތިން މީހުންނަށް ފުލުހުންގެ ތަހުގީގު އެނބުރުނީ، އަބްދުއްރަހުމާން މަރައިލިކަން އާންމުންނަށް އެނގުމުގެ މާކުރިން، އޭނާގެ ދަރިއަކަށް ގުޅައި، ކަމެއް ވެގެން އުޅޭތޯ ސާފުކުރަން އުޅުނުކަން ހާމަވުމުންނެވެ.

އަބްދުއްރަހުމާނަށް ހަމަލާދިން ސީދާ ސަބަބެއް އަދި ރަސްމީކޮށް ހާމަކޮށްފައިނުވިޔަސް، މި ހަމަލާގެ ފަހަތުގައި އަބްދުއްރަހުމާނު ސިހުރު ހަދާކަމަށް ކުރެވޭ ތުހުމަތުތަކާ ގުޅުމެއްވާ ކަމަށްވެ އެވެ. ނަމަވެސް، އަބްދުއްރަހުމާނު ސިހުރު ހަދާކަމުގެ ތުހުމަތުތައް އޭނާގެ އާއިލާއިން ވަނީ ތަކުރާރުކޮށް ދޮގުކޮށްފަ އެވެ.

އަބްދުލްރަހްމާނަށް ވަނީ ނިދާފައި އޮއްވާ ބޮޑެތި ޒަހަމްތަކެއް ދީފަ އެވެ. އޭނާގެ ބޮލުގައި މަރުތޭލު ޒާތުގެ އެއްޗަކުން ޖަހައި ބޯ ވަނީ ޗިސްކޮށްލައިފަ އެވެ. އޭނާ މަރުވެފައި ވަނީ ފަރުވާ ދިނުމަށް އެރަށު ސިއްހީ މަރުކަޒަށް ގެންގޮސްފައި ވަނިކޮށް އެރޭ ދަންވަރުގެ ވަގުތެއްގަ އެވެ.

އޭނާ މަރުވި ސީދާ ސަބަބު ދެނެގަތުމަށް އިންޑިއާގެ ތިރުވަނަންތަޕޫރަމްއަށް ގެންގޮސް ވަނީ އޮޓޮޕްސީ ހަދައިފަ އެވެ. ފުލުހުން މިއަދު ބުނީ އަބްދުއްރަހްމާން މަރުވީ ބޮލަށް ލިބުނު އަނިޔާގެ ސަބަބުން ކަމަށް އޮޓޮޕްސީ ރިޕޯޓުން ހާމަވާ ކަމަށެވެ.

އޮޓޮޕްސީއަށް ފަހު އޭނާގެ ހަށިގަނޑު ވަޅުލާފައި ވަނީ މިދިޔަ މަހުގެ 24 ވަނަ ދުވަހު އެވެ.