އޭގެ އިތުރުން ރިޒާ ވަނީ އަންނަ އާދިއްތަ، ހޯމަ އަދި އަންގާރަ ދުވަހު ކޮމިޓީން ކަނޑައަޅާ ފަރާތްތަކާ މަޝްވަރާ ކުރާނެ ކަމަށް ވިދާޅުވެފަ އެވެ. އޭގެ ތެރޭގައި ރާއްޖޭގެ ނޫސްތަކާއި ދައުލަަތުގެ އިދާރާތައް ހިމެނޭކަން ފާހަގަކުރެއްވި އެވެ.
މީޑިއާ ރެގިއުލޭޓު ކުރުމުގެ ނަމުގައި ރައްޔިތުންގެ މަޖިލީހަށް ހުށަހަޅާފައިވާ ބިލަށް މިއަދު ހިޔާލަށް ހުޅުވާލައި، ބިލުގެ މަސައްކަތް ދެ ހަފްތާތެރޭ ނިންމުމަށް ރައްޔިތުންގެ މަޖިލީހުގެ މިނިވަން މުއައްސާތަކާ ބެހޭ ކޮމިޓީން ނިންމައިފި އެވެ.
ގާނޫނުއަސާސީގެ ދަށުން ލިބިދޭ ހިޔާލުފާޅުކުރުމުގެ މިނިވަންކަން ދަމަހައްޓައި އާލާކޮށް، ނޫސްވެރިކަމުގެ މިނިވަންކަން ކުރިއަރުވައި ތަރައްގީކޮށް ދެމެހެއްޓުމަށް ކަމަށް ބުނެ، ޕީއެންސީ މެންބަރުންގެ ތާއީދާއެކު އެ ބިލު މަޖިލީހަށް ހުށަހެޅުއްވީ ތުޅާދޫ ދާއިރާގެ މިނިވަން މެމްބަރު އަބްދުލްހަންނާނު އަބޫބަކުރެވެ.
ދައުރުން ބޭރުން ޖަލްސާއެއް ބާއްވައި އިއްޔެ ވަނީ އެ ބިލު މަޖިލީހަށް ބަލައިގެންފަ އެވެ. އަދި، ދިރާސާ ކުރުމަށް މިނިވަން މުއައްސަސާތަކުގެ ކޮމެޓީއަށް ވަނީ ފޮނުވާފަ އެވެ.
އެ ބިލު ދިރާސާ ކުރުމަށް މިއަދު ބޭއްވި ކޮމެޓީ ބައްދަލުވުމުގައި، ކޮމިޓީގެ މުގައްރިރު އަދި ޖުޑީޝަލް ސާވިސް ކޮމިޝަން (ޖޭއެސްސީ)ގެ ރައީސް ހުސައިން ރިޒާ އާދަމް މެންބަރުންގެ ހިޔާލަށް ހުޅުވާލެއްވި އެވެ. އެއާ އެކު، ފުވައްމުލަކު ދެކުނު ދާއިރާގެ ޕީއެންސީ މެންބަރު އިބްރާހިމް ހުސައިން ހުށަހެޅުއްވާފައި ވަނީ މިއަދުން ފެށިގެން އަންނަ ހަފްތާގެ ހޮނިހިރު ދުވަހަށް އާންމުންގެ ހިޔާލަށް ހުޅުވާލުމަށެވެ. އަދި އަންނަ މަހުގެ 15 ވަނަ ދުވަހުގެ ކުރިން މަސައްކަތް ނިންމާލުމަށެވެ.
ކެލާ ދާއިރާގެ ޕީއެންސީ މެންބަރު އަބްދުﷲ ޝަރީފު ތާއީދު ކުރެއްވި އެ ހުށަހެޅުން ވަނީ ފާސްވެފަ އެވެ.
އޭގެ އިތުރުން ރިޒާ ވަނީ އަންނަ އާދިއްތަ، ހޯމަ އަދި އަންގާރަ ދުވަހު ކޮމިޓީން ކަނޑައަޅާ ފަރާތްތަކާ މަޝްވަރާ ކުރާނެ ކަމަށް ވިދާޅުވެފަ އެވެ. އޭގެ ތެރޭގައި ރާއްޖޭގެ ނޫސްތަކާއި ދައުލަަތުގެ އިދާރާތައް ހިމެނޭކަން ފާހަގަކުރެއްވި އެވެ.
ބިލްގައިވާ ގޮތުން މޯލްޑިވްސް މީޑިއާ ކައުންސިލާއި ބްރޯޑްކާސްޓިން ކޮމިޝަން އުވާލައި އުފައްދާ މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނަށް، ނޫސްވެރިން ބޮޑެތި އަދަދުތަކުން ޖޫރިމަނާކޮށް، މީޑިއާ ރެގިއުލޭޓްކުރުމުގެ ގާނޫނީ ބާރުތަކެއް ސަރުކާރަށް ލިބެ އެވެ.
ބިލުގައި އޮތީ، މީޑިއާ ކައުންސިލާއި ބްރޯޑްކާސްޓިން ކޮމިޝަން އެއްކޮށްލުމަށްފަހު އުފައްދާ އާ ކޮމިޝަންގައި ތިއްބަވާނީ ހަތް މެމްބަރުންނެވެ. އޭގެ ތެރެއިން މަޖިލީހުގެ ރުހުމާ އެކު ތިން މެމްބަރުން ކޮމިޝަނަށް އައްޔަންކުރުމުގެ ބާރު ރައީސަށް އޮތް ނަމަވެސް ބާކީ ހަތަރު މެންބަރުންނަކީ މީޑިއާތަކުން އިންތިހާބުކުރާ މެންބަރުންނެވެ. ކޮމިޝަންގެ ރައީސަކު ކަނޑަޅުއްވަނީ ބިލްގައިވާ ގޮތުން ރައީސެވެ.
ކޮމިޝަނުން އެކުލަވާލާ ސުލޫކީ މިންގަނޑާ ހިލާފުވާ ނޫސްވެރިންނާއި މީޑިއާތައް ބޮޑު އަދަދަކުން ޖޫރިމަނާކޮށް، ރަޖިސްޓްރީ ވެސް ބާތިލްކުރެވޭ ގޮތަށެވެ. ވަކިވަކި ނޫސްވެރިން 5،000-25،000 ރުފިޔާއާ ދެމެދު ޖޫރިމަނާ ކުރެވޭ އިރު، މީޑިއާތައް 100،000 ރުފިޔާއާ ހަމައަށް ޖޫރިމަނާ ކުރެވެ އެވެ.