މީޑިއާ "ކޮންޓްރޯލް" ކުރާ ބިލު ތަސްދީގު ނުކުރަން ނަޝީދު ގޮވާލައްވައިފި

މީޑިޔާ ރެގިއުލޭޓު ކުރުމުގެ ނަމުގައި ރައްޔިތުންގެ މަޖިލީހަށް ވައްދާފައިވާ ބިލު ފަސްކޮށްފިނަމަ، އޭގެ ނުރަގަޅު އަސަރު މުޅި ގައުމަށް ކުރާނެ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

ގާނޫނުއަސާސީގެ ދަށުން ލިބިދޭ ހިޔާލުފާޅުކުރުމުގެ މިނިވަންކަން ދަމަހައްޓައި އާލާކޮށް، ނޫސްވެރިކަމުގެ މިނިވަންކަން ކުރިއަރުވައި ތަރައްގީކޮށް ދެމެހެއްޓުމަށް ކަމަށް ބުނެ، އެ ބިލު މަޖިލީހަށް މިފަހަރު ވެސް ހުށަހެޅުއްވީ ތުޅާދޫ ދާއިރާގެ މިނިވަން މެމްބަރު އަބްދުލްހަންނާނު އަބޫބަކުރެވެ.

މި ބިލާމެދު ކަންބޮޑުވުން ފާޅުކުރައްވައި ނަޝީދު އެކްސްގައި ކުރެއްވި ޕޯސްޓެއްގައި ވަނީ ލިޔުންތެރިޔެއްގެ ހައިސިއްޔަތުންނާއި އޭގެ ސަބަބުން ޖަލަށް ވަޑައިގަންނަވަން ޖެހިވަޑައިގަތް ބޭފުޅެއްގެ ހައިސިއްޔަތުން އެ ބިލު ތަސްދީގު ނުކުރެއްވުމަށް ރައީސް ޑރ. މުހައްމަދު މުއިއްޒަށް ގޮވާލައްވާފަ އެވެ.

ނަޝީދު ވިދާޅުވީ އެ ބިލު ތަސްދީގު ކުރައްވައިފިނަމަ މިނިވަންކޮށް އޮތް މި ގައުމަށް ނޭދެވޭ އަސަރު ކުރާނެ ކަމަށެވެ.

އެ ޕޯސްޓުގައި ނަޝީދު ވަނީ އިއްޔެ ހައްޔަރު ކުރި ނޫސްވެރިން ދޫކޮށްލުމަށް ވެސް ގޮވާލައްވާފަ އެވެ. ނަމަވެސް ނޫސްވެރިން ކުރި އިހުތިޖާޖުގެ ތެރެއިން ބެލުމުގެ ދަށަށް ގެންދިޔަ ނޫސްވެރިން ވަނީ ދޫކޮށްލާފަ އެވެ. ފުލުހުން ބުނީ ނޫސްވެރިން ގަދަކަމުން ދުރުކުރަން ޖެހުނީ ގްރީން ޒޯނުގައި ތިބުމުން ކަމަށެވެ.

ނަޝީދަކީ ނޫސްވެރިކަމުގެ ދާއިރާއިން ސިޔާސީ މަސައްކަތަށް ނުކުމެވަޑައިގެންނެވި ބޭފުޅެކެވެ. އެމަނިކުފާނު ޖަލަށް ލީ ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގަ އެވެ. ޖަލުގައި ހުންނެވިއިރު ބޮޑެތި އަނިޔާތަކާ ކުރިމަތިލައްވަން ޖެހިވަޑައިގަތެވެ. ނަޝީދަކީ ހިޔާލުފާޅު ކުރުމުގެ މިނިވަންކަމާއި ނޫސްވެރިކަމުގެ މިނިވަން ކަމަށް ވަރަށް ބޮޑަށް ވަކާލާތު ކުރެއްވި ބޭފުޅެކެވެ.

ނަޝީދުގެ އިތުރުން އެމްޑީޕީއާއި މީޑިއާ ކައުންސިލާއި ޖަމިއްޔާތަކާއި އަދި އާންމުން ވެސް ދަނީ އެ ބިލާ ދެކޮޅަށް އަޑު އުފުލަމުންނެވެ. ނޫސްވެރިން މުޒާހަރާ ކުރަމުން ދަނިކޮށް އިއްޔެ ވަނީ އެ ބިލު މަޖިލީހުން ބަލައިގެންފަ އެވެ.