ޓީޓީއެމް ފެއާގައި މި އަހަރުވެސް 250 އަށްވުރެ ގިނަ ޓްރެވަލް އެޖެންޓުންނާއި ޓޫރިޒަމް ސިނާއަތުގެ 500 އަށްވުރެ ގިނަ ފަރާތް ބައިވެރިވެފައިވެ އެވެ.
ރާއްޖޭގައި ބާއްވާ ހަމައެކަނި ޓޫރިޒަމް ފެއާ ކަމަށްވާ ޓްރެވަލް ޓްރޭޑް މޯލްޑިވްސް (ޓީޓީއެމް) ބޭރުގެ 250 ޓްރެވަލް އެޖެންޓުންނާއެކު ކުރިއަށް އެބަދެ އެވެ.
ބާސެލޯސް ނަސަންދުރަ ޕެލަސް ހޮޓެއްލަގައި މިއަދުގެ ހަވީރުގެ ނިޔަލަށް ކުރިއަށްދާ ޓީޓީއެމް ފެއާގައި މި އަހަރުވެސް 250 އަށްވުރެ ގިނަ ޓްރެވަލް އެޖެންޓުންނާއި ޓޫރިޒަމް ސިނާއަތުގެ 500 އަށްވުރެ ގިނަ ފަރާތް ބައިވެރިވެފައިވެ އެވެ. މި ފަރާތްތަކުގެ ތެރޭގައި ރާއްޖޭގެ 125 ރިސޯޓާއި ގިނަ އަދަދެއްގެ ގެސްޓްހައުސްވެސް ހިމެނެ އެވެ.
އޯކާ މީޑިއާ އިން މި އަހަރުގެ ފެއާ ވެސް އިންތިޒާމުކޮށްފައިވަނީ ދުރާލާ ޓޫރިޒަމް ސިނާއަތުގެ ފަރާތްތަކުން މީޓިންތައް އިންތިޒާމު ކުރެވޭ ގޮތަށެވެ. މި އަހަރުވެސް 3،000 އަށްވުރެ ގިނަ މީޓިން އެރޭންޖްކޮށްފައިވެ އެވެ.
ޓީޓީއެމް ފެއާ މިއަދު ނިމުމަށްފަހު މިރޭ އޮންނާނީ ޓީޓީއެމްގެ ގާލާ ނައިޓް އެވެ. މި ހާއްސަ އިވެންޓް އޮންނާނީ އަދާރަން ސިލެކްޓް ހުދުރަންފުށީގަ އެވެ.