ކުޅުދުއްފުށީގައި 2000 ހައުސިން ޔުނިޓް އަޅަން އެޗްޑީސީއާ ހަވާލުކޮށްފި

ކުޅުދުއްފުށީ ސިޓީގައި 2000 ހައުސިން ޔުނިޓް އެޅުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އާއި ހަވާލުކޮށްފި އެވެ.

ކޮންސްޓްރަކްޝަން މިނިސްޓްރީން ވަނީ މި މަޝްރޫއުގެ އިތުރުން ކުޅުދުއްފުށި ސިޓީގައި ހުއްޓިފައިހުރި 400 ހައުސިން ޔުނިޓުގެ މަސައްކަތް ވެސް އެޗްޑީސީއާ ހަވާލުކޮށްފަ އެވެ.

މި އެއްބަސްވުންތަކުގައި ސޮއިކުރީ ރައީސް ޑރ. މުހައްމަދު މުއިއްޒު ރޭ އެ ސިޓީއަށް ވަޑައިގެން ރައްޔިތުންނާ ބައްދަލުކުރައްވަން ބޭއްވި ޖަލްސާގަ އެވެ. މި އެއްބަސްވުމުގައި ކޮންސްޓްރަކްޝަން މިނިސްޓްރީގެ ފަރާތުން ސޮއިކުރެއްވީ ސްޓޭޓް މިނިސްޓަރު ހަސަން ރަޝީދެވެ. އެޗްޑީސީގެ ފަރާތުން ސޮއިކުރެއްވީ ކުންފުނީގެ މެނޭޖިން ޑިރެކްޓަރު އަލީ ޒުހެއިރެވެ.

މި ޖަލްސާގައި ވާހަކަދައްކަވަމުން ރައީސް ވިދާޅުވީ، އެމަނިކުފާނު އިއުލާންކުރައްވާފައިވާ 2000 ހައުސިންގެ ތެރެއިން 700 ޔުނިޓު ހާއްސަ ކުރާނީ އަމިއްލަ ގޯތީގައި ގެ އަޅަން ބޭނުންވާ މީހުންނަށް ކަމަށެވެ. އަދި ބާކީ 1300 ހައުސިން ޔުނިޓްގެ މަސައްކަތް ކުރިއަށްގެންދާނީ ޕަބްލިކް ހައުސިންގެ ތެރެއިން ކަމަށް ވިދާޅުވި އެވެ.

"700 ޔުނިޓު މިދޫކުރަނީ މިގޮތަށް، އެއީ ކޮންމެ ޔުނިޓަކީ ތިން ކޮޓަރީގެ އެޕާޓްމަންޓެއް. އެ 700 ޔުނިޓު މިހާއްސަ ކުރަނީ ތިބޭފުޅުންގެ ތެރެއިން، އަމިއްލަ ގޯތީގައި ގެއަޅަން ބޭނުންވާ މީހުންނަށް. އަޅުގަނޑު ގަބޫލުކުރަނީ މިގޮތަށް 700 ޔުނިޓް ތަރައްގީކޮށް ނިންމުމުން ވަރަށް ގިނަ ބަޔަކަށް ފާއިދާވާނެ ކަމަށް. އަމިއްލައަށް ބޭންކުން ލޯނުނަގައިގެން ގެއަޅަން އުޅެ ނުވެފައި ތިބެދާނެ. އަދި މިކަމުގެ ތެރެއިން މިކަން ހަމަޖެހިގެންދިޔުމުން ވަރަށް ބޮޑު ފަސޭހައެއް ލިބިގެންދާނެ،" ރައީސް ވިދާޅުވިއެވެ.

މިއަހަރުގެ ތެރޭގައި 700 ހައުސިންއަށް ކުރިމަތިލާން ބޭނުންވާ ފަރާތްތައް ދެނެގަނެ، އެކަން މިނިސްޓްރީން އެޗްޑީސީއާއި ހިއްސާކޮށް، ދެ އިދާރާ ގުޅިގެން މަސައްކަތް ބާރަށް ކުރިއަށް ގެންދިޔުމަށް ރައީސް ވަނީ އެދިވަޑައިގެންފަ އެވެ،

ކުޅުދުއްފުށި ސިޓީގައި 400 ހައުސިން ޔުނިޓްގެ މަސައްކަތް ފެށީ ކުރީ ސަރުކާރުގައި، 2023 ވަނަ އަހަރުގެ މެއި މަހު އެވެ. ޓުވެންޓީ ތާޑް މެޓާލާޖިކަލް ކޮންސްޓްރަކްޝަން ގްރޫޕް ކޯ ލިމިޓެޑާއި ހަވާލުކޮށްގެން ފެށި މި މަސައްކަތްވަނީ ވަކި ހިސާބަކުން ހުއްޓިފަ އެވެ.