އިހަވަންދިއްޕޮޅުގެ މައި ހަބް، ކުޅުދުއްފުށީ ބީއެމްއެލް ބްރާންޗުގެ ބިންގާ އަޅައިފި

އިހަވަންދިއްޕޮޅުގެ މައި ހަބް ކަމަށްވާ ހދ. ކުޅުދުއްފުށީގައި  ބޭންކް އޮފް މޯލްޑިވްސް (ބީއެމްއެލް) ބްރާންޗުގެ ބިންގާ އަޅައި އެވެ.

ރައީސް މިހާރު ހއ. ހދ. އަށް ކުރައްވަމުން ގެންދަވާ ފަތުރުފުޅުގައި މި މިކަމަށްޓަކައި ބޭއްވި ރަސްމިއްޔާތުގައި ކުޅުދުއްފުށީ ބްރާންޗުގެ ބިންގާ އަޅުއްވައި ދެއްވީ ފިނޭންސް މިނިސްޓަރު މޫސާ ޒަމީރު އެވެ. މި ރަސްމިއްޔާތުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު އާއި ވަޒީރުންނާއި ބީއެމްއެލްގެ ޗެއާޕާސަން އަހުމަދު އަލީ ހަބީބާއި ބީއެމްއެލްގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފާއި ބީއެމްއެލްގެ އިސްބޭފުޅުން ބައިވެރިވެ ވަޑައިގެންނެވި އެވެ.

ކުޅުދުއްފުށި ސިޓީގައި ގާއިމުކުރާ މި ބްރާންޗް ވެގެންދާނީ ބޭންކުގެ ބިޒްނަސް ސެންޓަރަށެވެ. މިއީ ކުޅުދުއްފުށި ސިޓީ އާއި އަތޮޅުތެރޭގެ ވިޔަފާރިތަކަށް އަމާޒުކޮށްގެން ހިދުމަތް ފޯރުކޮށްދިނުމަށް ހާއްސަކުރެވޭ ބިޒްނަސް ސެންޓަރެކެވެ. އަދި މިއީ ބޭންކުގެ ތިންވަރަ ބިޒްނަސް ސެންޓަރަށެވެ. މިވަގުތު ބޭންކުގެ ބިޒްނަސް ސެންޓަރ ގާއިމުކޮށްފައިވަނީ މާލޭ ސިޓީ އާއި އައްޑޫ ސިޓީގަ އެވެ.

އެމްޑީ ޝަރީފް ވިދާޅުވީ މުޅި ރާއްޖެއަށް ބޭންކުގެ ޚިދުމަތްތައް ފުޅާކުރަމުން ދާއިރު، އަޅުގަނޑުމެން މި ދަނީ ކުޅުދުއްފުށި ސީޓީ ފަދަ، ސަރަހައްދުގެ މައި މަރުކަޒުތަކަށް ވެސް އިސްކަންދެމުން ކަމަށާ މިއަދު ވިޔަފާރިތަކަށް ހާއްސަ ބްރާންޗެއްގެ ބިންގާ އެޅުމަކީ މި ސަރަހައްދުގެ ވިޔަފާރި މުޖުތަމައަށް ބޭނުންވާ ފުރިހަމަ ހިދުމަތް ފޯރުކޮށްދިނުމަށް އަޅުގަނޑުމެނަށް އެޅޭ މުހިންމު ފިޔަވަޅެއް ކަމަށެވެ.

ބީއެމްއެލް އިން އިއްޔެ ވަނީ ހދ. ނޮޅިވަރަންފަރުގައި އާ ބްނާންޗެއް ހުޅުވައި ވައިކަރަދޫ އަދި ނޭކުރެންދޫގައި އޭޓީއެމްގެ ހިދުމަތް ދޭން ފަށާފަ އެވެ. މުޅި ރާއްޖެ ހިމެނޭ ބޭންކިން ވިއުގަޔަކާއެކު 20 އަތޮޅުގައި 42 ބްރާންޗް، 154 ސެލްފްސާވިސް ބޭންކިން ސެންޓަރު 213 އޭޓީއެމްގެ އިތުރުން އެންމެ ޒަމާނީ އޮންލައިން ބޭންކިން ހިދުމަތާއެކު ބޭންކް އޮފް މޯލްޑިވްސްގެ އަމާޒަކީ އާންމު ފަރުދުންނާއި ވިޔަފާރިތަކާއި ރާއްޖޭގެ އެކި ކަންކޮޅުތަކުގައިވާ މުޖުތަމައުތަކަށް އެހީތެރިކަން ފޯރުކޮށްދިނުމެވެ.