ކުޅުދުއްފުށީ ޕޯޓުގައި އިތުރު ހިދުމަތްތަކެއް އިފްތިތާހުކޮށްފި
މި ޚިދުމަތްތަކުގެ ސަބަބުން ވިޔަފާރިތަކުން މުދާ އެއްތަނުން އަނެއް ތަނަށް އުފުލުމަށް ކުރަންޖެހޭ ހޭދަ ދަށްކުރެވި، ބާޒާރުގެ އަގުތައް ހަމައަކަށް އެޅުމަށް މަގުފަހިވެގެންދާނެ.
ކުޅުދުއްފުށީގެ ޕޯޓުން މިހާރު ފޯރުކޮށްދެމުންދާ ހިދުމަތްތައް ފުޅާކުރުމަށް ރައީސް ޑރ. މުހައްމަދު މުއިއްޒުގެ ވައުދުފުޅުގެ ތެރެއިން، އެ ޕޯޓުގައި އިތުރު މުހިއްމު ހިދުމަތްތަކެއް ފޯރުކޮށްދިނުމުގެ ފެށުން މިއަދު އިފްތިތާހްކޮށްފި އެވެ.
މި ހިދުމަތްތައް އިފްތިތާޙްކޮށްދެއްވުމަށް މިއަދު ހަވީރު ކުޅުދުއްފުށީ ޕޯޓު ސަރަހައްދުގައި ބޭއްވި ރަސްމިއްޔާތުގައި ރައީސް މުއިއްޒު ބައިވެރިވެވަޑައިގެންނެވި އެވެ.
މި ހިދުމަތްތައް އިފްތިތާޙްކޮށްދެއްވީ އިކޮނޮމިކް މިނިސްޓަރު މުހައްމަދު ސައީދު އެވެ. މިއީ މޭ 19 ގައި މިނިސްޓްރީ އާއި މޯލްޑިވްސް ޕޯޓްސް ލިމިޓަޑް (އެމް.ޕީ.އެލް) އާއި ދެމެދު ސޮއިކުރެވުނު ފަހުމުނާމާގައި އެއްބަސްވެފައިވާ ގޮތުގެ މަތިން އިފްތިތާހުކުރެވިގެންދިޔަ ހިދުމަތްތަކެކެވެ.
މިއަދު ކުޅުދުއްފުށީ ޕޯޓުގައި ތައާރުފުކުރެވިގެންދިޔަ ޚިދުމަތްތަކުގެ ތެރޭގައި، ކާބޯތަކެތީގެ މައިގަނޑު ބާވަތްތަކާއި އެހެނިހެން ބާވަތްތައް، އަދި އަސާސީ މުދާ، ޑިއުޓީ ނުދައްކާ ރައްކާކުރުމަށް ބޮންޑެޑް ސަރަހައްދެއް ގާއިމުކުރުމާއި، ރާއްޖޭގެ އުތުރުގެ ސަރަހައްދުގައި ހިމެނޭ ޓޫރިސްޓު ރިޒޯޓުތަކަށް ޢަމާޒުކޮށްގެން ތަޢާރުފުކުރެވުނު ބޮންޑެޑް ވެއަރހައުސްގެ ޚިދުމަތާއި، ރާއްޖޭގެ އަތޮޅު ތެރޭގައި މުދާ ޑިސްޓްރިބިއުޓްކުރުމަށް އިތުރު ލުއިފަސޭހަތަކެއް ފޯރުކޮށްދިނުމުގެ ގޮތުން ތަޢާރުފުކުރެވުނު ޑޮމެސްޓިކް ވިޔަފާރިވެރިންނަށް މުދާ ބޭލުމަށް ޚާއްޞަކުރެވިފައިވާ ސަރަޙައްދެއް ހުޅުވިގެންދިއުމުގެ އިތުރުން، ޢިމާރާތްކުރުމަށް ބޭނުންވާ ހިލަ އަދި ހިލަވެލި ފަދަ ބާވަތްތައް ގެނެސް ބަލްކްކޮށް ރައްކާކުރުމަށް ޚާއްޞަ ކުރެވިފައިވާ ސަރަޙައްދެއް ޤާއިމްކުރުން ހިމެނެ އެވެ.
މި ޚިދުމަތްތަކުގެ ސަބަބުން ވިޔަފާރިތަކުން މުދާ އެއްތަނުން އަނެއް ތަނަށް އުފުލުމަށް ކުރަންޖެހޭ ހޭދަ ދަށްކުރެވި، ބާޒާރުގެ އަގުތައް ހަމައަކަށް އެޅުމަށް މަގުފަހިވެ، އަދި އުތުރުގެ އަތޮޅުތަކުގެ ޢާއްމު ފަރުދުންނާއި ވިޔަފާރިތަކަށް މުދާ ފޯރުކޮށްދިނުމުގެ ނިޒާމް އިތުރަށް ހަރުދަނާވެގެންދާނެ އެވެ. އަދި ރާއްޖޭގެ އިޤްޠިޞާދު ސިންދަފާތުކޮށް ތަރައްޤީކުރުމަށާއި އިޤްޠިޞާދީ ވިލުންވެރިކަން އިތުރުކުރުމަށް ސަރުކާރުން ކަނޑައަޅާފައިވާ ތަސައްވުރަށް ވާސިލްވުމަށް މަގުފަހިވެގެންދާނެ ކަމަށް އިކޮނޮމިކް މިނިސްޓްރީން ބުންޏެވެ.
ސަރުކާރުގެ ޢަމާޒަކީ ކުރިއަށް އޮތްތަނުގައި ޑިމާންޑް އުފެދޭ މިންވަރަށް ބަލައި ބޮންޑެޑް ސްޓޯރޭޖުގެ ޚިދުމަތްތައް ފުޅާކުރުމަށް ކުޅުދުއްފުށީ ޕޯޓަށް މިހާރު ހަމަޖައްސާފައިވާ ބިމުގެ ސަރަޙައްދު ފުޅާކޮށް އިތުރަށް ތަރައްޤީކުރުމެވެ.
މިޙަފްލާގައި ވާހަކަ ދައްކަވަމުން، އިފްތިތާޙު ކުރެވިގެން ދިޔަ ޚިދުމަތްތައް ސައީދު ސިފަކުރެއްވީ، ސަރަޙައްދީ ވިޔަފާރި ކުރިއެރުވުމަށް މަގުފަހިކުރުވާ، އިޤްޠިޞާދީ ނަފާ ފޯރުކޮށްދިނުމުގައި ހަމަހަމަކަމުގެ މިންގަނޑުތަކެއް ގެންގުޅުމަށް ބާރުއެޅިގެންދާ، އަދި ލާމަރުކަޒީ ދައުލަތެއްގެ ސިފަތައް ހަރުދަނާކުރުމަށް އެޅިގެންދާ މުހިއްމު ފިޔަވަޅެއްގެ ގޮތުގަ އެވެ.
މި ޚިދުމަތްތަކަކީ ތިލަދުންމަތީ އަދި އުތުރުގެ އެހެނިހެން ސަރަޙައްދުތަކުގެ ތަރައްޤީގައިވެސް ކުޅުދުއްފުށީ ސިޓީން އަދާ ކުރާ އިސް ދައުރު ފުޅާވެގެން ދިއުމަށް މަގުފަހިވުމުގެ އިތުރުން، ސަރުކާރުން ދެމެހެއްޓެނިވި ތަރައްޤީ، ފުޑް ސެކިއުރިޓީ، އަދި ވިޔަފާރީގެ ޙަރަކާތްތައް މުޅި ރާއްޖެއަށް ފުޅާކުރުމަށް ދެއްވާ އިސްކަން ރަމްޒުކޮށްދޭ މުހިއްމު މަޝްރޫޢެކެވެ.
ކޮމެންޓް
Republic of Maldives