"އިގްތިސާދީ ނަފާ ހޯދަން ރައްޔިތުންނާ ގުޅިގެން ކައުންސިލުން ހުށަހަޅާ ކަންކަމަށް އިޖާބަދޭނަން"

އިގުތިސާދީ ނަފާ ހޯދުމަށް ރައްޔިތުންނާ ގުޅިގެން ކައުންސިލުން ހުށަހަޅާ ކަންކަމަށް ސަރުކާރުން އިޖާބަ ދޭނެކަމުގެ ޔަގީންކަން ރައީސް ޑރ. މުހައްމަދު މުއިއްޒު ދެއްވައިފި އެވެ. 

ހދ. އަތޮޅުގެ މީހުން ދިރިއުޅޭ ރަށްތަކަށް މިހާރު ކުރައްވަމުންދާ ގެންދަވާ ދަތުރުފުޅުގެ ތެރެއިން، ނޭކުރެންދޫއަށް ވަޑައިގެން އެ ރަށު ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން، ރައީސް ވިދާޅުވީ ނޭކުރެންދޫ ކައުންސިލްގެ އެދުމުގެ މަތީން، އެ ރަށުގައި ކުރިން ޖަލެއް ހަދަން ކަނޑައަޅާފައި އޮތް ބިމެއް ކައުންސިލާ ހަވާލުކުރައްވާފައިވާ ކަމަށާއި، އެއީވެސް އިގުތިސާދީ ނަފާ ހޯދުމަށް ބޭނުންކުރުމަށް ހަވާލުކުރައްވާފައިވާ ބިމެއް ކަމަށެވެ.

އެ ބިމުގެ ބޭނުން ކުރުމަށްވެސް، ރައްޔިތުންގެ މަޝްވަރާއާއެކު ކައުންސިލުން ހުށަހެޅުމުން، ސަރުކާރުން މަގުފަހިކޮށްދޭނެ ކަމަށް އެ މަނިކުފާނު ވިދާޅުވި އެވެ.

މި ދަތުރުފުޅުގައި ހިމެނިގެން މިއަދު ވަނީ، ނޭކުރެންދޫ ސްވިމިން ޓްރެކް ތަރައްގީކުރުމުގެ މަޝްރޫއުގެ އެއްބަސްވުމުގައި ސޮއިކުރައްވާފަ އެވެ. 

ރައީސް ވިދާޅުވީ، މި މަސައްކަތް ކުރިއަށްގެންދާނީ ބަނދަރުގެ މަސައްކަތާ އެކުއެކީގައި ކަމަށެވެ. މިހާރު ކުރިއަށްދާ ބަނދަރުގެ މަޝްރޫއު ނިމިގެންދާނީ، އެ މަނިކުފާނުގެ ވައުދުފުޅާ އެއްގޮތަށް، ބަނދަރުގެ ޖާގައަށް 100 ފޫޓު އިތުރުކުރައްވައިގެން ކަމަށާއި، ދޯނި އެހެލާ ސަރަހައްދަކާއި، މޫދަށް އެރޭ ސަރަހައްދެއްވެސް މި މަޝްރޫއާ އެކުގައި ކުރިއަށްގެންދަވާނޭކަމަށް އެ މަނިކުފާނު ވިދާޅުވި އެވެ. 

އަދި ރަށްގިރުމުގެ މައްސަލަ ހައްލުކުރެއްވުން، އަންނަ އަހަރުގެ ބަޖެޓުގައި ހިމަނުއްވާނޭ ކަމުގެ ޔަގީންކަން އެ މަނިކުފާނު ދެއްވި އެވެ.

ދިގުލައިގެންގޮސްފައިވާ ސްކޫލް މަޝްރޫއަށް އިޝާރާތްކުރައްވަމުން އެ މަނިކުފާނު ވަނީ، އާ ދިރާސީ އަހަރު، އާ އިމާރާތް ބޭނުންކުރެވޭނޭ ގޮތަށް މަޝްރޫއު ނިންމަވައިދެއްވާނޭކަމަށް ވިދާޅުވެފަ އެވެ. 

އަދި މަލްޓިޕާޕަސް ހޯލުގެ މަޝްރޫއު އަންނަ އަހަރުގެ ބަޖެޓުގައި ހިމަނުއްވައި، ލަސްވެގެން އަހަރުގެ ކުރީކޮޅު އަމަލީ މަސައްކަތް ފައްޓަވައިދެއްވާނޭކަމަށް އެ މަނިކުފާނު ވިދާޅުވި އެވެ.