"މަކުނުދޫގައި އެއާޕޯޓް އެޅުމަކީ ޒަރޫރީ ކަމެއް، ދެން އަންނާނީ އެތަން ހުޅުވަން"

ރާއްޖޭގެ ރަށްރަށް ބެހިފައިވާގޮތުން، ހދ. މަކުނުދޫއަކީ ވަކިން އެކަހެރިކޮށް އަދި ދަތުރުފަތުރު ކުރުމުގައި އުނދަގޫ ހިސާބެއްގައި އޮންނަ ރަށަކަށްވާތީ އެރަށުގައި އެއާޕޯޓެއް ގާއިމްކުރުމަކީ ޒަރޫރީ ކަމެއްކަމަށް ދެކެވަޑައިގަންނަވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

މަކުނުދޫގައި އެއާޕޯޓެއް އެޅުމަކީ ރައީސްގެ ވައުދުފުޅެކެވެ. އެ ވައުދުފުޅާ އެއްގޮތަށް މިއަދު ވަނީ އެއާޕޯޓް އެޅުމަށް ބޭނުންވާ ބިން ހިއްކުމަށާއި އެތަން އެޅުމަށް އެމްޓީސީސީއާ ހަވާލުކޮށްފަ އެވެ. 

އެއާޕޯޓް މަޝްރޫއު އެމްޓީސީސީއާ ހަވާލުކޮށްފައި ވަނީ ރައީސް ހދ. އަތޮޅަށް ކުރައްވާ ދަތުރުފުޅުގެ ތެރެއިން މަކުނުދޫއަށް މިއަދު ވަޑައިގެން ރައްޔިތުންނަށް ބައްދަލުކުރައްވަން ބޭއްވި ޖަލްސާގަ އެވެ.

މި ޖަލްސާގައި ވާހަކަދައްކަވަމުން ރައީސް ވިދާޅުވީ ދެމެހެއްޓެނިވި ތަރައްގީގެ ސިޔާސަތުގެ ދަށުން މަކުނުދޫގައި އެއާޕޯޓެއް ގާއިމްކުރުމަކީ ކޮންމެހެން ކުރަންޖެހޭ ކަމެއް ކަމަށެވެ. އެކަމުގެ ސަބަބުން ރަށުގެ ދަތުރުފަތުރާއި އިގްތިސޯދަށް އަންނާނެ ކުރިއެރުން ފާހަކުރައްވައި، ވިދާޅުވީ، އެއާޕޯޓް ވެގެންދާނީ ރަށުގެ އިގްތިސޯދީ ކުރިއެރުން އެހެން ހަރުފަތަކަށް ގެންދިއުމަށް ހުޅުވޭ މުހިންމު ދޮރާއްޓަކަށް ކަމަށެވެ.

މަކުނުދޫގެ ތަރައްގީގެ ގިނަ މަޝްރޫއުތަކެއްގައި މިއަދުގެ ޖަލްސާގައި ވަނީ ސޮއިކޮށްފަ އެވެ. އޭގެ ތެރޭގައި އެއާޕޯޓް މަޝްރޫއުގެ އިތުރުން އެރަށު ބިންހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫއު އަދި އެއާޕޯޓް ތަރައްޤީކުރުމުގެ މަޝްރޫޢުގެ އިތުރުން މަކުނުދޫ މަގުހެދުމުގެ އެއްބަސްވުމުގައި ވަނީ ސޮއިކޮށްފަ އެވެ. 

ރައީސް ވިދާޅުވީ އެރަށުގައި 1800 މީޓަރުގެ ރަންވޭއެއް ހެދުމާއި، އެއާޕޯޓްގެ އިންފްރާސްޓްރަކްޗާ އިތުރުކުރުމަށާއި ރަށުގެ ގެދޮރުއެޅުމާއި އެހެނިހެން ބޭނުންތަކަށް ބޭނުންވާވަރަށް ބިންހިއްކުމުގެ މަސައްކަތް އެމްޓީސީސީން ކުރިއަށް ގެންދަވާނެ ކަމަށެވެ. އަދި، ރަށުގެ ބޭނުމަށް 22 ހެކްޓަރުގެ ބިންހިއްކުމަށް ހަމަޖެހިފައިވާ ކަމަށް ވެސް ރައީސް ވިދާޅުވި އެވެ.

“ރަށުގެ ބޭނުމަށް 22 ހެކްޓަރު ހިއްކޭނެ. އަދި އެއާޕޯޓު ބޭނުމަށް ބިން ހިއްކޭނެ. ވަރަށް އިސްކަންދީގެން މި މަސައްކަތް ކުރިއަށްދާނެ. މިއާއެކު އެއާޕޯޓް ހިންގުން އެމްއޭސީއެލް ހަވާލުވާނެ. އެކުންފުނިން އެމްޓީސީސީއާއި ސަރުކާރުގެ ކަމާބެހޭ ވުޒާރާއެކު މަސައްކަތްކުރާނެ. އަޅުގަނޑު އެންމެ އިސްކަންދެނީ ވީހާވެސް ވަހަށް މި މަސައްކަތް ނިންމުމަށް،" ރައީސް ވިދާޅުވި އެވެ.

އެރަށުގައި ޕާސްޕޯޓް ހިދުމަތް ވެސް މިއަދު ވަނީ ފަށާފަ އެވެ.