އޭޓީއެމްގެ ސަބަބުން އިގްތިސޯދުގައި އެނބުރޭ ފައިސާ %5 އިތުރުވެއްޖެ

ރާއްޖޭގައި އޭޓީއެމްތައް ބަހައްޓަމުން ދިއުމުގެ ސަބަބުން މުޅި އިގްތިސޯދުގައި އެނބުރޭ ފައިސާގެ މިންވަރު  ފަސް ޕަސެންޓް އިތުރުވެފައިވާ ކަމަށް ދައްކައިފި އެވެ. 

އެމްއެމްއޭ އިން އާއްމުކުރި ރިޕޯޓެއްގައިވާ ގޮތުން އިގްތިސޯދުގައި އެނބުރޭ ފައިސާގެ މިންވަރު 2023 ވަނަ އަހަރު 4.1 ބިލިއަން ރުފިޔާގައި ހުރިނަމަވެސް މިދިޔަ އަހަރުގެ މި އަދަދު ވަނީ 4.2 ބިލިއަން ރުފިޔާއަށް އިތުރުވެފަ އެވެ. އެ ރިޕޯޓުގައިވާ ގޮތުން މިއީ 2022 ގެ ފަހުން މި ޑިމާންޑް އިތުރުވި ފުރަތަމަ ފަހަރެވެ. 

މި ރިޕޯޓް ދައްކާ ގޮތުން އޭޓީއެމް ބަހައްޓަމުން ދިއުމުގެ ސަބަބުން ފައިސާގެ ކުދި އަދަދުތަކަށް އޮތް ޑިމާންޑްވެސް ވަނީ އިތުރުވެފަ އެވެ. މިގޮތުން 2023 ވަނަ އަހަރާ އަޅާކިޔާނަމަ އިގްތިސޯދުގައި ދައުރުކުރާ ފައިސާ ފޮތީގެ މިންވަރު ވެސް ވަނީ ފަސް  ޕަސެންޓް އިތުރުވެފަ އެވެ. މިގޮތުން އިގްތިސޯދުގައި ދައުރުކުރާ ފައިސާގެ މިންވަރު 2023 ގައި 84.4 ބިލިއަން ރުފިޔާގައި ހުރިނަމަވެސް މިހާރު މިއަދަދު ވަނީ ގާތްގަނޑަކަށް 90 ބިލިއަން ރުފިޔާއަށް އިތުރުވެފަ އެވެ. 

އެމްއެމް އިން ބުނި ގޮތުގައި މިދިޔަ އަހަރުގެ ނިޔަލަށް މުޅިރާއްޖޭގައި 215 އޭޓީއެމްއިން ހިދުމަތް ދެމުން ގެންދެ އެވެ. 

ރައީސް ޑރ. މުހައްމަދު މުއިއްޒުގެ ރިޔާސީ ވައުދުގައި ހިމެނޭ މީހުން ދިރިއުޅޭ ކޮންމެ ރަށެއްގައި ގައުމީ ބޭންކް، ބީއެމްއެލްއިން އޭޓީއެމް ބެހެއްޓުމުގެ މަސައްކަތް އިއްޔެ ނިޔަލަށް ހދ. ގެ ހަތަރު ރަށެއްގައި ވަނީ ނިންމާލާފަ އެވެ. މިގޮތުން އޭޓީއެމް ބަހައްޓާފައިވަނީ އެގޮތުން ހަނިމާދޫ އާއި ނައިވާދޫ އާއި ނެއްލައިދޫ އަދި ނޮޅިވަރަމުގަ އެވެ. މި އާއެކު މުޅިރާއްޖޭގައި ބެހެއްޓި އޭޓީއެމްގެ އަދަދު ވަނީ 208އަށް އިތުރުވެފަ އެވެ.