ހދ. އަތޮޅުގައި ޓޫރިޒަމް ނެތް ލޭބަލް ނައްތާލާނަން: ރައީސް

ހދ. އަތޮޅުގައި ޓޫރިޒަމް ކުރިއަރުވަން ސަރުކާރުން ވަރަށް ބޮޑު އިސްކަމެއް ދޭ ކަމަށާއި، އެ އަތޮޅުގައި ޓޫރިޒަމް ނެތް ލޭބަލް ނައްތާލާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

އެއަތޮޅު ނައިވާދޫއަށް ވަޑައިގެން އެރަށު ރައްޔިތުންނާ ބައްދަލުކުރައްވައި މިއަދު ވާހަކަ ދައްކަވަމުން ރައީސް ވިދާޅުވީ އެ އަތޮޅުގައި ޓޫރިޒަމް ފުޅާކުރުމާއި ރަށްރަށުގައި ލޯކަލް ޓޫރިޒަމް ކުރިއެރުވުމަކީ މިހާތަނަށް އެއްވެސް ބަޔަކަށް ކުރެވިފައިވާ ކަމެއް ނޫން ކަމަށެވެ.

"އަޅުގަނޑުމެންވާނީ މިހާރު ވަރަށް މުހިންމު މަސައްކަތްތަކެއް ފަށާފައި، މިހާރު ވަނީ މި އައަތޮޅު ހިމެނޭޙެން އިންވެސްޓުކުރާ ފަރާތްކަށް ވަރަށް ބޮޑު ލުއިތަކެއް، ޑިސްކައުންޓުތަކެއް ދީފައި، މި އަތޮޅުން ވެސް ވަރަށް ގިނަ ފަޅުތަކާއި ފަޅުން ބައިތަކާއި މިކަހަލަ ތަންތަން ހިމެނޭ ގޮތަށް ގާތްގަނޑަކަށް 10 ވަރަަށް ސަރަހައްދު މި އަތޮޅު ތެރެއިން ވާނީ އިއުލާނުކޮށްފައި. މިހާރު ބިޑަށް ހުޅުވާލާފައި އެވަނީ އޯޕަން ޓެންޑަރިންނާ އަދި ކްލޯޒްޑް ޓެންޑަރިންނަށް،" ރައީސް ވިދާޅުވި އެވެ.

ރައީސް ވަނީ އެމްޓީޑީސީއާ ހަވާލުކޮށްގެން ކުރިއަށްގެންދަން މަސައްކަތްކޮށް، ނަމަވެސް މިހާރު ހުއްޓިފައިވާ ނާގޯށި މަޝްރޫއު ކުރިއަށް ގެންދާނެ ގޮތްތައް ހޯދާފައިވާކަމަށް ވެސް ވިދާޅުވެފަ އެވެ. 

އެ މަޝްރޫއު ބާރަށް ކުރިއަށް ދާނެކަން ފާހަގަކުރައްވަމުން ވިދާޅުވީ، އެމްޓީޑީސީއަށް ފިނޭންސް މިނިސްޓްރީގެ ތެރެއިން އެ މަޝްރޫއު ކުރިއަށް ގެންދަން ލުއިތަކެއް ދީގެން، ނާގޯށި ފެށުމަށް މިހާރު މޯބިލައިޒް ކޮށްފައިވާ ކަމަށެވެ.

"އެއީ ވަރަށް ދުވަސްވީ މައްސަލައެއް. ނުހިނގާ، ކުރަން އުޅެ ނުވެފައި. އެހެން ނަމަވެސް، މިހާރު މި މަސައްކަތް މިވަނީ ބާރު ސްޕީޑުގައި ގެންދެވޭނެ ގޮތް އަޅުގަނޑުމެން ފަހިކޮށްދީފައި،" ރައީސް ވިދާޅުވި އެވެ.

ނާގޯށީގައި ރިސޯޓެއް ތަރައްގީ ކުރަން ސަރުކާރުގެ ޓޫރިޒަމް ކުންފުނި އެމްޓީޑީސީއާ ހަވާލުކުރީ ޑިސެމްބަރު 5، 2007 ގައެވެ. އެމްޓީޑީސީން އެ ރަށް ތަރައްގީ ކުރަން ހަވާލުކުރި ރަޝިޔާ ކުންފުންޏެއް ކަމަށްވާ ތްރީކޭ އިންޓަނޭޝަނަލާ އެވެ. ރިސޯޓު ހިންގައި ހުޅުވަން ވައުދުވީ 2012 އިގައެވެ.

އެ ރަށް ހަދައިން ހުޅުވަން އެމެރިކާގެ ރެޑިޝަން ކުންފުނިން ވެސް މަސަކަތް ކުރި އެވެ. އޭރު އެ ރަށަކީ ގާތްގަނޑަކަށް 100 މިލިއަން ޑޮލަރު އަގު ބޮޑު އިންވެސްޓްމަންޓެވެ. ރެޑިސަން ކުންފުންޏާ "އަތުގުޅާލައިގެން" ނާގޯށި 2015 ވަނަ އަހަރު ހުޅުވަން މަސައްކަތް ކުރި އެވެ. ނަމަވެސް އެކި ސަބަބުތަކާ ހެދި ރިސޯޓު ހުޅުވޭ ގޮތެއް ނުވި އެވެ. އެހެންވެ އެންމެ ފަހުން ރައީސް ޔާމީން އަބްދުލްގައްޔޫމްގެ ވެރިކަމުގައި އެމްޓީޑީސީއަށް ނުވިކަމަށް ބަލައި ރަށް އަތުލީ އެވެ. އެ ރަށް އެމްޓީޑީސީއަށް އަލުން ދިނީ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ޓޫރިޒަމް މިނިސްޓަރު އަލީ ވަހީދު ހުންނަވައިގެނެވެ.