އެންމެ ލަސްވެގެން ނޮވެމްބަރު މަހު ހަނިމާދޫ އެއާޕޯޓް ހުޅުވޭނެ: ރައީސް
"މިހާރު މިދާ ސްޕީޑުގަ ގެންގޮސް އަޅުގަނޑުމެން ވަރަށް އަވަހަށް ]އެއާޕޯޓް[ ނިންމާނަން. އަޅުގަނޑުމެންގެ އަމާޒަކީ އިރާދަކުރެއްވިއްޔާ އެންމެ ލަސްވެގެން ނޮވެމްބަރު މަސް ތެރޭގައި އެއާޕޯޓް ފުރިހަމައަށް ބޭނުން ކުރެވޭ ގޮތަށް ނިންމައި، ހުޅުވުން،"
ހދ. ހަނިމާދޫ އިންޓަނޭޝަނަލް އެއާޕޯޓްގެ މަސައްކަތް ނިންމާލައި، އެންމެ ލަސްވެގެން އަންނަ ނޮވެމްބަރު މަހު ހުޅުވޭނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ހދ. އަތޮޅަށް ކުރައްވާ ދަތުރުފުޅުގެ ތެރެއިން ހަނިމާދޫއަށް ވަޑައިގެން މިރޭ އެރަށު ރައްޔިތުންނާއެކު ބޭއްވި ޖަލްސާގައި ވާހަކަ ދައްކަވަމުން ރައީސް ވިދާޅުވީ ހަނިމާދޫ އެއާޕޯޓް އިންޓަނޭޝަނަލް ފެންވަރަށް ތަރައްގީ ކުރުމުގެ މަސައްކަތް ބާރު ސްޕީޑުގައި ކުރިއަށް ގެންގޮސް ނިންމާލުމަކީ އެމަނިކުފާނުގެ ރިޔާސީ ވައުދުފުޅެއް ކަމަށެވެ.
"މިހާރު މިދާ ސްޕީޑުގަ ގެންގޮސް އަޅުގަނޑުމެން ވަރަށް އަވަހަށް ]އެއާޕޯޓް[ ނިންމާނަން. އަޅުގަނޑުމެންގެ އަމާޒަކީ އިރާދަކުރެއްވިއްޔާ އެންމެ ލަސްވެގެން ނޮވެމްބަރު މަސް ތެރޭގައި އެއާޕޯޓް ފުރިހަމައަށް ބޭނުން ކުރެވޭ ގޮތަށް ނިންމައި، ހުޅުވުން،" ރައީސް ވިދާޅުވި އެވެ.
ރައީސް ވިދާޅުވީ އެއާޕޯޓް ހުޅުވާއިރު، ވެލާނާ އިންޓަނޭޝަނަލް އެއާޕޯޓެކޭ އެއްގޮތަށް، ބޭންކް އޮފް މޯލްޑިވްސް (ބީއެމްއެލް) ގެ ކައުންޓަރެއް ބަހައްޓައި، ފުރާ މީހުންނަށް ބޭންކް ރޭޓުން ޑޮލަރު ގަނެވޭނެ އިންތިޒާމް ވެސް ހަމަޖައްސައިދެއްވާނެ ކަމަށެވެ.
އޭގެ އިތުރުން، އެރަށުގައި ޕާސްޕޯޓްގެ ހިދުމަތް ދިނުމާއި އައިޑީކާޑު ޕްރިންޓް ކުރުމުގެ ހިދުމަތް ވެސް ގާއިމްކޮށްދެއްވާނެ ކަމަށް ރައީސް ވިދާޅުވި އެވެ.
"އިރާދަކުރެއްވިއްޔާ ކައުންސިލާ ހޯމް މިނިސްޓްރީއާ ގުޅިގެން، އެޖާގަ ކައުންސިލުން ހަމަޖައްސައިދިންހާ އަވަހަކަށް އިރާދަކުރެއްވިއްޔާ މި އެއާޕޯޓް އަޅުގަނޑުމެން އިންޓަނޭޝަނަލް ފެންވަރުގަ ނޮވެމްބަރު މަހުގެ ތެރޭގައި މި ހުޅުވަން މަސައްކަތް ކުރާ ޓާގެޓަށް ހުޅުވިގެންދާއިރު މިރަށުގައި އައިޑީކާޑާ ޕާސްޕޯޓްގެ ހިދުމަތް ވެސް ދޭން ފަށާނަން،" ރައީސް ވިދާޅުވި އެވެ.
ރައީސް ވިދާޅުވީ މިކަންކަން ނިމުމުން ހަނިމާދޫ ރައްޔިތުންނަށާއި އަދި އެރަށަށް ހިދުމަތް ހޯދަން އަންނަ ފަރާތްތަކަށް ވެސް ވަރަށް ބޮޑު ފަސޭހައެއް ވެގެންދާނެ ކަމަށެވެ.
މި ޖަލްސާގައި ވާހަކަ ދައްކަވަމުން ރައީސް އިތުރަށް ވިދާޅުވީ، އެރަށުގައި އަންނަ އަހަރު ޑޮލަރު އެޓީއެމްއަކާއި، ބީއެމްއެލްގެ އިތުރު އޭޓީއެމްއެއް ވެސް ބަހައްޓަވައިދެއްވާނެ ކަމަށެވެ. އަދި، އިސްލާމިކް ބޭންކްގެ އޭޓީއެމްއެއް ވެސް ބަހައްޓަވައިދެއްވާނެ ކަމަށެވެ.
އޭގެ ސަބަބުން ހާއްސަ ގޮތެއްގައި ލޯކަލް ޓޫރިޒަމްގެ ވިޔަފާރި ކުރާ ފަރާތްތަކަށް ވަރަށް ފަސޭހަވެގެންދާނެ ކަމަށް ރައީސް ވިދާޅުވި އެވެ.
ކޮމެންޓް
Republic of Maldives