އަންދާޒާ ކުރި ވަރަށްވުރެ އަވަހަށް ކަރަންޓުގެ މަސައްކަތް ނިންމާލައިފި

ހުޅުމާލޭގައި ހުންނަ 50 މެގަވޮޓް އިންޖީނުގޭގައި ކޮންމެހެން ކުރަން ޖެހޭ މުހިންމު މަސައްކަތެއް ކުރުމަށް މިއަދު ހެނދުނު ބައެއް ސަރަހައްދުތަކުން ކަރަންޓު ކެނޑުމަށްފަހު އަންދާޒާ ކުރި ވަގުތަށްވުރެ އަވަހަށް މަސައްކަތް ނިންމާލައިފި އެވެ.

ސްޓެލްކޯގެ މެނޭޖިން ޑިރެކްޓާ ހުސެއިން ފަހުމީ މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ އެ އިންޖީނުގައި ކުރި މޭޖާ މެއިންޓެނެންސްގެ މަސައްކަތް މިއަދު ހެނދުނު 8:43 ގައި ނިންމާލާފައިވާ ކަމަށެވެ. 

ރޭ ސްޓެލްކޯ އިން ބުނެފައި ވަނީ ހެނދުނު 6-10 އަށް މަސައްކަރް ކުރިއަށް ދާނެ ކަމަށެވެ. އިންޖީނުގެ ނިއްވާލުމުން މާލެ އަދި ހުޅުމާލޭގެ ބައެއް ސަރަހައްދުތަކުން ކަރަންޓު ކެނޑޭނެކަން ވެސް ވަނީ އަންގާފަ އެވެ.

"މަސައްކަތް ނިމޭނެކަމަށް ކުރިން ލަފާކުރެވިފައިވާ 10:00 ގެ ކުރިން މި މަސައްކަތް ނިންމާލައި، ހުރިހާ ކަސްޓަމަރުންނަށް އަލުން ކަރަންޓު ދެވިފައިމިވަނީ ސްޓެލްކޯގެ ހިދުމަތްތެރި އިންޖީނިއަރުންނާއި ޓެކްނީޝަނުންގެ ޤާބިލްކަމާއި ހީވާގިކަމުން،" ފަހުމީ ވިދާޅުވި އެވެ.

ފަހުމީ ވަނީ އެ ޓީމުގެ މަސައްކަތުގެ އަހުލާގާއި، މަސައްކަތަށް އޮންނަ ލޯބާއި އަދި ރައްޔިތުންނަށާއި ގައުމަށް ހިދުމަތް ކުރުމުގެ ރޫހު، އެ މުވައްޒަފުންގެ ކިބައިގައި ހުރިކަން ފާހަގަކުރައްވާފަ އެވެ.

"އެހެންކަމުން މި މަސައްކަތުގައި ބައިވެރިވި މުޅި ޓީމަށް އައްސަރިބަހާއި ސާބަސް ދަންނަވަން. އަދި މިފަދަ ކޮންމެ ދަނޑިވަޅެއްގައި ގްރޭޓާ މާލެ ސަރަޙައްދުގެ ކަސްޓަމަރުންގެ ފަރާތުން އަޅުގަނޑުމެންނަށް ލިބެމުންދާ އެއްބާރުލުން ފާހަގަކޮށް އެންމެހާ ކަސްޓަމަރުންނަށް އިހުލާސްތެރިކަމާއެކު ޝުކުރު ދަންނަވަން،" އޭނާ ވިދާޅުވި އެވެ.

ބޮޑުބަޔަކުން ކަރަންޓު ނުކަނޑައި، އަންދާޒާ ކުރި ވަރަށްވުރެ ވެސް އަވަހަށް މަސައްކަތް ވަނީ ނިންމާލާފަ އެވެ.