ހުޅުމާލެ އިންޖީނުގެ ނިއްވާލި ފުރަތަމަ ދުވަސް | އިންޖީނު ގޭގައި އެއް ގަޑިއިރު

ދުރާލާ ރާވައިގެން ހުޅުމާލެ އިންޖީނު ގޭގައި މެއިންޓަނަންސްއެއް އޮންނަކަމަށް ކަރަންޓު ކުންފުނި، ސްޓެލްކޯ އިން އިއްޔެ އިއުލާނުކުރި އެވެ. މިއީ 2016 ވަނަ އަހަރު ބަހައްޓައި 2019 ވަނަ އަހަރު - ހިދުމަތް ފެށި - ރޯކުރި 70 މިލިއަން ޑޮލަރުގެ އަގު ބޮޑު އިންޖީނުތައް ނިންވާލާ ފުރަތަމަ ފަހަރެވެ. ކަރަންޓުގެ ލޯޑު މައްޗަށް ގޮސް އިންތިހާއަށް މަތިވެފައިވާ މާލެ ސަރަހައްދުގައި ހިންގި "ފަސްވަނަ ކަރަންޓު" މަޝްރޫއުގެ މި އިންޖީނުތައް މީގެ ކުރިން މަރާމާތަކަށް ނިވާލާފައެއް ނުވެ އެވެ. އެހެންވެ މިއަދަކީ ހާއްސަ ދުވަހެކެވެ. މިއަދުގެ މިދިޔަ ދެ ގަޑިއިރެއްހާއިރު ތެރޭގައި ހުޅުމާލެ މައި އިންޖީނުގެ ކައިރިން ދިޔަ ކޮންމެ މީހަކަށް ވެސް އިހުސާސް ކުރެވުނީ ކުރިން މި ތަނުންދާއިރު ބިމުން އިހުސާސްވާ ގުޑުމާއި މުޅިތަނުގައި ފެތުރިފައި އޮންނަ ގަދަ އަޑުފައްގަނޑު ނެތްކަމެވެ. މުޅި މި ސަރަަހައްދު ހިމޭންވެފައި އޮތްނަމަވެސް މި އިންޖީނުގޭގެ އެތެރޭގެ ގިނަ މަސައްކަތްތަކެއް ކުރަމުން ދިޔަ އެވެ. އިންޖީނު ގޭގެ އެތެރޭގައި ރޭ ފަތިހުން ފެށިގެ ރާއްޖޭގައި ތިބި އެންމެ މޮޅެތި އިންޖިނޭރުން އެ މަސައްކަތް ކުރަމުން ދިޔައީ ޝެޑިއުލްކޮށް އިންޖީނުތައް ނިއްވާލުމަށްފަހު ވަކި ގަޑިއަކަށް އިންޖީނުތައް އަލުން ހިންގާށެވެ. އަނެއްހެން ބުނާނަމަ ޓައިމަށް އިންޖީނުތައް ރޯކުރާށެވެ. 

އިންޖީނުގެ އަށް ވަނުމުގެ ކުރިން ޖެހޭ ޓީވީތަކާއި ސްކްރީންތައް ހުންނަ ކޮންޓްރޯލް ރޯމްއާ ހަމައަށް ދިޔަތަނުން ޓީޝާޓުގެ ގިރުވާނުގައި ޓޯކީއެއް ހަރުކޮށްގެން އިންޖީނު ރޫމުން އެ ނުކުންނެވީ ސްޓެލްކޯގެ ޗީފް އިލެކްޓްރިކް އިންޖިނަރު އިސްމާއިލް ނިޝާރު އެވެ. 

"މިއަދު އިންޓަވިއު ދެވޭނެ. އިންޖީނުގެ އަޑެއް ނުހުންނާނެ. އެމްޑީ ވެސް އެބަ އުޅުއްވާ،" އެންމެންނާ ވެސް ގުޅިގެން އުޅުއްވާ ތަޖުރިބާކާރު އިންޖިނޭރު އަހަރެންނާ އިޝާރާތްކޮށް ވިދާޅުވި އެވެ. 

އިރުކޮޅެއް ފަހުން އެތެރެއަށް ވަދެވަޑައިގަތީ ސްޓެލްކޯގެ އެންމެ އެތެރެ ފުރިހަމައަށް ދެނެވަޑައިގެން ހުންނެވި މިހާރުގެ އެމްޑީ ހުސެއިން ފަހުމީ އެވެ. ފަހުމީ ވަޑައިގެން އަތުން އިޝާރާތް ކުރައްވައި އެތަނުގައި އިން ގޮނޑިއެއް ދައްކާލި އެވެ. 

އިންޖީނުގެ ކޮންޓްރޯލް އާއި ހުރިހާ މަންޒަރުތަކެއް ފެންނަ ބޮޑު އިސްކްރީނުގެ ހުންނަ ބޮޑު މޭޒުގެ ކޮޅުގައި އިން އެ ގޮނޑިއަކީ މިފަދަ ކޮންމެ ހާލެއްގައި އެމްޑީ އިންނަވާ ގޮނޑިކޮޅެވެ. ކަރަންޓުގެ މަސައްކަތް ކުރާ ކޮންމެ ފަހަރަކު އެމްޑީ އިންނަވާނީ އެ ގޮނޑިކޮޅުގަ އެވެ. އެ ގޮނޑީގައި އިންނަވާއިރު އިރޮޅަކަކާ ފާރުގައި އިންނަ ބިއްލޫރި ދޮރުން އިންޖީނުގެ އެތެރޭގެ މަސައްކަތް ހިންގާ ގޮތް ބަލަވަލާފަ އެވެ.

"އަޅުގަނޑު އިންނަނީ މި ގޮނޑީގަ. އިންޖިނޭރުންގެ މަސައްކަތަށް ގޮތް ކިޔައެއް ނުހަދަން. އެ ބޭފުޅުންނަކީ މިކަމުގެ އެކްސްޕާޓުން. އިންޖިނޭރުންނަށް ފުރިހަމަ އިތުބާރު އޮވޭ،" ސްޓެލްކޯގައި މަސައްކަތް ކުރައްވާތާ 27 އަހަރުވެފައިވާ ފަހުމީ ވިދާޅުވި އެވެ. 

އެމްޑީ ފަހުމީ ދެން އަހަރެންނަށް އިޝާރާތް ކޮށްލީ އިންޖީނުތައް ހުންނަ ބަޔަކަށް ދިއުމަށެވެ. މިއަދަކީ މި އިންޖީނުގޭގެ ތާރީހުގައި ވެސް މިގޮތަށް ރޭވިގެން ކަރަންޓު ކަނޑާލައި މެއިންޓަނަންސް ކުރިއަށް ދިޔަ ފުރަތަމަ ދުވަހެވެ. އެހެންވެ އަހަރެން މިތަނަނަށް ވަންނަން ފުރުސަތު ލިބުމަކީ ނޫސްވެރިއެއްގެ ގޮތުން ހާއްސަ ކަމެކެވެ. 

އިންޖީނު ގޭގެ އެތެރެއަށް ވަނުމާއެކު މި އިންޖިނޭރުން ގައުމަށްޓަކައި ކުރާ ބުރަ މަސައްކަތުގެ ކުޑަ މިންވަރެއް އިހުސާސްވި އެވެ. އިންޖީނުގެ ބޭރުގައި މިއަދު ހެނދުނު 29 ޑިގްރީގެ ހޫނުކަމެއް ޖައްވުގައި ހުއްޓަސް އެތެރޭގެ ހޫނުގެ އިހުސާސް ހުރީ އާއްމުކޮށް ރާއްޖޭގެ މޫސުމަށްވުރެ އެތައް ގުނައެއް ހޫނުކޮށެވެ. އެގްޒޯސްޓް ފަންކާތައް ޖެއްސިނަމަވެސް މުވައްޒަފުންގެ މޫނުމަތިން ފެންނަނަމުން ދިޔައީ މި ހޫނުގައި އެ މުވައްޒަފުން މަސައްކަތް ކުރުމުން ކުރާ އަސަރެވެ. ފަތިހު މުނާޖާ ގޮނޑު އަޅައިގެން އެ މުވައްޒަފުން އައިސް އެތިބީ ގައުމީ ހިދުމަތުގަ އެވެ.

އިންޖީނުތައް ނިވާލުމުން އަރާ އާތްވާއި ގަދަ ހޫނުގައި އެ އިންޖިނޭރުން ގަދަ އަށް މަސައްކަތް ކުރަމުން އެދަނީ އެ މީހުންނަށ މިއަދު ދިން ޓާސްކް ފުރިހަމަ ކޮށްފަ އެވެ. މިޝަން ކާމިޔާބު ކޮށްފަ އެވެ. މިއަދު ހެނދުނު 7:00 ޖެހުއިރު 50 މެގަވޮޓުގެ މި އިންޖީނުތައް ނިއްވާލުމާއެކު މާލެ އިން ކަރަންޓު ކަނޑަން ޖެހުމެވެ. 

އެމްޑީ ފަހުމީ ވިދާޅުވީ ހުޅުމާލޭ 50 މެގަވޮޓް އިންޖީނުގެ ނިއްވާލައިގެން މިއަދު ކުރެވުނު މޭޖަރު މެއިންޓަނަންސް މަސައްކަތް މިއަދު ހެނދުނު 08:43 ގައި ވަނީ ކާމިޔާބުކަމާއެކު ނިންމާލާފަ އެވެ.

"މަސައްކަތް ނިމޭނެކަމަށް ކުރިން ލަފާކުރެވިފައިވާ 10:00 ގެ ކުރިން މި މަސައްކަތް ނިންމާލައި، ހުރިހާ ކަސްޓަމަރުންނަށް އަލުން ކަރަންޓު ދެވިފައިމިވަނީ ސްޓެލްކޯގެ ހިދުމަތްތެރި އިންޖީނިއަރުންނާއި ޓެކްނީޝަނުންގެ ޤާބިލްކަމާއި ހީވާގިކަމުން. މީގެ އިތުރުން މަސައްކަތުގެ އަޚުލާޤާއި، އެ މަސައްކަތަށް އޮންނަ ލޯތްބާއި ރައްޔިތުންނަށާއި ޤައުމަށް ޚިދުމަތްކުރުމުގެ މަތިވެރި ރޫޙު އެމުވައްޒަފުން ކިބައިގައި ހުރުމުން،" ފަހުމީ ވިދާޅުވި އެވެ.

އެމްޑީ ފަހުމީ ވިދާޅުވީ މި މަސައްކަތުގައި ބައިވެރިވި މުޅި ޓީމަށް އައްސަރިބަހާއި ސާބަސް ދަންނަވަ އެވެ.
 
"މިފަދަ ކޮންމެ ދަނޑިވަޅެއްގައި ގްރޭޓަރ މާލެ ސަރަޙައްދުގެ ކަސްޓަމަރުންގެ ފަރާތުން އަޅުގަނޑުމެންނަށް ލިބެމުންދާ އެއްބާރުލުން ފާހަގަކޮށް އެންމެހާ ކަސްޓަމަރުންނަށް އިޚްލާސްތެރިކަމާއެކު ޝުކުރު ދަންނަވަން،" ފަހުމީ ވިދާޅުވި އެވެ. 

މިއަދަކީ ހާއްސަ ދުވަހެވެ. މުވައްޒަފުން ބުރަ މަސައްކަތާއެކު އެ ނިންމާލީ ގައުމީ ބޮޑު މަސައްކަތެކެވެ. އެ މަސައްކަތް ކުރަމުން ދިޔައިރު އެ މުވައްޒަފުންގެ މަސައްކަތް ހަމަލޮލުން ބަލައި ވަޒަންކޮށްލަން ލިބުމަކީ ހާއްސަ ކަމެކެވެ.