ހުޅުމާލެ އިންޖީނު ނިންވާލައި ބޮޑު މަސައްކަތް ފަށައިފި

ގްރޭޓާމާލެ ސަރަހައްދުގެ ކަރަންޓުދޭ އެންމެ މުހިންމު އެއް ޖަނަރޭޓަރު ކަމަށްވާ ހުޅުމާލެ 50 މެގަވޮޓުގެ ޖަނަރޭޓަރު ނިންވާލައި ސްޓެލްކޯއިން މަރާމާތުގެ މަސައްކަތް ފަށައިފި އެވެ. 

މާލެ އާއި ރާއްޖޭގެ 35 ރަށަށް ކަރަންޓުގެ ހިދުމަތް ދޭ ކުންފުނި ސްޓެލްކޯއިން އިންޖީނު މަރާމާތުގެ މަސައްކަތް ފަށާފައިވަނީ މިއަދު ހެނދުނު 6:00 އިން ފެށިންނެ. މި މަަސައްކަތް ފެށުމުގެ ގޮތުން ވަނީ ހުޅުމާލެ 50 މެގަވޮޓުގެ އިންޖީނުގެ ނިއްވާލާފަ އެވެ. 

އެ ކުންފުނިން އެންމެފަހުން ބުނީ ހުޅުމާލޭ އިންޖީނުގޭގައި މިވަގުތު ކުރެވެމުންދާ މޭޖަރ މަސައްކަތާއި ގުޅިގެން ލޯޑް ޝެޑިން ކުރިއަށްދާއިރު، މާލެއާއި ހުޅުމާލޭގެ ލޯޑް ޑިމާންޑަށް ބަލައި ޖުމްލަ 17 ސަބްސްޓޭޝަނެއް މިވަގުތު ވަނީ ނިއްވާލެވިފައިފަ އެވެ. މިއީ މާލޭގެ %14.7 އަދި ހުޅުމާލޭގެ %5.8 ކަސްޓަމަރުނެވެ.

"މިހިދުމަތް މެދުކެނޑިފައިވާ ކަސްޓަމަރުންނަށް ހިދުމަތް މެދު ކެނޑޭތާ ގަޑިއެއްހާއިރު ތެރޭ އަލުން ހިދުމަތް ދެވިގެންދާން. ދިމާވާނެ ދަތިތަކަށް މަޢާފަށް އެދެން،" ސްޓެލްކޯއިން ބުނެފައިވެ އެވެ. 

ސްޓެލްކޯ އިން ބުނީ އެ އިންޖީނުގޭގައި ކުރާ އެ މަސައްކަތަކީ އެ ކުންފުނިން މާލެ ސަރަހައްދުގެ ރައްޔިތުންނަށް ދެމުންދާ ހިދުމަތް އިތުރަށް ހަރުދަނާކޮށް، މެދުކެނޑުމެއްނެތި އެ ހިދުމަތް ފޯރުކޮށްދިނުމަށްޓަކައި ކޮންމެހެން ކުރަން ޖެހޭ މަސައްކަތެއް ކަމަށެވެ.