ހުޅުމާލޭ އިންޖީނުގޭގެ މަސައްކަތެއް ކުރަން މާދަމާ ކަރަންޓު ކަނޑަނީ

ހުޅުމާލޭގައި ހުންނަ 50 މެގަވޮޓް އިންޖީނުގޭގައި ކޮންމެހެން ކުރަން ޖެހޭ މުހިންމު މަސައްކަތެއް ކުރުމަށް މާދާމާ ހެނދުނު ހުޅުމާލެ އާއި މާލޭގެ ބައެއް ސަރަހައްދުތަކުން ކަރަންޓު ކަނޑާލާނެ ކަމަށް ސްޓެލްކޯ އިން ބުނެފި އެވެ.

ސްޓެލްކޯ އިން ބުނީ އެ އިންޖީނުގޭގައި ކުރާ އެ މަސައްކަތަކީ އެ ކުންފުނިން މާލެ ސަރަހައްދުގެ ރައްޔިތުންނަށް ދެމުންދާ ހިދުމަތް އިތުރަށް ހަރުދަނާކޮށް، މެދުކެނޑުމެއްނެތި އެ ހިދުމަތް ފޯރުކޮށްދިނުމަށްޓަކައި ކޮންމެހެން ކުރަން ޖެހޭ މަސައްކަތެއް ކަމަށެވެ.

އެހެންކަމުން މާދަމާ ހެނދުނު 6:00 އިން 10:00 އަށް ހުޅުމާލޭގެ 50 މެގަވޮޓްގެ އިންޖީނުގެ ނިއްވާލުމަށް ނިންމާފައިވާ ކަމަށް ސްޓެލްކޯ އިން ބުންޏެވެ. އެ މަސައްކަތް ކުރަމުންދާ ވަގުތު މާލެ އާއި ހުޅުމާލޭގެ ބައެއް ސަރަހައްދުތަކުން، ކޮންމެ ސަރަހައްދަކުން އެއް ގަޑިއިރަށް ކަރަންޓުގެ ހިދުމަތް މެދުކެނޑޭނެ އެވެ.

"މިގޮތަށް ލޯޑް ޝެޑް ނުވަތަ ކަރަންޓު ކެނޑުމުގެ ކުރިން އެސްއެމްއެސް މެދުވެރިކޮށް ކަސްޓަމަރުންނަށް ކަރަންޓު މެދުކެނޑޭނެ ވަގުތުތަކާއި ސަރަހައްދުތައް ދުރާލާ އަންގާނެ،" ސްޓެލްކޯ އިން ބުންޏެވެ.

ނަމަވެސް ހިދުމަތް މެދުކެނޑޭ ސަރަހައްދުތަކުގައި ހުންނަ ހޮސްޕިޓަލްތަކާއި އަދި އެހެނިހެން މުހިންމު، ކްރިޓިކަލް ހިދުމަތްދޭ މުއައްސަސާތަކުން ކަރަންޓު ނުކަނޑާނެ ކަމަށް ސްޓެލްކޯ އިން ވަނީ ބުނެފަ އެވެ.

ޓެކްނިކަލް މައްސަލައެއް ދިމާވެ ދާދި ފަހުން ދެފަހަރަކު ވަނީ މުޅި މާލެ ސަރަހައްދުން ކަރަންޓު ކެނޑިފަ އެވެ. އެފަދަ މައްސަލަތައް ތަކުރާރުވިޔަ ނުދިނުމަށް ފިޔަވަޅުތައް އަޅަމުންދާ ކަމަށް ސްޓެލްކޯ އިން ކުރިން ބުނެފައިވެ އެވެ.