އެ މަޝްރޫއުތައް އަވަސް ކުރަން ބޭނުން ކުރަން ނިންމާފައި ވަނީ 45،000 ޓަނުގެ ދެ ހޮޕާ ޑްރެޖަރާއި 11،000 ޓަނުގެ ހޮޕާ ޑްރެޖަރެކެވެ.
މާލެ ސަރަހައްދުގައި ހިންގާ ބިން ހިއްކުމުގެ މަޝްރޫއުތައް އަވަސް ކުރަން އިތުރު ޑްރެޖަރުގެ ބޭނުން ހިފަން ނިންމާފައިވާ ކަމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ބުނެފި އެވެ.
އެޗްޑީސީން ބުނީ ސަރުކާރުގެ އެންމެ މުހިންމު ވައުދު ކަމަށްވާ ބޯހިޔާވަހިކަމުގެ މައްސަލައަށް ހައްލު ގެނައުމުގެ ވައުދު ފުއްދުމަށް ހުޅުމާލެ ފޭސް 3، ގުޅިފަޅި، ގިރާވަރުފަޅު އަދި އުތުރުތިލަފަޅުގެ ބިން ހިއްކުމަށް އަންނަ މަހު އިތުރު ތިން ޑްރެޖަރުގެ ބޭނުން ހިފުމަށް ހަމަޖެހިފައިވާ ކަމަށެވެ.
އެ މަޝްރޫއުތައް އަވަސް ކުރަން ބޭނުން ކުރަން ނިންމާފައި ވަނީ 45،000 ޓަނުގެ ދެ ހޮޕާ ޑްރެޖަރާއި 11،000 ޓަނުގެ ހޮޕާ ޑްރެޖަރެކެވެ.
އެޗްޑީސީން ބުނީ މި މަސައްކަތްތައް ހުއްޓުމެއް ނެތި ވީހާވެސް ހަލުވިކަމާއެކު ކުރިއަށް ގެންދިއުމަށް، މަސައްކަތުގެ ތެރެއިން ދިމާވެދާނެ އިތުރު ގޮންޖެހުންތައް ކުރިއާލާ ދެނެގަނެ، އެކަންކަން ހައްލުކުރުމަށްޓަކައި ކަމާ ގުޅުންހުރި ފަރާތްތަކާއެކު މަސައްކަތް ކުރަމުންދާ ކަމަށެވެ.
މީގެ އިތުރުން އެޗްޑީސީން ދަނީ ރަސްމާލެ ހިއްކުމުގެ މަސައްކަތް ވެސް ކުރަމުންނެވެ. ފުށިދިއްގަރުފަޅުން ހިއްކާ ރަސްމާލެ އަކީ މާލެ ސަރަހައްދުގައި ހިއްކާ އެންމެ ބޮޑު ބިމެވެ.