ޖަޕާނުގެ މަކިޓާ އާއި ރާއްޖޭގެ އެސްޓީއޯގެ ގުޅުމަށް 25 އަހަރު

ދުނިޔެ އެންމެ އިތުބާރުކުރާ ޓޫލްގެ އެއް ބްރޭންޑް ކަމަށްވާ ޖަޕާނުގެ މަކިޓާ ކުންފުނިން ރާއްޖޭގެ އެސްޓީއޯއާ ގުޅުނީ މީގެ 25 އަހަރު ކުރިންނެވެ. އެ ގުޅުމާއެކު ރާއްޖޭގެ ބާޒާރަށް ޖަޕާނުގެ މި މޮޅު އުފެއްދުމުގެ އޮރިޖިނަލް ތައާރަފުވި އެވެ. މި ގުޅުމަށް މި އަހަރަށް 25 އަހަރު ފުރުން މިވަނީ ކުލަގަދަކޮށް ފާހަގަކޮށްފަ އެވެ.

މަކިޓާ- އެސްޓީއޯގެ ގުޅުމަށް 25 އަހަރު ފުރުން ފާހަގަ ކުރަން ރޭ ވަނީ ކުރުނބާ މޯލްޑިވްސްގައި ކުލަގަދަ ހަފުލާއެއްވެސް ބާއްވާފަ އެވެ. މި އިވެންޓް ޝަރަފްވެރި ކޮށްދެއްވީ ޖަޕާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު އިޝިގާމީ ރުމިކޯ އެވެ. މި އިވެންޓުގައި އެސްޓީއޯގެ އެމްޑީ އަދި ސީއީއޯ ޝިމާދު އިބްރާހިމް އަދި މަކިޓާގެ ފަރާތުން މަކިޓާގެ ޑިރެކްޓަރު ކޯޕަރޭޓް އޮފިސަރު ބައިނަލްއަގުވާމީ ސޭލްސް ހެޑްކުއާޓާ އޮމޮޓޭ ޓަކާޝީ ވެސް ބައިވެރިވެ ވަޑައިގަތެވެ.

މި ހަފްލާގައި މަކިޓާގެ އައު ޓޫލްސްތައް ތައާރަފް ކޮށް، ހާއްސަ އެކްސްޕީރިއަންސް ޒޯނެއްގައި ބައެއް ޓޫލްތައް ބޭނުން ކުރެވޭ ގޮތް ހަފްލާގެ ބައިވެރިންނަށް ވަނީ ދައްކާލާފައިވެ އެވެ. މީގެ އިތުރުން އެސްޓީއޯ ކޮންސްޓްރަކްޝަންސް ސޮލޮއުޝަންސްގެ ޑިރެކްޓަރު މުހައްމަދު އީމާން ވަނީ އެސްޓީއޯއާއި މަކިޓާގެ 25 އަހަރުވީ ގާތް ގުޅުމަށް އަލިއަޅުވާލާ، ކަސްޓަމަރުންނަށް ހާއްސަ ޝުކުރެއް ދަންނަވާފައެވެ. ހަމަ އެއާއެކު އެސްޓީއޯ މަކިޓާ އިން އެންމެ ގިނައިން ވިޔަފާރި ކުރި ކަސްޓަމަރުންނަށާއި އެސްޓީއޯ މަކިޓާއާއި ގާތް ގުޅުމެއް ބާއްވަމުން ގެންދާ ކަސްޓަމަރުންގެ އަގު ވަޒަން ކުރުމުގެ ގޮތުން ހަނދާނީ ފިލައެއް މި ހަފްލާގައި ވަނީ އަރުވާފައިވެ އެވެ. އޭގެ ތެރޭގައި އެމްއޭސީއެލް އާއި އެޗްޑީސީ އަދި ސްޓެލްކޯ އާއި އެމްޕީއެލް އަދި އެމްޓީސީސީގެ އިތުރުން އެމްއެންޑީއެފްއާއި ޔުނިވާސަލް ހޯކްސް ޕްރައިވެޓް ލިމިޓެޑުގެ އިތުރުން އަލިއާ ކޮންސްޓްރަކްޝަންސް ޕްރައިވެޓް ލިމިޓެޑް އަދި އެސްޖޭ ކޮންސްޓްރަކްޝަންސް ޕްރައިވެޓް ލިމިޓެޑް ފަދަ ފަރާތްތަށް ހިމެނެ އެވެ.

މި ހަފްލާ ނިންމާލުމުގެ ގޮތުން، މަކިޓާގެ ޑިރެކްޓަރު ކޯޕަރޭޓް އޮފިސަރު ބައިނަލްއަގުވާމީ ސޭލްސް ހެޑްކުއާޓަރު އޮމޮޓޭ ޓަކާޝީ އަދި ޖަޕާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު އިޝިގާމީ ރުމިކޯ ވަނީ ވާހަކަފުޅު ދައްކަވާފަ އެވެ. އެބޭފުޅުން ވަނީ މަކިޓާއާއި އެސްޓީއޯ އާއި ދެމެދު އޮތް ގުޅުން ފާހަގަކޮށް އޭގެ ސަބަބުން ރާއްޖޭގެ އިމާރާތް ކުރުމުގެ ސިނާއަތަށް އަންނަމުންދާ ހެޔޮ ބަދަލުތައް ފާހަގަކޮށް އެކަމަށް މަރުހަބާ ވިދާޅުވެ ފައެވެ. ހަމަ އެއާއި އެކު މަކިޓާއާއި އެސްޓީއޯގެ ޕަރޓްނާޝިޕްގެ ސަބަބުން ޖަޕާނާއި ރާއްޖެއާއި ދެމެދު އޮންނަ ގުޅުމަށް ކޮށްފައިވާ ހެޔޮ ބަދަލު ތައް ސަފީރު ފާހަގަ ކުރެއްވިއެވެ.