އަބްދުއްރަހްމާންގެ މަރު: ހައްޔަރުކުރި ތިން މީހުންނަށް ބަންދު ޖަހައި ވަނަވަރު ހާމަކޮށްފި

އަބްދުއްރަހުމާނަށް ހަމަލާދިން ސީދާ ސަބަބެއް އަދި ރަސްމީކޮށް ހާމަކޮށްފައިނުވިޔަސް، މި ހަމަލާގެ ފަހަތުގައި އަބްދުއްރަހުމާނު ސިހުރު ހަދާކަމަށް ކުރެވޭ ތުހުމަތުތަކާ ގުޅުމެއްވާ ކަމަށްވެ އެވެ.

އަބްދުއްރަހުމާންގެ މަރުގެ މައްސަލައިގެ ތުހުމަތަށް ހައްޔަރުކުރި ތިން މީޙުން (ކ-ވ) ފާރިސް، އާޝިދު އަދި ވިސާމް. --ފޮޓޯ: މިހާރު

އއ. މާޅޮހުގައި މިދިޔަ ޖުލައި މަހުގެ 13 ވަނަ ދުވަހުގެ ރޭ ދަންވަރު ބޮޑެތި ޒަހަމްތަކެއް ލިބުމުގެ ސަބަބުން އުމުރުން 65 އަހަރުގެ އެ ރަށު، އޯކިޑްމާގޭ އަބްދުލްރަހްމާން އާދަމް މަރުވި މައްސަލައިގައި ހައްޔަރުކުރި ތިން މީހުންގެ ވަނަވަރު ފުލުހުން އާންމުކޮށްފި އެވެ.

އަބްދުއްރަހުމާން މަރާލި މައްސަލައިގެ ތުހުމަތަށް އިއްޔެ ހައްޔަރުކޮށްފައިވަނީ، މުހައްމަދު ވިޝާމް، 22 އަހަރު (ލިލީފެހި، މާޅޮސް) އާއި އަހުމަދު ފާރިސް، 27 އަހަރު (ފިނިވާގެ، މާޅޮސް) އަދި އަހުމަދު އާޝިދު، 27 އަހަރު (ފިޔަ، މާޅޮސް) ކަމަށް ފުލުހުން ރޭ ބުންޏެވެ.

އަދި އެ މީހުންގެ ބަންދާ މެދު ގޮތެއް ނިންމުމަށް އިއްޔެ ކޯޓަށް ހާޒިރުކުރުމުން، އޭގެ ތެރެއިން ވިޝާމް އާއި ފާރިސް ޝަރީއަތް ނިމެންދެން ބަންދުގައި ބަހައްޓަން ކޯޓުން އަމުރުކުރި ކަމަށް ފުލުހުން ބުންޏެވެ. އާޝިދުގެ ބަންދު ކުރީ ފަސް ދުވަހެވެ.

އެނގިފައިވާ ގޮތުގައި، ވަރަށް އެކުގައި އުޅޭ މި ތިން މީހުންނަށް ފުލުހުންގެ ތަހުގީގު އެނބުރުނީ، އަބްދުއްރަހުމާން މަރައިލިކަން އާންމުންނަށް އެނގުމުގެ މާކުރިން، އޭނާގެ ދަރިއަކަށް ގުޅައި، ކަމެއް ވެގެން އުޅޭތޯ ސާފުކުރަން އުޅުނުކަން ހާމަވުމުންނެވެ.

އަބްދުއްރަހުމާނަށް ހަމަލާދިން ސީދާ ސަބަބެއް އަދި ރަސްމީކޮށް ހާމަކޮށްފައިނުވިޔަސް، މި ހަމަލާގެ ފަހަތުގައި އަބްދުއްރަހުމާނު ސިހުރު ހަދާކަމަށް ކުރެވޭ ތުހުމަތުތަކާ ގުޅުމެއްވާ ކަމަށްވެ އެވެ.

ނަމަވެސް، އަބްދުއްރަހުމާނު ސިހުރު ހަދާކަމުގެ ތުހުމަތުތައް އޭނާގެ އާއިލާއިން ވަނީ ތަކުރާރުކޮށް ދޮގުކޮށްފަ އެވެ. 

އަބްދުލްރަހްމާނަށް ވަނީ ނިދާފައި އޮއްވާ ބޮޑެތި ޒަހަމްތަކެއް ދީފަ އެވެ. އޭނާގެ ބޮލުގައި މަރުތޭލު ޒާތުގެ އެއްޗަކުން ޖަހައި ބޯ ވަނީ ޗިސްކޮށްލައިފަ އެވެ. އޭނާ މަރުވެފައި ވަނީ ފަރުވާ ދިނުމަށް އެރަށު ސިއްހީ މަރުކަޒަށް ގެންގޮސްފައި ވަނިކޮށް އެރޭ ދަންވަރުގެ ވަގުތެއްގަ އެވެ.

އޭނާ މަރުވި ސީދާ ސަބަބު ދެނެގަތުމަށް އިންޑިއާގެ ތިރުވަނަންތަޕޫރަމްއަށް ގެންގޮސް ވަނީ އޮޓޮޕްސީ ހަދައިފަ އެވެ. ފުލުހުން މިއަދު ބުނީ އަބްދުއްރަހްމާން މަރުވީ ބޮލަށް ލިބުނު އަނިޔާގެ ސަބަބުން ކަމަށް އޮޓޮޕްސީ ރިޕޯޓުން ހާމަވާ ކަމަށެވެ.

އޮޓޮޕްސީއަށް ފަހު އޭނާގެ ހަށިގަނޑު ވަޅުލާފައި ވަނީ މިމަހުގެ 24 ވަނަ ދުވަހު އެވެ.

ކޮމެންޓް

0
450

މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ

Newsroom
Phone: 7819333
Email: news@themirror.mv
Marketing
Phone: 7399333
Email: marketing@themirror.mv
H. Fairlin, Bodu thakurufaanu magu, Male
Republic of Maldives
© 2025 Mi. All rights reserved.