މި އަހަރު ސަރުކާރުން ތިން ލޯނެއް | ނެގީ މަސްވެރިކަމާއި ވީއައިއޭއަށް

މި އަހަރު ސަރުކާރުން ތިން ލޯނެއް ނަގާގައިވާއިރު މި ލޯނުތައް ނަގާފައިވަނީ މަސްވެރިކަމާއި ވެލާނާ އިންޓަނޭޝަނަލް އެއާޕޯޓް (ވީއައިއޭ) ނިންމާށެވެ. 

ދައުލަތުން ނަގާފައިވާ ލޯނުތަކުގެ މައުލޫމާތުތައް ދައްކާ ގޮތުން ސަރުކާރުން މި އަހަރު ނަގާފައިވަނީ އިސްލާމިކް ޑިވްލޮޕްމަންޓް ބޭންކް (އައިޑީބީ) އިން ނެގި ދެ ލޯނަކާއި ސައުދީ ފަންޑުން ނެގި ލޯނެކެވެ. އިސްލާމިކް ޑިވްލޮޕްމަންޓް ބޭންކް އިން ނަގާފައިވަނީ 3.8 މިލިއަން ޑޮލަރުގެ ލޯނެއްގެ އިތުރުން 59 މިލިއަން ޑޮލަރުގެ ލޯނެކެވެ. އަދި ސައޫދީ ފަންޑުން ނަގާފައިވަނީ 63 މިލިއަން ސައޫދީ ރިޔާލްގެ ލޯނެވެ. މި ހުރިހާ ލޯންތަކަކީ ވެސް އުފެއްދުންތެރި އަދި އިގްތިސޯދު ކުރިއަރައިގެންދާނެ ކަންކަމަށް ނަގާފައިވާ ލޯނުތަކެވެ. 

ދައުލަތުގެ ލޯނު ހިސާބުތައް ދައްކާ ގޮތުން މި ސަރުކާރުން ވެރިކަމަށް އައިފަހުން 14 ލޯނެއް ނަގާފައިވެ އެވެ. މީގެ ތެރެއިން އެންމެ ގިނަ ލޯނު ނަގާފައިވަނީ ސިއްހީ ދާއިރާ ތަރައްގީ ކުރުމާއި ވީއައިއޭ ތަރައްގީ ކުރުމާއި މަސްވެރިކަމަށް ފަދަ އިގްތިސޯދީ ގޮތުން ފައިދާހުރި ކަންކަމަށެވެ. 

ރާއްޖެއަށް ދަރަނި މަތިވުމުގެ މައްސަލަ ވަނީ ބޮޑުވެފަ އެވެ. އެގޮތުން މި އަހަރު ނިމޭއިރު ދައުލަތުގެ ދަރަނި 150 ބިލިއަން ރުފިޔާއަށް އަރާ އިރު ދަރަނި އަދާކުރެވެ އެވެ. އެއާއެކު  މި އަހަރު 10 ބިލިއަން ރުފިޔާ ދަރަނި ދައްކަން ހޭދަކުރަން ޖެހެ އެވެ. ހިސާބުތަކުން ދައްކާ ގޮތުގައި ދައުލަތަށް ވަންނަ ކޮންމެ 100ރ. އަކުން 30ރ. ދަރަނި ދައްކަން ހޭދަކުރާނެ އެވެ.