ފުލުހުން މިއަދު ބުނީ އަބްދުއްރަހްމާން މަރައިލި ކަމުގެ ތުހުމަތުގައި ތިން މީހަކު ހައްޔަރުކޮށްފައިވާ ކަމަށެވެ. އެ ތިން މީހުންގެ ވަނަވަރު ހާމަކޮށްފައެއް ނުވެ އެވެ.
އއ. މާޅޮހުގައި މިދިޔަ ޖުލައި މަހުގެ 13 ވަނަ ދުވަހުގެ ރޭ ދަންވަރު ބޮޑެތި ޒަހަމްތަކެއް ލިބުމުގެ ސަބަބުން އުމުރުން 65 އަހަރުގެ އެ ރަށު، އޯކިޑްމާގޭ އަބްދުލްރަހްމާން އާދަމް މަރުވި މައްސަލައިގައި ތިން މީހަކު ހައްޔަރު ކޮށްފި އެވެ.
ފުލުހުން މިއަދު ބުނީ އަބްދުއްރަހްމާން މަރައިލި ކަމުގެ ތުހުމަތުގައި ތިން މީހަކު ހައްޔަރުކޮށްފައިވާ ކަމަށެވެ. އެ ތިން މީހުންގެ ވަނަވަރު ހާމަކޮށްފައެއް ނުވެ އެވެ.
"އިތުރު މައުލޫމާތު ފަހުން ހާމަކުރާނެ ވާހަކަ ދަންނަވަން،" ފުލުހުން ބުންޏެވެ.
އަބްދުލްރަހްމާނަށް ވަނީ ނިދާފައި އޮއްވާ ބޮޑެތި ޒަހަމްތަކެއް ދީފަ އެވެ. އޭނާގެ ބޮލުގައި މަރުތޭލު ޒާތުގެ އެއްޗަކުން ޖަހައި ބޯ ވަނީ ޗިސްކޮށްލައިފަ އެވެ. އޭނާ މަރުވެފައި ވަނީ ފަރުވާ ދިނުމަށް އެރަށު ސިއްހީ މަރުކަޒަށް ގެންގޮސްފައި ވަނިކޮށް އެރޭ ދަންވަރުގެ ވަގުތެއްގަ އެވެ.
އޭނާ މަރުވި ސީދާ ސަބަބު ދެނެގަތުމަށް އިންޑިއާގެ ތިރުވަނަންތަޕޫރަމްއަށް ގެންގޮސް ވަނީ އޮޓޮޕްސީ ހަދައިފަ އެވެ. ފުލުހުން މިއަދު ބުނީ އަބްދުއްރަހްމާން މަރުވީ ބޮލަށް ލިބުނު އަނިޔާގެ ސަބަބުން ކަމަށް އޮޓޮޕްސީ ރިޕޯޓުން ހާމަވާ ކަމަށެވެ.
އޮޓޮޕްސީއަށް ފަހު އޭނާގެ ހަށިގަނޑު ވަޅުލާފައި ވަނީ މިމަހުގެ 24 ވަނަ ދުވަހު އެވެ.