މީޑިއާ ވިލޭޖާއެކު ހުޅުމާލޭގައި ފަސް ތަރީގެ ހޮޓަލެއް އަޅަން ހަވާލުކޮށްފި

އެސްޓީއޯ ހުޅުމާލެ ހޮޓާ އިމާރާތް ކުރި އިމާރާތުގައި މީޑިއާ ވިލެޖުގެ އިތުރުން ފަސް ތަރީގެ ސިޓީ ހޮޓަލެއް އަޅަން އެޗްޑީސީ އިން ކުންފުންޏަކާ ހަވާލުކޮށްފި އެވެ. 


މީރުމާގައި މިރޭ އޮތް ހަފުލާއެއްގައި "މެންހެޓަން ގްރޭންޑް ހޮޓެލް" ގެ ނަމުގައި ތަރައްގީ ކުރާ މި ހޮޓާ އަޅަން ހަވާލުކުރީ 
ދުބާއީގެ ޑީޕްސީފުޑް ކޮމްޕެނީން ހަދާފައިވާ ވޯލްޑް އޮފް ބިޒްނަސް ޕްރައިވެޓް ލިމިޓެޑް ކުންފުންޏާ އެވެ. މި އެއްބަސްވުމުގައި ސޮއިކުރީ އެޗްޑީސީގެ ފަރާތުން މެނޭޖިން ޑިރެކްޓަރު އަލީ ޒުހެއިރެވެ.
 
މި އިމާރާތް ފަރުމާކޮށްފައިވަނީ  މީޑިއާ ވިލޭޖުގެ އިތުރުން ތަރިކަ ކޮލެޖާއި އެމްއެންޔޫ މެޑިކަލް ސްކޫލާއި ޔޫތު ސެންޓަރަށް ހާއްސަ ޖާގައެއްވެސް ހިމެނޭ ގޮތަށެވެ. މިތަން ފަސް މަސް ތެރޭ ހުޅުވަން ޖެހޭއިރު މި ބަޔަކަށް ޖުމްލަ 102 މިލިއަން ރުފިޔާ ހަރަދު ކުރާނެ އެވެ.  މި މަޝްރޫއު އެއްކޮށް ނިންމަން ވޯލްޑް އޮފް ބިޒްނަސް ޕްރައިވެޓް ލިމިޓެޑް ކުންފުންޏަށް ލިބޭނީ އެއް އަހަރު ދުވަހެވެ.

މި ޕްރޮޖެކްޓް އެޗްޑީސީ އިން ހަވާލު ކުރުމާއެކު އެ ކުންފުންޏަށް ބިމުގެ އަގުގެ ގޮތުގައި 11 މިލިއަން ޑޮލަރު (170 މިލިއަން ރުފިޔާ) ލިބޭނެ އެވެ. މީގެ އިތުރުން ކުލީގެ ގޮތުގައި މަހަކު 14.4 މިލިއަން ރުފިޔާ އަދި ޓެކުހުގެ ގޮތުގައި އަހަރެއްގެ މައްޗަށް ދައުލަތަށް 2.5 މިލިއަން ޑޮލަރު ލިބޭނެ އެވެ. އަދި މި މަޝްރޫއު ހަވާލު ކުރުމުން އިޖުތިމާއީ ޒިންމާގެ ގޮތުގައި އެ ކުންފުނިން ސަރުކާރަށް ދޫކުރާ ހަތަރު ތަނުގެ ފެނާއި ކަރަންޓާއި މެއިންޓަނެންސް ހަރަދު ބަލަހައްޓަން ޖެހެ އެވެ. 

އެސްޓީއޯ އިން ހުޅުމާލޭގައި ހޮޓަލެއް ތަރައްގީ ކުރުމުގެ މަސައްކަތް ފެށީ އެ ކުންފުނިން ޓޫރިޒަމަށް ނުކުތުމުގެ މަގުސަދުގަ އެވެ. މީގެ 18 އަހަރު ކުރިން މި މަސައްކަތް ފަށައި 2007 ވަނަ އަހަރު އެމެރިކާގެ ކާލްސަން ގުރޫޕާއެކު 2011 ގައި ޕާޓްނާޝިޕް އެއްބަސްވުމެއް ހެދި އެވެ. އަދި 34 މިލިއަން ޑޮލަރު ހަރަދު ކޮށްގެން 250 ކޮޓަރި ހިމެނޭ ގޮތަށް ރެޑިސަން ބްލޫ ހޮޓެލް ގެ ނަމުގައި އެ ތަން ތަރައްގީ ކުރަން ފެށި އެވެ. ނަމަވެސް ތަފާތު ސަބަބުތަކާހުރެ އެ ހޮޓާ ނިންމޭ ގޮތެއް ނުވި އެވެ. އެންމެފަހުން ހޮޓާ ވިއްކާލަން 2018 ގައި އެސްޓީއޯ އިން ނިންމި އެވެ.