ތޮއްޑޫގައި ބީއެމްއެލް ޑޮލަރު އޭޓީއެމްގެ ހިދުމަތް ފަށައިފި

ޓޫރިޒަމް ވަރަށް ބޮޑަށް ކުރިއަރާފައިވާ އއ. ތޮއްޑޫގައި ބޭންކް އޮފް މޯލްޑިވްސް (ބީއެމްއެލް) ޑޮލަރު އޭޓީއެމްގެ ހިދުމަތް ދޭން ފަށައިފި އެވެ.

ތޮއްޑޫގައި ގާއިމްކުރި ބީއެމްއެލްގެ ޑޮލަރު އޭޓީއެމް ހުޅުއްވައި ދެއްވީ ރައީސް ޑރ. މުހައްމަދު މުއިއްޒެވެ. އެރަށުގައި ޑޮލަރު އޭޓީއެމްގެ ހިދުމަތް ފައްޓަވައިދެއްވުމަކީ އެމަނިކުފާނުގެ ވައުދުފުޅެކެވެ.

ރައީސް އއ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު އެރަށަށް ވަޑައިގެން ޑޮލަރު އޭޓީއެމްގެ ހިދުމަތް ފައްޓަވައިދެއްވުމަށް އެމަނިކުފާނު ވަނީ އެ އޭޓީއެމުން ފައިސާ ނަންގަވާފަ އެވެ. 

މިދަތުރުގައި ބީއެމްއެލް ތޮއްޑޫ ބްރާންޗްގެ ބިންގާވެސް ވަނީ އަޅާފަ އެވެ. ބިންގާ އަޅުއްވައިދެއްވީ ފިނޭންސް މިނިސްޓަރު މޫސާ ޒަމީރާއި، ބީއެމްއެލްގެ ސީއީއޯ މުހައްމަދު ޝަރީފު އަދި ތޮއްޑޫ ކައުންސިލްގެ ރައީސް އެވެ.

ތޮއްޑޫގައި ޑޮލަރު އޭޓީއެމްއެއް ހުޅުވުމަށް ސަރުކާރުން ނިންމީ އެރަށަކީ ލޯކަލް ޓޫރިޒަމް ފުޅާވެފައިވާ ރަށަކަށް ވާތީ އެވެ. އަދި އެރަށުގައި ހިންގާ ގިނަ ވިޔަފާރިތަކަކީ ޓޫރިޒަމް ދާއިރާގެ ވިޔަފާރިތަކަށް ވާތީ އެވެ.

ތޮއްޑޫގައި ބީއެމްއެލްއިން ހުޅުވި ޑޮލަރު އޭޓީއެމްއަކީ މާލެއިން ބޭރުގައި ޑޮލަރު އޭޓީއެމްގެ ހިދުމަތް ގާއިމުކުރި ހަތަރު ވަނަ ރަށެވެ. ދެން ޑޮލަރު އޭޓީއެމް ބަހައްޓާފައި ހުންނަނީ މާފުށި، އައްޑޫ ސިޓީ އަދި ކުޅުދުއްފުށި ސިޓީގަ އެވެ.

ލޯކަލް ޓޫރިޒަމް ކުރިއަރާފައިވާ ތޮއްޑޫގައި މިހާރު ގަތްގަނޑަކަށް 80 ވަރަކަށް ގެސްޓްހައުސް ދަނީ ހިންގަމުންނެވެ. ޓޫރިސްޓުންގެ އިތުރުން ގިނަ ދިވެހިން ވެސް ޗުއްޓީ ހޭދަކުރުމަށް ތޮއްޑޫއަށް ދެއެވެ.