ބޮޑުތަކުރުފާނު މަގު ފުޅާކުރަން ފަށާތީ އެމްއެމްއޭ ކުރިމަތީގައި އޮންނަ ފަޅު ބަންދުކޮށް، ޓްރެފިކަށްވެސް ބަދަލެއް
މަޝްރޫއުގެ އަމަލީ މަސައްކަތް ފެށުމަށްޓަކައި ރަސްމީ ފާލަމާއި ލޯކަލް މާރުކޭޓާ ދެމެދުގައިވާ ސަރަހައްދުން ބައެއް ބަންދުކޮށް ޓްރެފިކް ރޫޓަށް ބަދަލުތަކެއް ގެނެވިފައިވޭ.
ބޮޑުތަކުރުފާނު މަގުގައި މިހާރު ތާރު ނާޅާ އޮތް ސަރަހައްދު، ފަޅަށް ޝީޓް ޕައިލްކޮށްގެން ފުޅާކޮށް، ތަރައްގީ ކުރުމުގެ މަސައްކަތުގެ ދަށުން، މަރުކަޒީ ބޭންކު، އެމްއެމްއޭގެ ކުރިމަތިން އޮންނަ ފަޅު ބަންދުކޮށް، މަގުގެ ޓެރެފިކް ފްލޯއަށް ވެސް ބަދަލުތަކެއް ގެނެސްފި އެވެ.
ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު އެކްސްގައި ކުރެއްވި ޕޯސްޓެއްގައި ވިދާޅުވީ، މާލޭ އުތުރުފަރާތު ބޮޑު ތަކުރުފާނު މަގު ހަތަރު ލޭނުގެ މަގަކަށް ފުޅާކޮށް ޒަމާނީ ފެންވަރަށް ހެދުމަށް ސަރުކާރުން ކުރިއަށް ގެންދާ މަޝްރޫއުގެ އަމަލީ މަސައްކަތް ފެށުމަށްޓަކައި ރަސްމީ ފާލަމާއި ލޯކަލް މާރުކޭޓާ ދެމެދުގައިވާ ސަރަހައްދުން ބައެއް ބަންދުކޮށް ޓްރެފިކް ރޫޓަށް ބަދަލުތަކެއް ގެނެވިފައިވާ ކަމަށެވެ.
އަދި އެ ސަރަޙައްދުގެ ފަޅުވެސް ވަނީ އުޅަނދުތަކަށް ބޭނުން ނުކުރެވޭ ގޮތަށް ބަންދުކުރެވިފައިވާ ކަމަށް އޭނާ ވިދާޅުވި އެވެ.
"މި މަސައްކަތުގައި އާންމު ރައްޔިތުންގެ އެއްބާރުލުން ދެއްވުން އެދެމެވެ. އަދި ދިމާވާ ދަތިތަކަށް ނިހާޔަތަށް މާފަށް އެދެމެވެ،" މުއްތަލިބު ވިދާޅުވި އެވެ.
ހުޅުމާލޭ ފެރީ ޓާމިނަލުން ފެށިގެން ރަސްފަންނާ ހަމައަށް ތާރު ނާޅާ އޮތް ހިސާބުގައި ތާރު އަޅައި މަގު ތަރައްގީ ކުރަން ހަވާލުކުރީ މިދިޔަ އޭޕްރީލް މަހުގެ ކުރީކޮޅު އެމްޓީސީސީއާ އެވެެ.
އެ މަޝްރޫއު އެމްޓީސީސީއާ ހަވާލުކުރީ ފެން ހިންދާ ނިޒާމާއި ދުވާރު ގާއިމްކޮށް، ރޯޑް މާކިން އަދި ސައިން ބޯޑު ހަރުކުރުން ހިމެނޭ ގޮތަށް 144 މިލިއަން ރުފިޔާއަށް، 455 ދުވަސް ތެރޭގައި ނިންމާ ގޮތަށެވެ.
ކޮމެންޓް
Republic of Maldives