އޯލެވެލް އިމްތިހާނުގެ ނަތީޖާ މިއަދު ދޫކުރަނީ

މި އަހަރު ބޭއްވި ކެމްބްރިޖް އޯލެވެލް އަދި އެސްއެސްސީ އިމްތިހާނުގެ ނަތީޖާ މިއަދު ދޫކުރަން ފަށާނެ އެވެ. 

ޑިޕާޓްމެންޓް އޮފް ޕަބްލިކް އެގްޒަމިނޭޝަން (ޑީޕީއީ) އިން ކުރި އިއުލާނެއްގައި ބުނީ މިއަދު މެންދުރު 1:00 އިން ފެށިގެން ނަތީޖާ ދޫކުރަން ފަށާނެ ކަމަށެވެ. ނަތީޖާ ލިބޭނީ އެ ދަރިވަރަކު އިމްތިހާނު ހެދި ސްކޫލުންނެވެ.

އަދި، އަމިއްލަ ގޮތުން އިމްތިހާނު ހެދި ދަރިވަރުންގެ ނަތީޖާ ދޫކުރަމުންދާނީ ޑީޕީއޭ އިން ރަސްމީ ބަންދު ނޫން ކޮންމެ ދުވަހެއްގެ ހެނދުނު 8:30 އިން މެންދުރު 1:30 ގެ ނިޔަލަށް ކަމަށް އެ އިއުލާނުގައިވެ އެވެ.

މިއަހަރުގެ މޭ/ޖޫންގައި ބޭއްވި އޯލެވެލް އަދި އެސްއެސްސީ އިމްތިހާނުގައި 8،364 ދަރިވަރުން ވަނީ ބައިވެރިވެފަ އެވެ. ޖުމުލަ 260 މަރުކަޒެއްގައި އިމްތިހާނު ކުރިއަށް ގެންގޮސްފައިވެ އެވެ.

މިހާރު ގްރޭޑް 10 ގައި ކިޔަވާ ދަރިވަރުން އޯލެވެލް އިމްތިހާނު ހެދުމަށް ހަމަޖެހިފައި ވަނީ އަންނަ އަހަރުގެ ފެބްރުއަރީ/މާޗް މަހު އެވެ. އަދި މިހާރު ގްރޭޑް 9 ގައި ކިޔަވާ ދަރިވަރުން އޯލެވެން އިމްތިހާނު ހަދާނީ އަންނަ އަހަރުގެ އޮކްޓޯބަރު/ނޮވެމްބަރުގަ އެވެ.