މަޖިލީހަށް ދޮގު ހެދިކަމަށް ބުނެ ހަލީލްއާ ދެކޮޅަށް ހުށަހެޅި އިމްތިޔާޒްގެ މައްސަލަ ބޭރުކޮށްލައިފި

ރައްޔިތުންގެ މަޖިލީހުގެ ޖަލްސާއެއްގައި މެމްބަރުންގެ ސުވާލުތަކަށް ޖަވާބު ދެއްވަމުން، ފޮރިން މިނިސްޓަރު ޑރ. އަބްދުﷲ ހަލީލް އިތުރުފުޅު ހެއްދެވިކަމަށް ބުނެ، އޭނާއާ ދެކޮޅަށް ހުށަހެޅި އިމްތިޔާޒްގެ މައްސަލަ މަޖިލީހަށް ބަލައިނުގަނެ، ބޭރުކޮށްލައިފި އެވެ.

ގަލޮޅު ދެކުނު ދާއިރާގެ އެމްޑީޕީގެ މެމްބަރު މީކާއީލް އަހުމަދު ނަސީމް، ހަލީލްއާ ދެކޮޅަށް އިމްތިޔާޒުގެ މައްސަލައެއް މަޖިލިހަށް ހުށަހެޅުއްވީ މިދިޔަ ހަފުތާގެ ބުދަ ދުވަހު މަޖިލިހުގެ ތަޅުމުގައި މެމްބަރަކު ކުރެއްވި ސުވާލެއްގެ ޖަވާބުގައި ހަގީގަތާ ހިލާފު ވާހަކަތަކެއް ދައްކަވާފައިވާ ކަމަށް ވިދާޅުވެ އެވެ. 

"އިންޑިއާ އައުޓް" ކެމްޕެއިންގައި "އިންޑިއާ އައުޓް" ޓީޝާޓެއް ލައްވައިގެން ހަލީލް އެ ދުވަސްވަރު ހުންނެވިންތޯ ހިތަދޫ ދެކުނު ދާއިރާގެ އެމްޑީޕީގެ މެމްބަރު އިބްރާހިމް ނާޒިލް ކުރެއްވި ސުވާލުގެ ޖަވާބުގައި ހަލީލް ވަރަށް ޔަގީންކަމާ އެކު ވިދާޅުވީ، ސޯޝަލް މީޑިއާގެ އެއްވެސް ފޮޓޯއަކުން އޭނާ އެ ގޮތަށް ނުފެންނާނެ ކަމަށެވެ.

"ސޯޝަލް މީޑިއާއިން ތިއިން އެއްވެސް ބޭފުޅަކަށް ފެނިވަޑައެއް ނުގަންނަވާނެ އިންޑިއާ އައުޓް ޓީޝާޓް ލައިގެން އަޅުގަނޑު ހުއްޓައެއް،" ހަލީލް ވިދާޅުވި އެވެ.

އެކަމަކު، ހަލީލް ވިދާޅުވީ ރާއްޖޭގެ މިނިވަންކަމާއި އިސްތިގުލާލާ ގުޅުން ހުރި ޓީޝާޓެއް ލައްވައިގެން އޭނާ ހުންނަވަނިކޮށް ފެނިފައި އޮވެދާނެ ކަމަށެވެ.

ނަމަވެސް، މީކާއިލް ހުށަހެޅުއްވި މައްސަލާގައި، ހަލީލް އިދިކޮޅުގައި ހުންނެވި ދުވަސްވަރު، އިންޑިއާ އައުޓް ޓީޝާޓެއް ލައްވައިގެން މާސްކު އަޅުއްވައިގެން ހުންނަވަނިކޮށް ސޯޝަލް މީޑިޔާގައި ދައުރުވަމުންދާ ފޮޓޯ ވެސް ހިމަނުއްވައި، މަޖިލީހުގައި ޖަލްސާގައި ހަލީލް އިތުރުފުޅު ހެއްދެވިކަމަށް ވިދާޅުވެފައިވެ އެވެ. 

އެ މައްސަލަ މަޖިލީހަށް ބަލައިގަންނަން ފެނޭތޯ ބެލުމަށް، މަޖިލީހުގެ މިއަދުގެ ޖަލްސާގައި ނެގުނު ވޯޓުގައި އެ މައްސަލަ ބޭރުކޮށްލާފައިވަނީ 37 މެމްބަރުން އެ މައްސަލަ ބަލައިގަންނަން ނުފެންނަކަމަށް ވޯޓު ދެއްވައިފަ އެވެ.

އެ ބިލު ބަލައިގަންނަން ތާއީދުކުރެއްވީ އެންމެ އަށް މެމްބަރުންނެވެ.