އެއާޕޯޓް ރީތިވީއިރު އަހަރެމެން ދަތުރު މިކުރަނީ 80 އިގެ އަހަރުތަކުގައި

އެއާޕޯޓުގައި މަސައްކަތް ކުރާތާ 15 އަހަރަށްވުރެ ގިނަ ދުވަސްވީ އަހުމަދު އަލީ ކޮންމެ ދުވަހަކު ހުޅުލެއަށް އަރަނީ އުންމީދުގަ އެވެ. ޒަމާނީ ރީތި ފުރިހަމަ އެއާޕޯޓެއް ފެންނާނެ ދުވަހެއްގެ އިންތިޒާރުގަ އެވެ. މި އިންތިޒާރުގައި ހުރި އަލީގެ އުންމީދުތައް މިވަނީ ހަގީގަތަކަށްވެފަ އެވެ. ރީތި ފުރިހަމަ އެއާޕޯޓެއް ލިބިއްޖެ އެވެ. ޒަމާނީ ރީތި ތަނަވަސް ޓާމިނަލެއް ލިބިއްޖެ އެވެ. އެކަމަކު މިހާރު އެ މުވައްޒަފުންނަށް އިތުރު ނުތަނަސްކަމެއް މިވަނީ ކުރިމަތިވެފަ އެވެ. އެއީ އެމީހުންނަށް އެއާޕޯޓަށް ދާން ޖެހޭ ދަތުރުގެ ނުތަނަވަސް ކަމެވެ. ކުރިން ސައިކަލްގައި ދުއްވާ ގޮސް އެެއާޕޯޓުގައި ޕާކުކޮށްލާފަ ދެވެ އެވެ. އެކަަމަކު މިހާރު އޭނާ ވެސް ދަނީ މީގެ 20 އަހަރު ކުރީގައި އެއާޕޯޓަށް މީހުން ދިޔަ ފެރީގަ އެެވެ.

"ކިތަންމެހާ ވެސް ފުރިހަމަ އެއާޕޯޓެއް ލިބިގެން މިދިޔައީ. އެކަމަކު އަހަރެމެންގެ ދަތުރު މިއޮތީ 80 އަހަރު ތަކުގަ މިހާރު،" އަލީ މިހާރު ކުރިމަތިވަމުންދާ ދަތިތައް ކިޔައިދިނެވެ. 

އެއާޕޯޓް ބަލަހައްޓާ އެމްއޭސީއެލްގެ އެކަނި 5،000 މުވައްޒަފުން އުޅޭނެ ކަމަށް އަންދާޒާ ކުރެވެ އެވެ. އަދި އަމިއްލަ ފަރާތްތަކާއެކު މި ރަށަކީ އެއް ދުވަހެއްގެ މައްޗަށް އެންމެ ގިނަ ބަޔަކު އަރައިފައިބާ ރަށަށްވާނެ އެވެ. މި މީހުންގެ ތެރޭން ވެސް އެންމެ ހާއްސަ އެއް ބަޔަކީ ޓޫރިސްޓުންނަށް ހިދުމަތް ދޭން ތިބޭ ގައިޑުންނެވެ. ނުވަތަ އެއާޕޯޓް މެނޭޖަރުންނާއި ރެެޕްރެންޓެޓިވުންގެ ގޮތުގައި މަސައްކަތް ކުރާ ޒުވާނުންނެވެ. މިހާރު ކުރިމަތިވެފައިވާ މައްސަލައާ ގުޅިގެން އެންމެ ބޮޑު ދަތިކަމެއް ކުރިމަތިވާ އެއް ބަޔަކީ ވެސް މިއީ އެވެ. 

ފްލައިޓް ޝެޑިއުލް ބަލައި އެ މީހުން ކޮންމެ ދުވަހަކު ވެސް އެއާޕޯޓަށް ދެ އެވެ. އަދި އެތަނުގަ މަޑުކޮށްލުމަށްފަހު ޓޫރިސްޓުން ބޯޓަށް އެރުވުމާއި ފުރުވާލުމުގެ ފުރަތަމަ މަސައްކަތް ކުރެ އެވެ. ލަގެޖުތައް ޓްރޯލީއަށް ލައިގެން ޗެކިން ކައުންޓަރާ ހަމައަށް ގެންސްދެ އެވެ. އަދި ބޯޑިން ޕާސް ނަގައި އެންމެފަހުގެ އަލްވަދާއު އެމީހުންނަށް ކިޔަ އެވެ. ރާއްޖޭގެ ޓޫރިޒަމަށް ދުނިޔޭގައި ލިބިފައިވާ ރަންވަނައިގެ ފޮރުވިފައިވާ ސިއްރަކީ ވެސްމި އެވެ.

އެއާޕޯޓުގައި މަސައްކަތް ކުރާ މަތީފަންތީގެ ރިސޯޓެއްގެ މެނޭޖަރަކު ކިޔައިދިން ގޮތުގައި މިހާރު ގިނަ މުވައްޒަފުންނަށް ދަނީ ގިނަ ދަތިތަކާ ކުރިމަތިވަމުންނެވެ.

"ފުރަތަމަ ކަމަކީ ހުޅުލެއަށް ފެރީގައި ދާން އައިސް މާލެ ކޮޅުގައި ޕާކު ކޮށްލާނެ ޖާގައެއް ނޯވެ. ޕާކުރަން އޮންނަ [ހެންވޭރު ފެރީ ޓާމިނަލް] ސަރަހައްދު އޮންނަނީ ފުރިފަ. އެހެންވެ ގިނަ މުވައްޒަފުން ސައިކަލް ކޮންމެވެސް ތަނެއްގައި ބަހައްޓާފަ ދަނީ. ޑިއުޓީ ނިންމާފަ މާލެ އަންނައިރު ސައިކަލް މިއޮނަނީ ޓޯކޮށްފަ،" ނަން ނުޖެހުމަށް އެދި ކިޔައިދިނެވެ.

އެއާޕޯޓުގައި ޕާކިން މައްސަލަ މިހާރު އޮތީ ހަމައެކަނި އެއާޕޯޓުގައި މަސައްކަތް ކުރާ ރިސޯޓްތަކުގެ މުވައްޒަފުންނަށް އެކަންޏެއް ނޫނެވެ. މި ދަތިކަން އެހެން ސަރުކާރު މުވައްސަސާތަކުން އެއާޕޯޓުގައި މަސައްކަތް ކުރާ މުވައްޒަފުންނާއި އަމިއްލަ ބޭނުންތަކަށް އެއާޕޯޓަށް އަރާ މީހުންނަށްވެސް މިހާރު ބޮޑެވެ. އަދި އެކަން ހައްލުކުރަން އެއާޕޯޓް ބަލަހައްޓާ އެމްއޭސީއެލްއިން ކެނޑިނޭޅި ދަނީ މަަސައްކަތްވެސް ކުރަމުންނެވެ.  

އެއާޕޯޓަށްދާ މީހުން ވެހިކަލް ޕާކު ކުރާ ސަރަހައްދު ނެގުމުގެ ސަބަބުން ޕާކް ކުރަން ދަތިވާ މައްސަލައާ ބެހޭ ގޮތުން އެމްއޭސީއެލް އިން މިއަދު ވާހަކަ ދެއްކި ސީނިއަ އެގްޒެޓިކް ޕީއާރު އެންޑް މީޑިއާ ކޮމިއުނިކޭޝަމް ހުސެެއިން އައިމަން ވިދާޅުވީ، އެއާޕޯޓަށްދާ މުވައްޒަފުންނާއި އެހެން މީހުން ދުއްވާ ސައިކަލް ޕާކު ކުރެވޭނެ ޖާގަ ހަދަން މަސައްކަތްތަކެއް ކުރަމުންދާ ކަމަށާ ނަމަވެސް އެއާޕޯޓަކީ ވަކި ސްޓޭންޑަޑަކަށް ހިދުމަތްތައް ހުންނަން ޖެހޭ ތަނަކަށްވުމުން ބަލަން ޖެހޭ ގިނަ ބެލުންތަކެއް ހުންނަ ކަމަށެވެ. އެހެންކަމުން އެކަމަށް ވަގުތު ނަގަމުންދާކަން އޭނާ ފާހަގަ ކުރެއްވި އެވެ. ނަމަވެސް މިހާރުވެސް އެއާޕޯޓަށްދާ ފެެރީގެ އަދަދު އިތުރު ކުރުމާއި އެމްޓީސީސީގެ ބަހުގެ ދަތުރުތައް އިތުރު ކުރުން އަދި އެއާޕޯޓް ހުޅަނދު ފަރާތުގައި ޕާކު ކުރެވޭނެ އިންތިޒާމު ހަމަޖައްސާފައިވާނެ ކަމަށް އޭނާ ވިދާޅުވި އެވެ.

"އަޔާޓާ / އައިކާއޯ / ސިވިލް އޭވިއޭޝަން [ވައިގެ ދަތުރުފަތުރު ޖަމިއްޔާތަކުގެ ] ސެކިއުރިޓީ މިންގަނޑުތަކެއް ހުރޭ އެއާޕޯޓްތަކުގައި ހުންނަން ޖެހޭ ޕާކިން ވަސީލަތްތައް ގާއިމް ކުރަން ވަކި ޑިސްޓެންސެއް ހުރޭ. އެއާޕޯޓެއް ހިންގަނީ ސެކިއުރިޓީ އޮޑިޓްކޮށްގެން އެހެންވެ އެ މިންގަނޑުތަކަށް ފިޓްވާން ޖެހޭ. އެހެންވެ މިކަމަށް [ސައިކަލް ޕާކިން] ހަދަން ބަލަން ޖެހޭ ކަންކަން ބަލަން ވަގުތު ނަގަނީ،" އައިމަން ވިދާޅުވި އެވެ. 

އޭނާ ވިދާޅުވީ މި މަސައްކަތް ކުރަމުންދާއިރު މިއާއެކު އެކީގައި އެއާޕޯޓަށްދާ މުވައްޒަފުންނަށް ލުއި ފަސޭހަ ގޮތް ތަކެއް ހަދަން ވެސް ދަނީ މަސައްކަތް ކުރަމުންނެވެ. 

"އެއާޕޯޓުގައި މަސައްކަތް ކުރާ މުވައްޒަފުންނަށް ފަސޭހަކޮށްދޭން އިތުރު އިންތިޒާމުތައް ވަނީ ހަމަޖައްސާފަ. މިހާރު އެމްޓީސީސީ ބަސްވެސް ވަނީ އިތުރުކޮށްފަ. ޑަބަލްޑެކާ ބަސް އިތުރު ކުރަން އުޅުނީ އެކަމަކު ޓާމިނަލް [ކުރީ] ސަރަހައްދުން ދަތުރު ކުރަން ދަތިވަނީ. އެކަަމަކު ފެރީ ވަނީ އިތުރުކޮށްފަ. މީގެ އިތުރުން އިރުމަތީ ފަރާތުގައި ޕާކް ކުރެވޭނެ ގޮތް ވަނީ ހަމަޖައްސާފަ. އޭވިއޭޝަން ކޮމާންޑުގެ ފާސް އޮންނަ މީހުންނަށް އެ ސަރަހައްދުގައި ޕާކު ކުރެވޭނެ. އަދި އެ މުވައްޒަފުން ޓާމިނަލްއަށް އަންނަން ބަސް ވެސް ވަނީ އިތުރުކޮށްފަ،" އައިމަން ވިދާޅުވި އެވެ. 

އޭނާ ވިދާޅުވީ މި ބަދަލުތައް ގެނައި ނަމަވެސް ހުޅަނދު ފަރާތުގައި ޕާކުކުރަން ހުޅުމާލެއިން އަންނަ މުވައްޒަފުންނާއި މާލެދާ މުވައްޒަފުންނަށް ދަތިތަކެއް ހުންނާނެ ކަމަށެވެ. 

"އަޅުގަނޑުމެން މިދަނީ ކެނޑިނޭޅި ހުރި ދަތިތައް ކުޑަ ކުރަން ކުރެވެން އޮތް ހުރިހާ މަސައްކަތެއް ކުރަމުން،" އައިމަން ވިދާޅުވި އެވެ.