ބީއެމްއެލްގެ އަމާޒަކީ ދެތިން މަސްތެރޭ 56 ރަށުގައި އޭޓީއެމް ބެހެއްޓުން

ބީއެމްއެލްގެ އަމާޒު ދެތިން މަސްތެރޭ 56 ރަށުގައި އޭޓީއެމް ބަހައްޓައި މަޝްރޫއު ނިންމާލުން ކަމަށް ބުނެފި އެވެ. 

ބ. އަތޮޅުގެ ހުރިހާ ރަށަކަށް އޭޓީއެމް ހިދުމަތް ދިނުމާ ގުޅިގެން ބ. މާޅޮހުގައި ވާހަކަދައްކަވަމުން ބީއެމްއެލްގެ ސީއީއޯ މުހައްމަދު ޝަރީފް ވިދާޅުވީ ބީއެމްއެލްގެ އަމާޒަކީ މި އަހަރު އެ މަސައްކަތުގެ ބޮޑުބައި ނިންމާލުން ކަމަށެވެ.

ޝަރީފު ވިދާޅުވީ ރާއްޖޭގައި އޭޓީއެމް ހިދުމަތް ދޭން 2000 ވަނަ އަހަރު އިފްތިތާހުކޮށްދެއްވީ އޭރުގެ ރައީސް މައުމޫން ޢަބްދުލްގައްޔޫމް އެއާއެކު މާލޭގައި ފަސް އޭޓީއެމްއެއް ބެހެއްޓިކަން އޭނާ ފާހަގަ ކުރެއްވި އެވެ.

"އެއަށްފަހު އަތޮޅުތެރެއަށް އޭޓީއެމް ހިދުމަތް ދޭން ފެށުނީ އޭގެ ހަތް އަހަރުފަހުން. 2007 ވަނަ އަހަރު އެ މަސައްކަތުގެ ދަށުން 19 ރަށެއްގައި އޭޓީއެމް ބެހެއްޓުނު. 2008 ވަނަ އަހަރުން ފެށިގެން 2023 ވަނަ އަހަރާ ހަމަޔަށް އިތުރު 68 ރަށުގައި އޭޓީއެމް ހިދުމަތް ފެށުނު. އަދި މިދިޔަ އަހަރު 9 ރަށެއްގައި އޭޓީއެމް ހިދުމަތް ފެށުނު. އެހެންކަމުން މިދިޔަ އަހަރު ނިމުނު އިރު މާލެ ފިޔަވައި މީހުން ދިރިއުޅޭ ރަށްތަކުގެ ތެރެއިން ޖުމްލައެކު 96 ރަށެއްގައި އަޅުގަނޑުމެން ދިޔައީ އޭޓީއެމް ހިދުމަތް ދެމުން،" ޝަރީފު ވިދާޅުވި އެވެ.

އޭނާ ވިދާޅުވި ގޮތުގައި މިދިޔަ ނޮވެންބަރު މަހު ފެށި މި މަސައްކަތަށް ބަލާއިރު، މިއަހަރުގެ މިހާތަނަށް 47 ރަށެއްގައި މިވަނީ އޭޓީއެމް ހިދުމަތް ފަށާފަ އެވެ.

"މިގޮތުން 7 އަތޮޅެއްގައި މީހުން ދިރިއުޅޭ ހުރިހާ ރަށެއްގައި މިވަނީ ހިދުމަތް ގާއިމްކޮށްފަ. މި އަތޮޅު ތަކަކީ ދ، ހއ، ނ، މ، ށ، ކ އަދި ބ އަތޮޅު މިވަގުތު އިތުރު ފަސް އަތޮޅެއްގެ 23 ރަށެއްގައި އޭޓީއެމް ޚިދުމަތް ފެށުމަށް އަޅުގަނޑުމެން މިވަނީ ތައްޔާރުވެފަ. ދެން ބާކީ އޮތް ހަތް އަތޮޅުގެ 33 ރަށުގައި ކުރިއަށް އޮތް ދެތިން މަސްދުވަސްތެރޭ އޭޓީއެމް ހިދުމަތްގާއިމްކޮށް މި މަޝްރޫއު ކާމިޔާބުކަމާއެކީ ނިންމާލުމަކީ އަޅުގަނޑުމެންގެ އަމާޒު،" ޝަރީފު ވިދާޅުވި އެވެ.