ފުރަތަމަ ހަ މަސް | ޓޫރިޒަމަށް ތިން ބިލިއަން ޑޮލަރުގެ އާމްދަނީއެއް

މި އަހަރުގެ ފުރަތަމަ ހަ މަސް ދުވަހު ރާއްޖޭގެ ޓޫރިޒަމް ސިނާއަތަށް އާމްދަނީގެ ގޮތުގައި ތިން ބިލިއަން ޑޮލަރު ލިބިފައިވާނެ ކަމަށް އަންދާޒާ ކުރެވިއްޖެ އެވެ. 

ޓޫރިޒަމް މިނިސްޓްރީގެ ރަސްމީ މައުލޫމާތުތައް ދައްކާ ގޮތުން ޖޫންގެ ނިޔަލަށް ރާއްޖެއަށް 1,082,330 މިލިއަން ޓޫރިސްޓުން ޒިޔާރަތްކޮށްފައިވެ އެވެ. އަދި ޓޫރިސްޓުން ރާއްޖޭގައި 6.8 މިލިއަން ރޭ ހޭދަކޮށްފައިވާ ކަމަށް ދައްކަ އެވެ. އެހެންވެ އަންދާޒާ ކުރެވޭ ގޮތުގައި ރާއްޖޭގެ ޓޫރިޒަމް ސިނާއަތަކަށް މި މުއްދަތުގައި ތިން ބިލިއަން ޑޮލަރުގެ އާމްދަނީއެއް ލިބޭނެ އެވެ. 

ޓޫރިޒަމް މިނިސްޓްރީގެ މައުލޫމާތަކުން އެނގޭ ގޮތުގައި ރިސޯޓްތަކުގައި ޓޫރިސްޓުން 5,456,709 ރޭ ވަނީ ހޭދަކޮށްފަ އެވެ. އަދި ގެސްޓްހައުސްތަކުގައި 1,153,226 ޓޫރިސްޓުން ހޭދަކޮށްފައިވާއިރު ސަފާރީތަކުގައި 149,026 ރޭ މަޑުކޮށްފައިވެ އެވެ. މި މުއްދަތުގައި މުޅި ޓޫރިޒަމް ސިނާއަތުގެ ޖުމްލަ އޮކިއުޕެންސީ ހުރީ 60.9 ޕަސެންޓުގަ އެވެ. ރިސޯޓްތަކުގެ އޮކިއުޕެންސީ 69.6 ޕަސެންޓުގައި ހުރިިއިރު ގެސްޓްހައުސްތަކުގެ އޮކިއުޕެންސީ 45.9 ޕަސެންޓުގައި ހުރި ކަމަށް ދައްކަ އެވެ.

ޓޫރިޒަމް މިނިސްޓްރީން ބުނި ގޮތުގައި ޖޫންގެ ނިޔަލަށް ރާއްޖެއަށް އައި ޓޫރިސްޓުންގެ އެއް މިލިއަން މީހުން އައިސްފައިވަނީ ވީއައިއިއޭ މެދުވެރިކޮށެވެ. ދެން އެންމެ ގިނައިން ޓޫރިސްޓުން އައިސްފައިވަނީ މާފަރު އެއާޕޯޓަށެވެ. މާފަރު އެއާޕޯޓް މެދުވެރިކޮށް 5,113 ޓޫރިސްޓުން އައިސްފައިވެ އެވެ. އަދި އައްޑޫ ގަމަށް 4,159 ޓޫރިސްޓުން އަދި ހަނިމާދޫއަށް 3,531 ޓޫރިސްޓުން އައިސްފައިވެ އެވެ.