ކައްދޫގައި މީހަކު މަރުވި އެކްސިޑެންޓާ ގުޅިގެން މީހަކު ހައްޔަރު ކޮށްފި

ލ. ކައްދޫގައި ރޭ ހިނގައިދިޔަ އެކްސިޑެންޓާ ގުޅިގެން ސައިކަލު ދުއްވަން އިން މީހާ ހައްޔަރު ކޮށްފި އެވެ.

ރޭ 19:18 ހާއިރު އެކްސިޑެންޓްވެފައި ވަނީ ފޮނަދޫން ގަމަށް ދަތުރުކުރި ސައިކަލެއް، ކައްދޫ އެއާޕޯޓަށް ދާން މަގު ހުރަސް ކުރި ބައެއްގެ ގައިގައި ޖެހިގެންނެވެ.

މި އެކްސިޑެންޓްގައި ޒިބްރާ ކްރޮސް އިން މަގު ހުރަސް ކުރި ދެ އަންހެނުންނަށާއި ސައިކަލުގައި ތިބި މީހުންނަށް އަނިޔާ ވެގެން ގަން ރީޖަނަލް ހޮސްޕިޓަލަށް ގެންގޮސްފައިވެ އެވެ. އޭގެ ތެރެއިން މި އެކްސިޑެންޓްގައި އަނިޔާވި ލ. މާވަށު، އެތުމާ، މަރްޔަމް މޫސާ، 64، އަށް ފަރުވާ ދެމުން ދަނިކޮށް ވަނީ ރޭ މަރުވެފަ އެވެ.

ފުލުހުން މިރޭ ބުނީ މި އެކްސިޑެންޓާ ގުޅިގެން ހައްޔަރުކޮށްފައި ވަނީ ލ. ފޮނަދޫ، ހޯރަވިލާ މުހައްމަދު ނައުސާން، 37، އެވެ. އޭނާގެ ބަންދާމެދު ގޮތެއް ނިންމަން ކޯޓަށް ހާޒިރުކުރުމުން 15 ދުވަހަށް ބަންދު ކުރަން ވަނީ އަމުރުކޮށްފަ އެވެ.