މިދިޔަ ޖުލައި މަހުގެ ނިޔަލަށް ލީސް ޕީރިއަޑް އެކްސްޓެންޝަންގެ ގޮތުގައި ޖުލައި މަހުގެ ނިޔަލަށް 30 މިލިއަން ޑޮލަރު ނުވަތަ 469 މިލިއަން ރުފިޔާ ވަނީ ދައުލަތަށް ލިބިފަ އެވެ. މިހާތަނަށް ހަތް ރިސޯޓަކުން 99 އަހަރަށް މުއްދަތު އިތުރުކޮށްފައިވެ އެވެ.
ޓޫރިޒަމް ގާނޫނަށް ބަދަލު ގެނެސް، ރިސޯޓް ކުލީގެ މުއްދަތު އިތުރު ކުރުމަށް ރިސޯޓް ވެރިންނަށް ދިން ލުޔާއެކު ދައުލަތުގެ އާމްދަނީ މައްޗަށް ޖެހިލައިފި އެވެ.
މޯލްޑިވްސް އިންލެންޑް ރެވެނިއު އޮތޯރިޓީ (މީރާ) ގެ ހިސާބުތައް ދައްކާ ގޮތުން މިދިޔަ ޖުލައި މަހުގެ ނިޔަލަށް ލީސް ޕީރިއަޑް އެކްސްޓެންޝަންގެ ގޮތުގައި ޖުލައި މަހުގެ ނިޔަލަށް 30 މިލިއަން ޑޮލަރު ނުވަތަ 469 މިލިއަން ރުފިޔާ ވަނީ ދައުލަތަށް ލިބިފަ އެވެ.
މިބައިން އާމްދަނީ އިތުރުވެފައިވަނީ "ދިވެހިރާއްޖޭގެ ޓޫރިޒަމާބެހޭ ގާނޫނަށް 13 ވަނަ އިސްލާހު ގެނައުމުގެ ގާނޫނު" ގެ ދަށުން ރިސޯޓު ތަރައްގީކުރަން ދޫކޮށްފައިވާ ރަށްތަކާއި، ބިންތަކުގެ ކުލީގެ މުއްދަތު އިތުރު ކުރަން ދިން ލުއިގެ ސަބަބުންނެވެ. މި ބަދަލާއެކު މިހާތަނަށް ހަތް ރިސޯޓަކުން ވަނީ 50 އަހަރަށް ކުއްޔަށް ނެގި ރިސޯޓުގެ މުއްދަތު 99 އަހަރަށް އިތުރުކޮށްފަ އެވެ.
ދިވެހިރާއްޖޭގެ ޓޫރިޒަމާބެހޭ ގާނޫނަށް 13 ވަނަ އިސްލާހު ގެނައުމާއެކު އެއް ފަހަރާ ފަސް މިލިއަން ޑޮލަރު ދައްކައިގެން ކުލި މުއްދަތު އިތުރު ކުރަން ފުރުސަތު ލިބިގެންދެ އެވެ.
ޓޫރިޒަމް ގާނޫނަށް ގެނައި މި އިސްލާހު ގެޒެޓުކޮށްފައިވަނީ 29، އޮކްޓޫބަރު 2024 ގަ އެވެ. އެ ބަދަލާއެކުރިސޯޓު ނުވަތަ އިންޓަގްރޭޓަޑް ރިސޯޓު ހަދަން ރަށް ނުވަތަ ބިން ކުއްޔަށް ދޫކުރެވެނީ ގިނަވެގެން 50 އަހަރަށެވެ. އަދި ވަކި ޝަރުތުތަކެއް ފުރިހަމަވާ ނަަމަ، އެ މުއްދަތު 49 އަހަރަށް އަނެއްކާ ވެސް އިތުރު ކުރެވެ އެވެ. ފުރަތަމަ ދެ އަހަރު ދުވަހުގެ ތެރޭގައި މުއްދަތު އިތުރު ކުރުމުގެ ފީއެއްގެ ގޮތުގައި ފަސް މިލިއަން ޑޮލަރު އެކީ އެއްފަހަރާ ދެއްކުމަށް އޮތް މާއްދާއަށް ވެސް ވަނީ އިސްލާހު ގެނެސްފަ އެވެ. އެގޮތުން ހަ މަސް ތެރޭގައި ފަސް މިލިއަން ޑޮލަރު އެކީ އެއްފަހަރާ ދެއްކުމަށާއި އޭގެ ފަހުން ދައްކާނަމަ މުއްދަތު އިތުރު ކުރުމުގެ ފީއެއްގެ ގޮތުގައި 10 މިލިއަން ޑޮލަރު އެއްފަހަރާ ދައްކާ ގޮތަށް ވަނީ ބަދަލުކޮށްފަ އެވެ.