"އޭޓީއެމްގެ ސަބަބުން ރައްޔިތުން މާލީ ނިޒާމުގައި ބައިވެރިވުން ދަނީ އިތުރުވަމުން"

ރަށްރަށުގައި އޭޓީއެމްތައް ބަހައްޓަމުން ދިއުމުގެ ސަބަބުން ރައްޔިތުން މާލީ ނިޒާމުގައި ބައިވެރިވުން އިތުރުވަމުންދާ ކަމަށް ގައުމީ ބޭންކް އިން ބުނެފި އެވެ.

ބ. އަތޮޅުގެ ހުރިހާ ރަށެއްގައި އޭޓީއެމް ބަހައްޓަން ހިންގި މަސައްކަތް ނިންމާލުމުގެ ގޮތުން ބ. މާޅޮހުގައި މިއަދު ބޭއްވި ރަސްމިއްޔާތެއްގައި ބީއެމްއެލްގެ ސީއީއޯ / އެމްޑީ މުހައްމަދު ޝަރީފު ވިދާޅުވީ އޭޓީއެމް މަޝްރޫއުގެ ސަބަބުން ބޭންކަށްވެސް މުހިންމު ފައިދާތަކެއް ލިބެމުންދާ ކަމަށެވެ. މިގޮތުން މި ޚިދުމަތާއެކު ބޭންކުގެ ބްރާންޗްކައުންޓަރުން ޚިދުމަތް ހޯދާ ކަސްޓަމަރުން މަދުވަމުންދާކަން އޭނާ ފާހަގަ ކުރެއްވި އެވެ.

"އެހެން ކަމުން މުވައްޒަފުންނަށް ކަސްޓަމަރުންގެ ގާތަށް ގޮސް ބޭންކުގެ އެހެނިހެން ޚިދުމަތުގެ މައުލޫމާތު ދީ ބޭންކިން ނިޒާމަށް މީހުން އަހުލުވެރިކުރުމަށް މަސައްކަތްތައް ކުރެވޭނެ. އަދި އޭޓީއެމް މެދުވެރިކޮށް ބޭންކަށް ވަންނަ ފައިސާ އިތުރުވަމުންދާކަން ވެސް ފާހަގަކުރަން. މިއީ ގިނަ ރައްޔިތުންތަކެއް މާލީ ނިޒާމުގައި ބައިވެރިވަމުންދާ ކަމުގެ ހެއްކެއް،" ޝަރީފު ވިދާޅުވި އެވެ.

ޝަރީފު ވިދާޅުވި ގޮތުގައި ބޭންކްގެ އަމާޒަކީ އެއްވެސް ރައްޔިތަކު ބާކީނުކޮށް ހުރިހާ ރައްޔިތުންނަށް ޚިދުމަތްދިނުން ކަމަށެވެ.

"އޭޓީއެމް ހަމައެކަނި ހުންނަންޖެހޭނީ ވަކި ރަށްތަކެއްގަ ކަމަކަށް މިއަދު ދިވެހި ރައްޔިތުން ގަބޫލެއް ނުކުރާނެ. ގަދަ ވިއްސާރައިގައި ކަނޑު ހުރަސްކޮށް އެހެން ރަށަކަށް ދާން ޖެހުމަކީ ނުހަނު ބޮޑު ބުރައެއް. އަޅުގަނޑުމެން ބޭނުންވަނީ މިކަން ނިމުމަކަށް ގެނެސް މާލީ ކުރިއެރުމުގައި ހުރިހާ ރައްޔިތުން ވެސް ބައިވެރިކުރުވަން،" ޝަރީފު ވިދާޅުވި އެވެ.

އެމްޑީ ވިދާޅުވީ ބ. އަތޮޅަށް މިއަދަކީ ތާރީހީ ދުވަހެއް ކަމަށާ ބ. އަތޮޅުގައި މިހާތަނަށް އޭޓީއެމްގެ ޚިދުމަތް ނުދެވި އޮތް 10 ރަށުގައި އޭޓީއެމް ޚިދުމަތް ދޭން ފެށި، މުޅި ބ. އަތޮޅުގެ މީހުން ދިރިއުޅޭ ހުރިހާ ރަށަކަށް މިވަނީ މިހާރު އޭޓީއެމް ހިދުމަތް ދެވިފައިވާ ކަމަށެވެ.

"މިއީ ރައީސުލްޖުމްހޫރިއްޔާ ޑރ. މުއިއްޒުގެ ޚާއްސަ އިރުޝާދާއެކު އަޅުގަނޑުމެން މުޅި ރާއްޖެ އަށް ބީއެމްއެލް އޭޓީއެމް' ނަމުގައި ފެށި ޚާއްސަ މަޝްރޫއުގެ ދަށުން މީހުން ދިރިއުޅޭ ހުރިހާ ރަށެއްގައި އޭޓީއެމް ބެހެއްޓުމަށް ކުރެވޭ މަސައްކަތުގެ ތެރެއިން ފުރިހަމަކުރި ލަނޑުދަނޑިއެއް،" ޝަރީފު ވިދާޅުވި އެވެ.

އޭޓީއެމްގެ ހިދުމަތުގެ ތާރީހެއް - ބީއެމްއެލް އިން ރާއްޖޭގައި އޭޓީއެމް ހިދުމަތް ދޭން 2000 ވަނަ އަހަރު އިފްތިތާހުކޮށްދެއްވީ އޭރުގެ ރައީސުލްޖުމްހޫރިއްޔާ އަލްއުސްތާޛު މައުމޫން ޢަބްދުލްގައްޔޫމް އެވެ. ފުރަތަމަ މާލޭގައި ބެހެއްޓީ ފަސް އޭޓީއެމް އެވެ. އެއަށްފަހު އަތޮޅުތެރެއަށް އޭޓީއެމް ޚިދުމަތް ދޭން ފެށުނީ އޭގެ ހަތް އަހަރުފަހުން އެވެ. އަދި 2007 ވަނަ އަހަރު އެ މަސައްކަތުގެ ދަށުން 19 ރަށެއްގައި އޭޓީއެމް ބެހެއްޓި އެވެ. އަދި 2008 ވަނަ އަހަރުން ފެށިގެން 2023 ވަނަ އަހަރާ ހަމަޔަށް އިތުރު 68 ރަށުގައި އޭޓީއެމް ޚިދުމަތް ފެށި އެވެ. އަދި މިދިޔަ އަހަރު ނުވަ ރަށެއްގައި އޭޓީއެމް ޚިދުމަތް ފެށި އެވެ. މިއާއެކު އެހެންކަމުން މިދިޔަ އަހަރު ނިމުނު އިރު މާލެ ފިޔަވައި މީހުން ދިރިއުޅޭ ރަށްތަކުގެ ތެރެއިން ޖުމްލައެކު 96 ރަށެއްގައި އަޅުގަނޑުމެން ދިޔައީ އޭޓީއެމް ހިދުމަތް ދޭނެ އެވެ.

ޝަރީފު ވިދާޅުވީ ރާއްޖޭގައި އޭޓީއެމް ހިދުމަތް ދޭން ފެށިތާ 25 އަހަރުވީއިރު، މީހުން ދިރިއުޅޭ ދެބައި ކުޅަ އެއްބަޔަށް ވުރެ ގިނަ ރަށްތަކަކަށް މި ހިދުމަތް ގާއިމްވެފައި ނެތުމުން ރައްޔިތުންނަށް އަސާސީ ބޭންކިން ހިދުމަތް ހޯދުމަށް ޖެހެނީ ހަރަދުކޮށްފަ އެހެން ރަށަކަށް ދަތުރު ކުރާ ގޮތަށް ކަމަށާ ނޫންނަމަ ބޭންކުގެ ދޯނި އަންނަ ދުވަހަކަށް ނުވަތަ މުވައްޒަފުން އަންނަންދެން ރަށުގައި މަޑުކުރަން ޖެހޭ ކަމަށެވެ

"ހާލަތު މިހެން އޮތަތީވެ، ރައީސް ޑރ. މުހައްމަދު މުޢިއްޒުގެ އުންމީދަކަށްވީ ކޮންމެ އަތޮޅެއްގެ ކޮންމެ ރަށެއްގައި ތިބގެންވެސް މާލީ ނިޒާމުގައި ބައިވެރިވުމުގެ ފުރުސަތު އޮތުން. ދަތުރުކުރަން ނުޖެހި ބޭނުން ވަގުތަކު އަސާސީ ބޭންކިންގ ލިބޭނެ މަގުފަހިވެފަ އޮތުން. އެހެންކަމުން މިދިޔަ ނޮވެންބަރު މަހު ރައީސުލްޖުމްހޫރިއްޔާ ވަނީ ' މުޅި ރާއްޖެ އަށް ބީއެމްއެލް އޭޓީއެމް' މަޝްރޫއު ފައްޓަވައި ދެއްވައި ވީހާވެސް އަވަހަކަށް މި މަޝްރޫއު ނިންމައި ދިނުމަށް އަޅުގަނޑުމެންނަށް އިރުޝާދު ދެއްވާފައި. އަދި ރައީސް މި މަޝްރޫއު ވަރަށް ގާތުން ބައްލަވާކަންވެސް އަޅުގަނޑު ފާހަގަކުރަން،" ޝަރީފު ވިދާޅުވި އެވެ.

އެމްޑީ ޝަރީފު ވިދާޅުވީ މިދިޔަ ނޮވެންބަރު މަހު ފެށި މިމަސައްކަތަށް ބަލާއިރު، މިއަހަރުގެ މިހާތަނަށް 47 ރަށެއްގައި މިވަނީ އޭޓީއެމް ޚިދުމަތް ފަށާފައިވާ ކަމަށެވެ.

" ހަތް އަތޮޅެއްގައި މީހުން ދިރިއުޅޭ ހުރިހާ ރަށެއްގައި މިވަނީ ޚިދުމަތް ގާއިމްކޮށްފަ. މި އަތޮޅުތަކަކީ ދ، ހއ، ނ، މ، ށ، ކ އަދި ބ އަތޮޅު. މިވަގުތު އިތުރު 5 އަތޮޅެއްގެ 23 ރަށެއްގައި އޭޓީއެމް ޚިދުމަތް ފެށުމަށް އަޅުގަނޑުމެން މިވަނީ ތައްޔާރުވެފަ. ދެން ބާކީ 7 އަތޮޅުގެ 33 ރަށުގައި ކުރިއަށް އޮތް ދެތިން މަސްދުވަސްތެރޭ އޭޓީއެމް ޚިދުމަތްގާއިމްކޮށް މި މަޝްރޫއު ކާމިޔާބުކަމާއެކީ ނިންމާލުމަކީ އަޅުގަނޑުމެންގެ އަމާޒު،" ޝަރީފު ވިދާޅުވި އެވެ.

ޝަރީފު ފާހަގަ ކުރެއްވި ގޮތުގައި އޭޓީއެމް އިން މިދެވޭ ޚިދުމަތަކީ ރާއްޖޭގެ ކޮންމެ ރަށަކަށްވެސް އަސާސީ ބޭންކިން ހިދުމަތް ފޯރުކޮށްދިނުމަށް އޮތް އެންމެ ފުރިހަމަ އެއް ވަސީލަތެވެ.