ހަލީލް ވިދާޅުވީ ކަނޑުން ގެއްލުނު ބައި ހޯދަން އުނދަގޫވަނީ ސޯލިހު ފޮނުއްވި ސިޓީގެ ސަބަބުން ކަމަށް

ޗާގޯސްގެ ރަށްތަކުގެ ސިޔާދަތާ ގުޅޭ ގޮތުން ރާއްޖެއިން ޒަމާނުއްސުރެ ގެންގުޅެމުންދިއަ ސިޔާސަތު ނިމިދިޔަ ސަރުކާރުން ބަދަލުކޮށް، ކުރީގެ ރައީސް އިބްރާހިމް މުހައްމަދު ސޯލިހު، މޮރިޝަސްގެ ބޮޑުވަޒީރަށް ފޮނުއްވި ސިޓީގެ ސަބަބުން، ރާއްޖެއަށް ގެއްލުނު ކަނޑުގެ ސަރަހައްދު ހޯދަން ކުރާ މަސައްކަތަށް ދަތިވާ ކަމަށް ފޮރިން މިނިސްޓަރު ޑރ. އަބްދުﷲ ހަލީލް މިއަދު ވިދާޅުވެއްޖެ އެވެ.

ޗާގޯސްގެ ސިޔާދަތީ ބާރުވެރިކަން އޮތީ މޮރިޝަސްއަށް ކަމަށް ގަބޫލުކޮށް ރައީސް ސޯލިހު އެ ގައުމުގެ ބޮޑުވަޒީރަށް ފޮނުވި ސިޓީގެ މައްސަލަ އޮތީ ބޮޑުވެފަ އެވެ. އިޓްލޮސްގެ ނިންމުމުގެ ސަބަބުން ރާއްޖޭގެ އީއީޒެޑުން 44،000 އަކަކިލޯމީޓަރުގެ ބޮޑު ސަރަހައްދެއް ގެއްލިފައިވާ ކަަމަށް އޭރުގެ އިދިކޮޅު ޕާޓީތަކާއި ކުރީގެ ބައެއް ބަންޑާރަ ނާއިބުން ގެންދެވީ ވިދާޅުވަމުންނެވެ.

އޭގެ ފަހުން ރައީސް މުއިއްޒުގެ ސަރުކާރުން، ރާއްޖޭގެ އެ ނިންމުން އަލުން މުރާޖާ ކުރާނެ ކަމަށާއި، ޗާގޯސްގެ ރަަށްތަކުގެ ސިޔާދަތުގެ މައްޗަށް ދައުވާކުރުމުގެ ހައްގު އަލުން ހޯދާނެ ދެއްވާނެ ކަމަށް ރިޔާސީ ވައުދެއްގެ ގޮތުގައި ވިދާޅުވެ، އެ މަސައްކަތް ވަނީ ފަށައިފަ އެވެ.

އެ މަސައްކަތާ ގުޅޭގޮތުން، ރައްޔިތުންގެ މަޖިލީހުގެ ޖަލްސާގައި މެމްބަރަކު ކުރެއްވި ސުވާލަކަށް ޖަވާބު ދެއްވަމުން ހަލީލް ވިދާޅުވީ، ރައީސް ސޯލިހު އެ ސިޓީ ނުފޮނުއްވި ނަމަ، ގެއްލުނު ކަނޑުގެ މައްސަލައިގައި ސާފުކޮށް ރާއްޖެއަށް ކުރިއަށް ދެވެން އޮތް ކަމަށެވެ. 

"ހަގީގަތަކީ އެ ސިޓީ ބޭރުނުވި ނަމަ، މިދިޔަ ސަރުކާރުން ދޫނުކުރިނަމަ، ކަނޑުގެ މައްސަލައާއި އޭގެ އިތުރުން ފޯޅަވަހި މައްސަލައަކީ ވަރަށް ސާފުކޮށް ދިވެހީންނަށް ކުރިއަށް ދެވެން އޮތް މައްސަލައެއްގެ ގޮތުގައި އަޅުގަނޑުމެންނަށް ފާހަގަކުރެވޭ މައްސަލައެއް އެ މައްސަލައަކީ،" އޭނާ ވިދާޅުވި އެވެ.

އެހެންކަމުން، މިހާރު ކުރިއަށް ދަނީ ބޭރުގެ އެކި ގާނޫނީ ވަކީލުންނާ އެކީ މައްސަލަ އިތުރަށް މުރާޖައާކުރުމުގެ މަސައްކަތް ކަމުގައި މިނިސްޓަރު ވިދާޅުވި އެވެ.