މާމަޑުއްވަރީގެ އެގްރިމެންޓް ބާތިލުކޮށް، ހިތާދޫ ރައްޔިތުންނަށް ދެނީ

ޓޫރިޒަމްގެ ބޭނުމަށް ބ. މާމަޑުއްވަރީ ދޫކޮށްފައި އޮތް އެގްރިމެންޓް ބާތިލުކޮށް، އެރަށް އެއަތޮޅު ހިތާދޫގެ އިހުތިސޯސްގެ ތެރޭގައި ހިމަނުއްވައިދެއްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

މާމަޑުއްވަރީއަކީ ކުރީގައި ހިތާދޫ ރައްޔިތުން ފުޅާދާއިރާއެއްގައި ދަނޑުވެރިކަން ކުރަމުން ދިޔަ ރަށެކެވެ. އެރަށުގައި ރިސޯޓެއް ތަރައްގީ ކުރުމަށް ހަވާލުކޮށްފައި ވަނީ ކޯސްޓްލައިން އިންވެސްޓްމެންޓް ޕްރައިވެޓް ލިމިޓެޑް ކިޔާ ކުންފުންޏަކާ އެވެ. ނަމަވެސް އެ މަސައްކަތް ކުރިއަކަށް ނުދެ އެވެ.

ބ. އަތޮޅަށް ރައީސް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، ހިތާދޫއަށް މިއަދު ވަޑައިގެން ވާހަކަ ދައްކަވަމުން ވިދާޅުވީ އެކުންފުންޏާއެކު ސަރުކާރުންވެފައިވާ އެއްބަސްވުމާ އެއްގޮތަށް މަސައްކަތްތައް ކުރިއަށް ނުދާ ކަމަށެވެ.

އަދި، އެރަށަކީ ކުރީ ޒަމާނުގައި ހިތާދޫ ރައްޔިތުން އެކި މަސައްކަތް ކުރަން ބޭނުންކުރި ރަށަކަށްވެފައި، މިހާރުވެސް ރަށު ރައްޔިތުން އެރަށް ބޭނުންވާކަން ރައީސް ފާހަގަކުރެއްވި އެވެ.

"މިދެންނެވި އެގްރިމެންޓް ގާނޫނާ ގަވާއިދުގެ ތެރެއިން އޮންނަ އުސޫލުގެ ތެރެއިން ނިމުމަކަށް ގެނެސް، އެރަށް [މާމަޑުއްވަރީ] ހިތާދޫއާ ހަވާލުކުރާނެ ވާހަކަ އަޅުގަނޑުމެން ނިންމާ ވާހަކަ ދަންނަވަން،" ރައީސް ވިދާޅުވި އެވެ.

ރައީސް ވިދާޅުވީ ޓޫރިޒަމް މިނިސްޓްރީ އާއި އެޖާނީ ޖެނެރަލް ގުޅިގެން އެ މަސައްކަތް ކުރިއަށް ގެންދަވާނެ ކަމަށެވެ. އަދި، އެގްރިމެންޓް ބާތިލު ކުރުމުގެ މަސައްކަތް ނިމުނުހާ އަވަހަކަށް ހިތާދޫ ރައްޔިތުންނާ މާމަޑުއްވަރީ ހަވާލުކުރައްވާނެ ކަމަށެވެ.

"އަޅުގަނޑު އުންމީދު ކުރަނީ މިރަށުގެ ތައްރައްގީއަށް އިންޑިވިޖުއަލް ރައްޔިތުންގެ އިގްތިސޯދީ ކުރިއެރުމަށް މުއްސަނދިކަން ހާސިލުވާ ގޮތަށް އެރަށުގެ ބޭނުން ކުރައްވާނެ ކަމަށް،" ރައީސް ވިދާޅުވި އެވެ.

އެ ރަށާ ހަވާލުވާ ހިސާބުން ރަށުގެ ހުރިހާ ރައްޔިތުންނަށް ފައިސާވާ ގޮތަށް އެ ރަށުގެ ބޭނުން ހިފުމަށް ރައީސް ވަނީ އިލްތިމާސްކުރައްވާފަ އެވެ.