ސައުދީ "ޕްރިންސް"އާ ގުޅޭގޮތުން ހަލީލް ދެއްވި ޖަވާބާމެދު ނުރުހި، އަޑުގަދަކުރާތީ މީކާއިލް ނެރެފި

ގަތަރުގެ ކުންފުންޏަކާ ހަދަން ހަވާލު ކުރި ފައިނޭންޝަލް ސެންޓަރުގެ ހުޅުވުމުގެ ރަސްމިއްޔާތަށް، ވަޑައިގެންނެވި ފަހުދު ސައުދު އަލް ޝަލަން އަކީ ސައުދީ އަރަބިއްޔާގެ ޕްރިންސެއް ކަމާމެދު ފޮރިން މިނިސްޓަރު ޑރ. އަބްދުﷲ ހަލީލް ދެއްވި ޖަވާބާ މެދު ހިތްހަމަނުޖެހިވަޑައިގެން ތަޅުމުގައި އަޑުގަދަ ކުރައްވާތީ، ގަލޮޅު ދެކުނު ދާއިރާގެ މެމްބަރު މީކާއީލް އަހުމަދު ނަސީމްގެ ނަން އިއްވައި ތަޅުމުން ނެރެފި އެވެ. 

އިންވެސްޓަރެއްގެ ހައިސިއްޔަތުން ފައިނޭންޝަލް ސެންޓަރުގެ ހުޅުވުމުގެ ރަސްމިއްޔާތަށް ވަޑައިގެންނެވި އަލް ޝަލަން އާ ރައީސް ޑރ. މުހައްމަދު މުއިއްޒު ވެސް ވަނީ ބައްދަލުކުރައްވައިފަ އެވެ. 

އެކަމާ ގުޅުވައި، މީކާއިލް، ހަލީލް އާ ސުވާލުކުރައްވަން ހުށަހެޅުއްވީ އަލް ޝަލަން އަކީ ސައުދީގެ ޝާހީ އާއިލާއަށް ނިސްބަތްވާ މީހެއްތޯ ސާފުކުރުމަށެވެ. އަދި ރައީސް އޮފީހުގައި ރައީސް އާއެކު ބޭއްވި ބައްދަލުވުމުގައި ސައުދީ އެމްބަސީން ބައިވެރިނުވީ ކީއްވެގެންތޯ އާއި އެ ކަމުގެ ސަބަބުން ރާއްޖެ އާއި ސައުދީއާ ދެމެދު އޮތް ގުޅުމަށް އެއްވެސް ނޭދެވޭ އަސަރެއް ކޮށްފައިވޭތޯ މީކާއިލްގެ ސުވާލުގައި ހިމަނާފައި ވެ އެވެ.

މަޖިލީހުގެ މިއަދުގެ ޖަލްސާގައި އެ ސުވާލަށް ޖަވާބު ދެއްވަމުން ހަލީލް ވިދާޅުވީ، އަލް ޝަލަން އަކީ، ސައުދީ ރަސްގެފާނުގެ އަންހެން ބޭކަނބަލެއްގެ ދަރިކަލެއް ކަމަށެވެ. 

އަދި ނުރަސްމީކޮށް ވިޔަފާރީ ދަތުރުފުޅެއްގައި ވަޑައިގެން، ރައީސްއާ ބައްދަލުކުރައްވާއިރު، ގައުމުތަކުގެ ހާރިޖިއްޔާ ބައިވެރިކުރުމަކީ ރައީސަށް ލިބިވަޑައިގަންނަވާ އިހުތިޔާރެއް ކަމަށެވެ. އެހެންކަމުން، މި ބައްދަލުކުރެއްވުމުގައި ސައުދީ އެމްބަސީ ބައިވެރިނުކުރެއްވީ، އަމިއްލަފުޅު ހައިސިއްޔަތުން އަލް ޝަލަން ވަޑައިގެން ހުންނެވުމުން ކަމަށް ވެސް ހަލީލް ވިދާޅުވި އެވެ.

ސައުދީއާ އެކު ގުޅުން މި ސަރުކާރުގައި އިތުރަށް ބަދަވެހިވެފައިވާ ކަމަށާއި، އެ ގައުމުން ރާއްޖެއަށް ފޯރުކޮށްދިން އެހީތެރިކަމުން ވެސް އެކަން ސާފުވާނެ ކަމަށް އޭނާ ވިދާޅުވި އެވެ.

ނަމަވެސް، މީކާއީލް ވިދާޅުވީ އޭނާ ކުރެއްވި ސުވާލަށް މިނިސްޓަރު ސީދާ ޖަވާބެއް ނުދެއްވާ ކަމަށެވެ. މިގޮތުން، ފާޑުކިޔުންތައް އަމާޒުވުމުން، އަލް ޝަލަން އާ ރައީސް ބައްދަލުކުރެއްވި ހަބަރު، ރައީސް އޮފީހުގެ ވެބްސައިޓުން ޑިލީޓުކުރީ ގޯސްކޮށް ކަމެއް ހިނގައިގެން ކަން ގަބޫލުކުރައްވަންތޯ މީކާއީލް ވަނީ ތަކުރާރުކޮށް ސުވާލުކުރައްވައިފަ އެވެ.

އެ ސުވާލަށް ވެސް ހަލީލް ސީދާ ޖަވާބެއް ނުދެއްވުމުން، މީކާއީލް ވަނީ ހިތްހަމަނުޖެހިވަޑައިގެން، ތަޅުމުގައި އަޑުގަދަކުރައްވައިފަ އެވެ.

ރިޔާސަތުގައި އިންނެވި މަޖިލީހުގެ ރައީސް އަބްދުއްރަހީމް އަބްދުﷲ ތަކުރާރުކޮށް ނަސޭހަތްތެރިވުމުން ވެސް، މީކާއީލް ވަނީ ތަޅުމުގައި އަޑުގަދަކުރައްވައި، އެ ސުވާލަށް ޖަވާބު ބޭނުންވާ ކަމަށް ވިދާޅުވެފަ އެވެ.

އަޑުގަދަކުރުން ނުހުއްޓުވުމުން، މަޖިލީހުގެ ރައީސް ވަނީ މީކާއީލްގެ ނަން އިއްވައި، މަޖިލީހުގެ ތަޅުން ދޫކޮށް ނުކުމެވަޑައިގެންނެވުމަށް އަންގަވައިފަ އެވެ.

އޭގެފަހުން، އެމްޑީޕީގެ ބައެއް އެހެން މެމްބަރުން ވެސް އަޑުގަދަކުރައްވަމުން ގެންދެވި އެވެ. ނަމަވެސް، ރިޔާސަތުން ނަސޭހަތްތެރިވުމުން އެ މެމްބަރުން ވަނީ ޖަލްސާ ކުރިއަށް ގެންދަން ޖާގަ ދެއްވައިފަ އެވެ.