އެމްއެމްއޭގެ ދިރާސާ | މާލޭ ކުލިތައް ދަށްވިޔަސް ހުޅުމާލޭގައި ދަނީ އުފުލެމުން
އެމްއެމްއޭއިން 2023 އިން 2024 ފެށުމާ ހަމައަށް ހެދި ދިރާސާއިން ދައްކާ ގޮތުން މާލޭގެ އެވްރެޖު ކުލި ދަނީ ދަށްވަމުންނެވެ. ހަމަމިއާއެކު ހުޅުމާލޭގެ ޑިމާންޑް މަތިވެ ކުލީގެ އަގުތައް ވަނީ އުފުލިފަ އެވެ.
މާލޭގައި އުޅެން ބޭނުންވާ މީހުންގެ އަދަދު މަދުވެ، ބޯހިޔާވަހިކަމުގެ ޑިމާންޑް ހުޅުމާލެ އަށް ބަދަލުވަމުންދާއިރު މާލޭގެ ކުލިތައް ދަަށްވެ ހުޅުމާލޭގައި އުފުލެމުންދާކަމަށް މަރުކަޒީ ބޭންކްގެ ދިރާސާ އިން ދައްކައިފި އެވެ.
އެމްއެމްއޭގެ ރިސާޗް ޓީމަކުން ރާއްޖޭގައި އެޕާޓްމަންޓް ކުއްޔަށްދޭން އެންމެ ގިނައިން ޖަހާ އެއް އޮންލައިން ޕްލެޓްފޯމް ކަމަށްވާ އައިބޭއިން ނެގި ތަފާސް ހިސާބުތަކެއްގެ މައްޗަށް ވަނީ ދިރާސާއެއް ހަދައިފަ އެވެ. އެގޮތުން 2023 ފެބްރުއަރީ މަހުން 2024 އަހަރުގެ ޖެނުއަރީ މަހުގެ ނިޔަލަށް ތައްޔާރުކުރި ކުލީގެ އަގުތަކަށް އައިސްފައިވާ ބަދަލު ދައްކުވައިދޭ ދިރާސާ އިން ދައްކާ ގޮތުން، މާލޭގައި އަހަރުތަކެއް ވަންދެން އޮތް ބޯހިޔާވަހިކަމުގެ ޑިމާންޑް ހަލުވިކަމާއެކު ވަނީ ހުޅުމާލެ އަށް ބަދަލުވާން ފަށާފަ އެވެ.
މަރުކަޒީ ބޭންކުގެ މި ދިރާސާ ދައްކާ ގޮތުން މާލޭގައި ކުރިން އޮތް ބޯހިޔާވަހިކަމުގެ ޑިމާންޑް ދަނީ މާލެއިން ފައިބަމުންނެވެ.
ހުޅުމާލޭގައި ދިރިއުޅުން ބަދަލުވާ މީހުންގެ އަދަދު އިތުރުވުމާއެކު ހުޅުމާލޭގެ ކުލީގެ އަގުތައް ވެސް ވަނީ މައްޗަށް ޖެހިލާފަ އެވެ. މިގޮތުން މި ދިރާސާ ފެށި 2023 ޖެނުއަރީ މަހު ހުޅުމާލޭގައި އެޕާޓްމަންޓެއްގެ އެވްރެޖުކޮށް ކުއްޔަށް ލިބޭ އަގު ހުރީ 14309.55ރ. އެވެ. ނަމަވެސް ދިރާސާ ނިމުމަކަށް ގެނައި މިދިޔަ އަހަރުގެ ޖެނުއަރީ މަހާ ހަމައަށް ބަލާނަމަ އެވްރެޖު އަގުތައް 18442.26ރ. އަށް ޖެހިލާފައިވެ އެވެ. މިއީ ޕަސެެންޓޭޖުން ބަލާނަމަ ފަސް ޕަސެންޓަށްވުރެ ބޮޑު ތަނުން އުފުލުމުކެވެ. ހުޅުމާލޭގައި ކުލިތައް މައްޗަށް ދިޔަނަމަވެސް ވިލިނގިލި ހިމަނައިގެން ބަލާނަމަ ކުއްޔަށް ލިބޭ އަގުތައް ވަނީ ވަނީ ދަށްވެފަ އެވެ. އެންމެ ބޮޑަށް ދަށްވުމެއް އައިސްފައިވާ ކަމަށް ދައްކަނީ ގަލޮޅުގަ އެވެ. އެ އަވަށުގައި އެޕާޓްމަންޓުގެ އަގުތައް ވަނީ 40 ޕަސެންޓް ވަރު ދަށްވެފަ އެވެ.
ތިން ކޮޓަރީގެ އަގުތައް އެންމެ އުފުލުނީ 2023 ޖުލައި މަހު
ދިރާސާ އިން ދައްކާ ގޮތުން އެއް ކޮޓަރީގެ އެޕާޓްމަންޓުގެ އަގު އެންމެ ބޮޑަށް އުފުލިފައިވަނީ 2023 ޑިސެމްބަރު އަދި 2024 ޖެނުއަރީ މަހު އެވެ. އަދި އެންމެ ބޮޑަށް މައްޗަށް ޖެހިލާފައިވަނީ ހެންވޭރާއި މާފަންނުގަ އެވެ. އަދި 2023 ނޮވެމްބަރު މަހު ގަލޮޅުގައި ދެ ކޮޓަރީގެ އެޕާޓްމަންޓުގެ އަގުތައް މައްޗަށް ގޮސްފައިވެ އެވެ. އަދި ތިން ކޮޓަރީގެ އެޕާޓްމަންޓުގެ އަގުތައް 2023 ޖުލައި މަހު 30،000 ގާތަށް އުފުލިފައިވެ އެވެ. އަދި އަގުތައް އެންމެ ބޮޑަށް މައްޗަށް ގޮސްފައިވަނީ ހުޅުމާލޭގަ އެވެ.
ކޮމެންޓް
Republic of Maldives