ދެ ޓްރިލިއަން ޑޮލަރުގެ ދުނިޔޭގެ އެންމެ ބޮޑު އެއް ވެލްތް ފަންޑުން އިޒްރޭލުގެ 11 ކުންފުންޏެއް ބޭރުކޮށްލަން ނިންމީ ފަލަސްތީނުގެ ރައްޔިތުންނަށް ދޭ އަނިޔާތަކާ ގުޅިގެން ނޯވޭ ސަރުކާރުންނެވެ،
ދުނިޔޭގެ އެންމެ ބޮޑު ސޮވްރިން ވެލްތް ފަންޑް ކަމަށްވާ ނޯވޭގެ ދެ ޓްރިލިއަން ޑޮލަރުގެ ސޮވަރިން ވެލްތު ފަންޑުން އިޒްރޭލުގެ ގިނަ އަދަދެއްގެ އިންވެސްޓަރުން ބޭރުކޮށްލައިފި އެވެ.
ދުނިޔޭގެ ބޮޑެތި ގިނަ ކުންފުނިތަކެއް އިންވެސްޓްކޮށްފައިވާ ނޯވޭގެ ދެ ޓްރިއަން ޑޮލަރުގެ ބޮޑު ސޮވްރިން ވެލްތް ފަންޑުން އިޒްރޭލުގެ 11 ކުންފުންޏެއް ބޭރުކޮށްލާފައިވަނީ ނޯވޭ ސަރުކާރުންނެވެ. މި ފިޔަވަޅު އަޅާފައިވަނީ ގާޒާ އާއި ފަލަސްތީނުގެ ރައްޔިތުންނަށް އިޒްރޭލުން ކުރަމުންދާ ލާއިންސާ އަނިޔާތަކާއި ނަސްލު ނައްތާލުމުގެ ޖަރީމާތަކާ ދެކޮޅު ހެދުމުގެ ގޮތުންނެވެ.
ނޯވޭގެ ސޮވްރިން ފަންޑުގައި އިންވެސްޓްކޮށްގެން ތިބި ކުންފުނިތަކުގެ ތެރޭން ބޭރުކޮށްލި ކުންފުނިތަކުގެ ތެރޭގައި އިޒްރޭލުގެ އަސްކަރިއްޔާއާ ގުޅުންހުރި ގިނަ ކުންފުނިތަކެއްވެސް ހިމެނެ އެވެ. މިގޮތުން އެ ގައުމުގެ އަސްކަރިއްޔާގައި ބޭނުންކުރާ ހަނގުރާމަ މަތީ މަތިންދާ ބޯޓުތަކަށް މެއިންޓަނަންސް ހިދުމަތްދޭ ކުންފުނިތަކުގެ އިތުރުން ފައިޓާ ޖެޓްތަކާ ގުޅުންހުރި ހިދުމަތްދޭ ކުންފުނިތަކެއްވެސް ހިމެނެ އެވެ.
މި ފަންޑުގައި އިޒްރޭލުގެ 61 ކުންފުންޏެއް އިންވެސްޓްކޮށްގެން ހަރަކާތްތެރިވާއިރު 11 ކުންފުނި ބޭރުކޮށްލުމާ ބެހޭ ގޮތުން މި ފަންޑުގެ ސީއީއޯ ނިކޮލައި ޓަންގޭން ނެރުނު ބަޔާނެއްގައި ބުނީ ކުރިމަގުގައި އިތުރު ފިޔަވަޅުތަކެއް އަޅާނެ ކަމަށާއި، މިވަގުތު މި ކުންފުނިތަކުގެ ހިއްސާ އެއްކޮށް ވިއްކާލާފައިވާ ކަމަށެވެ.