އީޕީއޭގެ ބާރުތައް މިނިސްޓްރީއަށް ނެގުމުން ފައްޔާޒްގެ ގިނަ ކަންބޮޑުވުންތަކެއް

އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ) ގެ ނަން ބަދަލުކޮށް އެ ތަނުގެ މަސައްކަތްތައް އެންވަޔަރުމެންޓް މިނިސްޓްރީގެ ދަށަށް ބަދަލުކުރުމުން، އެމްޑީޕީގެ ޗެއާޕާސަން ފައްޔާޒް އިސްމާއިލް ކަންބޮޑުވުންފާޅު ކުރައްވައިފި އެވެ. 

އެންވަޔަރަމެންޓް ޕްރޮޓެކްޝަން އެޖެންސީ (އީޕީއޭ) ގެ ނަން އެންވަޔަރަންމަންޓަލް ރެގިއުލޭޓަރީ އޮތޯރިޓީއަށް ބަދަކޮށް، ޓޫރިޒަމް މިނިސްޓްރީގެ ދަށުން ހިންގާ އިދާރާއަކަށް ބަދަލުކުރީ ރައީސުލްޖުމްހޫރިއްޔާ އަށް ލިބިވަޑައިގަންނަވާ އިހުތިޔާރުގެ ދަށުން މިއަދު އެވެ.

ރައީސް އޮފީހުން ބުނީ މި ބަދަލާއެކު، މިހާތަނަށް ގަވަނިންގް ބޯޑެއްގެ ލަފާގެ ދަށުން ހިންގި އިދާރާއެއްގެ ގޮތުގައި އެ އިދާރާ އޮތް ހައިސިއްޔަތު ބަދަލުވެފައިވާ ކަމަށެވެ. މިހާރު އެއީ ސީދާ ޓޫރިޒަމް އެންޑް އެންވަޔަރަންމަންޓު މިނިސްޓްރީގެ ދަށުން ހިނގަމުންދާ ޑިޕާޓްމެންޓެކެވެ.

އެކަމާ ގުޅިގެން ފައްޔާޒް އެކްސްގައި މި ބަދަލު ސިފަކުރެއްވީ ތިމާވެށި ހިމާޔަތް ކުރުމަށް ރާއްޖޭން ކުރާ މަސައްކަތުގައި ފަހަތަށް އެޅުނު ފިޔަވަޅެއްގެ ގޮތަށެވެ. 

ގަވާއިދުތައް ތަންފީޒުކުރުން މުރާޖައާކޮށް ހަރުދަނާކުރުމަކީ ރަނގަޅު ކަމެއް ނަމަވެސް، މިނިވަން އިދާރާއެއްގެ ގޮތުގައި ހިނގަމުން އައި އީޕީއޭ ސަރުކާރުގެ ދަށަށް ގެންދިޔުމަކީ ނުހަނު ކަންބޮޑުވުން އޮތް ކަމެއް ކަމަށް ފައްޔާޒް ވިދާޅުވި އެވެ.

"ހިތާމައަކީ މި ފިޔަވަޅަކީ ދައުލަތުގެ ފާރަވެރިވުމުގެ ނިޒާމު ރޫޅާލައި، ހުރިހާ ބާރުތަކެއް ރައީސްގެ އަތްޕުޅަށް ޖަމާކުރުމަށް ނިޒާމީ ގޮތެއްގައި ރޭވިގެން ހިންގަމުންދާ މަސައްކަތަށް އިތުރުވި ބޮޅެއް،" އޭނާ ވިދާޅުވި އެވެ.

ތިމާވެއްޓަށް ލިބޭނެ ގެއްލުމުގެ އިތުރުން، ފައްޔާޒް ވިދާޅުވި ގޮތުގައި، މި ބަދަލުގެ ސަބަބުން އިންވެސްޓަރުން ރާއްޖެއަށް ކުރާ އިތުބާރު ވެސް ގެއްލޭނެ އެވެ. 

މި ބަދަލު ގެނެސްފައި ވަނީ، އީޕީއޭ އިން މިހާތަނަށް ކުރަމުންގެންދާ މައިގަނޑު މަސައްކަތްތަކަކީ ރާއްޖޭގެ ތިމާވެށްޓާބެހޭ ކަންކަން ރެގިއުލޭޓްކުރުމާ ގުޅުންހުރި މަސައްކަތްތަކެއް ކަމަށްވާތީ، އެ އިދާރާއިން ކުރަމުންގެންދާ މައިގަނޑު މަސައްކަތްތަކާ ވީހާވެސް ގުޅުންހުރި ނަމެއް ހަމަޖެއްސުމަށް ކަމަށް ރައީސް އޮފީހުން ބުންޏެވެ.

އީޕީއޭގެ ނަން ބަދަލުކޮށްފައިވާއިރު، މިއަދު ވަނީ އެތަނުގެ ބާރުތައް ހަނިވާ ގޮތަށް، ތިމާވެއްޓަށް އަސަރު ފޯރާނެ މިންވަރު ބަޔާންކުރާ ރިޕޯޓު ނުވަތަ އީއައިއޭ ހެދުމާ ގުޅޭ ގަވައިދަށް އިސްލާހުތަކެއް ގެނެސްފަ އެވެ. އެ އިސްލާހުތަކުގެ ތެރޭގައި އީޕީއޭއިން ކުރަމުން އައި މަސައްކަތުގެ ބޮޑެތި ބާރުތަކެއް ސަރުކާރަށް ނުވަތަ މިނިސްޓަރަށް ލިބޭނެ އެވެ.