މަޖިލީހުގެ ދެވަނަ ދައުރު އިތުރު ހަފްތާއަކަށް ދަންމާލައިފި

ރައްޔިތުންގެ މަޖިލީހުގެ މި ހިނގާ ދެވަނަ ދައުރު އިތުރު ހަފްތާއަކަށް ދަންމާލައިފި އެވެ. 

މަޖިލީހުގެ ގަވާއިދުގައި ބުނާ ގޮތުން މަޖިލީހުގެ މަސައްކަތްތައް ބެހިފައިވަނީ ކޮންމެ އަހަރެއްގައި ވެސް ތިން ދައުރަކަށެވެ. ފުރަތަމަ ދައުރު ހިނގަނީ ފެބްރުއަރީ އެކަކުން ފެށިގެނެ މެއި 15، އަށެވެ. ދެވަނަ ދައުރު ޖޫން މަހުގެ ފުރަތަމަ ދުވަހުން ފެށިގެން އޮގަސްޓު 15، އަށް ނިމޭއިރު ތިންވަނަ ދައުރު ފަށަނީ އޮކްޓޯބަރު މަހުގެ ފުރަތަމަ ދުވަހު އެވެ. އަދި އެ ދައުރު ނިމޭނީ ނޮވެމްބަރު މަހުގެ ފަހު ދުވަހު އެވެ.

މަޖިލީހުގެ މިއަދުގެ ޖަލްސާ ފައްޓަވަމުން، ރިޔާސަތުގައި އިންނެވި މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ، މަޖިލީހުގެ ދެވަނަ ދައުރު އަންނަ ހުކުރު ދުވަހު ހަމަވާއިރު، މަޖިލީހުގައި މުހިންމު މަސައްކަތްތަކެއް ނުނިމި އެބަހުރި ކަމަށެވެ.

އެހެންކަމުން، ދެވަނަ ދައުރު އިތުރު ހަފްތާއަކަށް ދަންމާލައި، 21 އޯގަސްޓުގައި ނިމޭ ގޮތަށް އަބްދުއްރަހީމް ހުށަހެޅުއްވި އެވެ.

އެއާ އެކު، މަޖިލީހުގެ ދެވަނަ ދައުރު ދަންމާލާފައިވަނީ، އެކަމަށް ނެގުނު ވޯޓުގައި ބައިވެރިވެޑައިގެންނެވި 59 މެމްބަރުންގެ އަޣުލަބިއްޔަތުންނެވެ. އެކަމާ ދެކޮޅު ހެއްދެވީ އިދިކޮޅު އެމްޑީޕީއަށް ނިސްބަތްވާ 10 މެމްބަރުންނެވެ. 

މަޖިލީހުގެ ދެވަނަ ދައުރު ދަންމާލާފައިވަނީ، މަޖިލީހުގެ ޖަލްސާތައް ގަވާއިދުން ތާވަލުނުކުރާތީ ގިނަ ބަޔެއްގެ ފާޑުކިޔުން އަމާޒުވެފައިވާ ދަނޑިވަޅެއްގަ އެވެ.

ނަމަވެސް، މަޖިލީހުގެ ރައީސް ވަނީ އެކަން ތަކުރާރުކޮށް ދިފާއު ކުރައްވައިފަ އެވެ. އަބްދުއްރަހީމް ވިދާޅުވެފައިވާ ގޮތުގައި، މަޖިލީހުގެ ޖަލްސާތައް ތާވަލުނުކުރައްވަނީ، ތަޅުމުގައި ކުރާނެ މަސައްކަތެއް ނެތުމުންނެވެ. ނަމަވެސް، މަޖިލީހުގެ އެންމެ މުހިންމު މަސައްކަތްތައް ހިނގާ ކޮމިޓީތަކުގައި، ކޮންމެ ދުވަހަކު ވެސް މަސައްކަތްތައް ހިނގަމުންދާކަން އެ މަނިކުފާނު ވަނީ ތަކުރާރުކޮށް ފާހަގަކުރައްވައިފަ އެވެ.