ހައްޖުގެ އަގު ކުޑަކުރަން އައުގާފު އިންވެސްޓުމަންޓުތަކުން ލިބޭ ފައިސާގެ ބައެއް ހާއްސަކުރަނީ
ޝަހީމް ވިދާޅުވި ގޮތުގައި، އައުގާފް އާއި ވަގުފު އިންވެސްޓުމަންޓުތަކުން ލިބޭ އާމްދަނީން، ދައުލަތުން ދޭ ފައިސާއަށް ބަރޯސާނުވެ، މިސްކިތްތައް މަރާމާތު ކުރުމާއި ދީނީ ހަރަކާތްތައް ހިންގަން ބޭނުން ކުރެވޭނެ އެވެ.
ސަރުކާރުން އިސްނަގައިގެން، ފެށުމަށް މަސައްކަތް ކުރަމުން އަންނަ އައުގާފް އިންވެސްޓުމަންޓުތަކުން ލިބޭ އާމްދަނީގެ ބައެއް، ހައްޖުގެ އަޅުކަން އަދާކުރަން ރައްޔިތުން ދައްކާ އަގު ކުޑަކުރުމުގެ ވިސްނުން އެބަހުރި ކަމަށް، އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
މި އަހަރު ހައްޖުގެ އަޅުކަމަށް ކިޔު ތަރުތީބުން ގެންދިޔަ މީހުންގެ އަދަދު ސާފުކުރަން، ވައިކަރަދޫ ދާއިރާގެ އެމްޑީޕީ މެމްބަރު ހުސެއިން ޒިޔާދު ކުރެއްވި ސުވާލަށް ޖަވާބު ދެއްވަން ޝަހީމް މިއަދު މަޖިލީހަށް ހާޒިރުވެވަޑައިގެންފައިވާއިރު، އިތުރު ސުވާލު ކުރަން ލިބުނު ފުރުސަތުގައި، މެމްބަރަކު ވަނީ ހައްޖުގެ އަގު ކުޑަކުރަން ސަރުކާރުން ކުރާ މަސައްކަތާ ގުޅޭގޮތުން ސުވާލު ކުރައްވައިފަ އެވެ.
އެ ސުވާލަށް ޖަވާބު ދެއްވަމުން ޝަހީމް ވިދާޅުވީ، ހައްޖުގެ އަޅުކަން އަދާކުރުމަށް ހައްޖު ކޯޕަރޭޝަނަށް ދައްކާ އަގު ކުޑަކުރުމަށް މަޝްވަރާތައް ކުރެވެމުންދާ ކަމަށެވެ.
މިގޮތުން، އައުގާފް އިމާރާތްތައް އެޅުމަށް ބީއެމްއެލް އިސްލާމިކް އިން 350 މިލިއަން ރުފިޔާ މިހާރު ހަމަޖެހިފައިވާ ކަމަށާއި، އެ އިމާރާތްތައް އެޅި އާމްދަނީ ލިބެން ފެށުމުން، އަހަރަކު ގާތްގަނޑަކަށް 80 މިލިއަން ރުފިޔާ ލިބޭނެކަމަށް ލަފާކުރެއްވޭކަމަށް މިނިސްޓަރު ވިދާޅުވި އެވެ.
"އައުގާފު އިމާރާތްތަކުން އާމްދަނީ ލިބެން ފެށުމުން، އެ އާމްދަނީގެ ބައެއް ހައްޖުގެ އަގު ކުޑަކުރަން ބޭނުންކުރުމަށް މަޝްވަރާތައް ކުރެވެމުން އެބަދޭ،" އޭނާ ވިދާޅުވި އެވެ.
މީގެއިތުރުން، ޝަހީމް ވިދާޅުވި ގޮތުގައި، އައުގާފް އާއި ވަގުފު އިންވެސްޓުމަންޓުތަކުން ލިބޭ އާމްދަނީން، ދައުލަތުން ދޭ ފައިސާއަށް ބަރޯސާނުވެ، މިސްކިތްތައް މަރާމާތު ކުރުމާއި ދީނީ ހަރަކާތްތައް ހިންގަން ބޭނުން ކުރެވޭނެ އެވެ.
ނަމަވެސް އެ ކަންކަން ކުރުމަށްޓަކައި، އައުގާފް އަދި ވަގުފު ފަންޑު މެނޭޖުކުރުމުގެ ގާނޫނުތަކެއް ވުޖޫދު ކުރަންޖެހޭ ކަން ވެސް މިނިސްޓަރު ފާހަގަކުރެއްވި އެވެ.
ކޮމެންޓް
Republic of Maldives