ޗައިނާއިން 15 ޕަސެންޓްގެ ކުރިއެރުމެއް | ޖުމްލަ ދެ ލައްކައަށް

ރާއްޖެއަށް ޗައިނާއިން އައި ޓޫރިސްޓުންގެ އަދަދު މިދިޔަ އަހަރާ އަޅާބަލާއިރު 15 ޕަސެންޓްގެ ބޮޑު ކުރިއެރުމަކާއެކު ޖުމްލަ ޓޫރިސްޓުންގެ އަދަދު ދެ ލައްކައަށްވުރެ މައްޗަށް ޖެހިލައިފި އެވެ. 

ޓޫރިޒަމް މިނިސްޓްރީގެ ތަފާސް ހިސާބުތައް ދައްކާ ގޮތުން އިއްޔެގެ ނިޔަލަށް ރާއްޖެއަށް ޗައިނާއިން 205,130 ޓޫރިސްޓުން ޒިޔާރަތްކޮށްފައިވެ އެވެ. މިއީ މިދިޔަ އަހަރުގެ މި މުއްދަތުގައި އައި 177,583 އާ އަޅާބަލާއިރު 15 ޕަސެންޓުގެ އިތުރުވުމެކެވެ. އަދި މިއީ މިފަހުން 2018 ގެ ފަހުން ޗައިނާ ޓޫރިސްޓުންގެ އަދަދު މި ވަރަށް އިތުރުވި ފުރަތަމަ ފަހަރެވެ. 

ޗައިނާ ޓޫރިސްޓުންގެ އަދަދު އިތުރުވުމުގެ މައިގަނޑު ސަބަބަކީ ގައުމީ އެއާލައިންއިން ޗައިނާއަށް ކުރާ ދަތުރުތައް އިތުރު ކުރުމެވެ. މިހާރު ޗައިނާގެ ފަސް މަންޒިލަކަށް ގައުމީ އެއާލައިން ދަނީ ދަތުރުތައް ކުރަމުންނެވެ. ޗައިނާގެ އިތުރު ޓޫރިޒަމް އެހެން މާކެޓުތަކުން ވެސް ވަނީ ކުރިއެރުން ލިބިފަ އެވެ.

މި ގައުމުތަކުގެ އިތުރުން 2023 ވަނަ އަހަރު ރާއްޖޭގެ ޓޫރިޒަމް ލިސްޓުގެ އެއް ވަނާގައި އޮތް އިންޑިއާ އިން މި އަހަރުގެ މިހާތަނަށް 77,596 ޓޫރިސްޓުން އައިސްފައިވެ އެވެ. މި އަދަދަކީ ކުރީ އަހަރު އައި 74,985 ޓޫރިސްޓުންނާ އަޅާބަލާއިރު ތިން ޕަަސެންޓުގެ އިތުރުވުމެކެވެ. 

ޓޫރިޒަމް ހިސާބުތައް ދައްކާ ގޮތުން މި އަހަރުގެ މިހާތަނަށް 1,361,286 ޓޫރިސްޓުން އައިސްފައިވެ އެވެ. ނަމަވެސް މިދިޔަ އަހަރު އައިސްފައިވަނީ 1,247,904 ޓޫރިސްޓުންނެވެ. އެހެންކަމުން މިއީ 9.4 ޕަސެންޓުގެ އިތުރުވުމެކެވެ. 

މިދިޔަ އަހަރު ރާއްޖެއަށް ދެ މިލިއަން ޓޫރިސްޓުން އައިސްފައިވެ އެވެ. އަދި މި އަހަރު 2.3 މިލިއަން ޓޫރިސްޓުން އަންނާނެ ކަމަށް ސަރުކާރުން އަންދާޒާކޮށްފައިވެ އެވެ. އަދި ވީއައިއޭގެ އާ ޓާމިނަލް މިހާރު ހިދުމަތަށް ގެނެވިފައިވާތީ މި އަދަދު 2.4 މިލިއަނަށް އިތުރުވާނެ ކަމަށް މަރުކަޒީ ބޭންކް އެމްއެމްއޭއިން އަންދާޒާކޮށްފައިވެ އެވެ.