ކަމަދޫގައި ސީޕްލޭންގެ ހިދުމަތް ފަށަނީ

ބ. ކަމަދޫގައި ސީޕްލޭންގެ ހިދުމަތް ފެށުމަށް އައިލެންޑް އޭވިއޭޝަނާއި ކަމަދޫގައި ފުޅާ ދާއިރާއެއްގައި ލޯކަލް ޓޫރިޒަމްގެ ވިޔަފާރި ކުރާ ހޯކްސް ހޮޓެލްސްއާއެކު އެއްބަސްވުމެއްގައި ސޮއިކޮށްފި އެވެ.

މި އެއްބަސްވުމުގައި ސޮއިކޮށްފައި ވަނީ މިއަދު ރައީސް ޑރ. މުހައްމަދު މުއިއްޒު އެރަށަށް ވަޑައިގަތުމުން ބޭއްވި ޖަލްސާގަ އެވެ.

މި އެއްބަސްވުމުގައި އައިލެންޑް އޭވިއޭޝަންގެ ފަރާތުން ސޮއިކުރެއްވީ މެނޭޖިން ޑިރެކްޓަރު އިބްރާހިމް އިޔާސް އެވެ. ހޯކްސް ހޮޑެލްސްގެ ފަރާތުން ސޮއިކުރެއްވީ ޑިރެލްޓަރު ހުސެއިން އަމާން އެވެ.

މި ޖަލްސާގައި ވާހަކަ ދައްކަވަމުން ރައީސް ވިދާޅުވީ ލޯކަލް ޓޫރިޒަމް ފުޅާ ކުރަމުންދާ ރަށަކަށް ކަމަދޫވާއިރު، އެރަށުގައި ސީޕްލޭންގެ ހިދުމަތް ފެށިގެން ދިއުމަކީ ވަރަށް ބޮޑަށް އިގްތިސޯދީ ފައިދާ ލިބިގެންދާނެ ކަމެއް ކަމަށެވެ. އެހެންކަމުން އެމަނިކުފާނު ވަނީ ރަށުގެ ރައްޔިތުންނަށް އެކަމަށްޓަކައި މަރުހަބާ ވެސް ދަންނަވާފަ އެވެ.

އެ ރަށުގައި ލޯކަލް ޓޫރިޒަމް ކުރިއަރަމުންދާތީ ޕިކްނިކް ދިއުމަށް ރަށެއް ވެސް ކަނޑައަޅުއްވައިދެއްވާނެ ކަމަށް ރައީސް ވިދާޅުވި އެވެ.

ރައީސް އިތުރަށް ވިދާޅުވީ ރަށުގެ އިގްތިސޯދީ ތަރައްގީއަށްޓަކައި ވަރަށް ބޮޑު ސަމާލުކަމެއް ދެއްވާ ކަމަށެވެ. މުޅި އަތޮޅުގެ ތަރައްގީއަށްބަލާއިރު ކަމަދޫ އޮންނަނީ ލިސްޓުގެ ވަރަށް ފަހަތުގައި ނަމަވެސް އެ ތަފާތު ކުރުން ނައްތައިލައްވާނެ ކަމަށެވެ. 

އެރަށު ކައުންސިލްގެ ރައީސް ހަސަން ޒަރީރު ވެސް ވަނީ ސީޕްލޭންގެ ހިދުމަތާއެކު ރަށުގެ އިގްތިސޯދަށް ވަރަށް ބޮޑު ކުރިއެރުމެއް ލިބޭނެކަން ފާހަގަކުރައްވާފަ އެވެ.