އެމްއެމްއޭއިން މި އަހަރަށް ތަމްވީލް ފިންލިޓް ފެސްޓިވަލް ތައާރަފުކޮށްފި

ފައިނޭންޝަލް ލިޓަރަސީ އަދި އިސްލާމީ ފައިނޭންސް އާ ބެހޭ ހޭލުންތެރިކަން އިތުރުކުރުމަށް އެމްއެމްއޭއިން ތަމްވީލް ފިންލިޓް ފެސްޓް 2025 ތަޢާރަފުކޮށްފި އެވެ. 

މިއީ ރާއްޖޭގައި ފައިނޭންޝަލް ލިޓަރަސީ، ޒިންމާދާރު ގޮތެއްގައި ފައިސާ މެނޭޖްކުރުން، އަދި އިސްލާމިކް ފައިނޭންސްއާ ބެހޭ ހޭލުންތެރިކަން އިތުރުކުރުމަށް އަމާޒުކޮށްގެން ކުރިއަށްގެންދާ މުހިންމު ހަރަކާތެކެވެ. މި ފެސްޓިވަލްގެ މަގްސަދަކީ ދަރިވަރުންނާއި، ޒުވާނުންނާއި އަދި މުޅި މުޖުތަމަޢު ބައިވެރިވުން ހިމެނޭގޮތަށް އިސްލާމީ ފައިނޭންސަށް ފަރިތަ މުޖުތަމަޢެއް ބިނާކުރުމެވެ.

އެމްއެމްއޭ ތަމްވީލް ފިންލިޓް ފެސްޓިވަލް އިފްތިތާހުކޮށްދެއްވީ އެކަމަށް ހާއްސަކޮށްގެން ބޭއްވި ހަފްލާއެއްގައި މިނިސްޓަ އޮފް އެޑިއުކޭޝަން ޑރ. އިސްމާއިލް ޝަފީއު އެވެ. މިނިސްޓަރުގެ ވާހަކަފުޅުގައި މާލީ ގޮތުން ހޭލުންތެރި މުޖުތަމައެއް ބިނާކުރުމުގެ މުހިންމުކަމަށް އަލި އަޅުވާލެއްވި އެވެ.

މި ހަރަކާތްތަކުގައި އުފެއްދުންތެރިކަމާއި އައު އިޖާދީ ވިސްނުމާއި އައު ގޮތްތައް ހޯދުމަށް މަގުފަހިކުރުމުގެ އިތުރުން ފައިނޭންސް މެނޭޖުކުރުމަކީ ހަމައެކަނި ފަންނީ ހުނަރަކަށްވުރެ ބޮޑަށް އިޖުތިމާޢީ އަދި އިގްތިސޯދީ ބަދަލު ގެނައުމުގެ ވަސީލަތެއްގެ ގޮތުގައި ދެކުމަށް ބައިވެރީންނަށް އުނގަންނައިދެވޭނެ އެވެ.

އެމްއެމްއޭ ތަމްވީލް ފިންލިޓް ޗެލެންޖަކީ ލީގެއްގެ އުސޫލުން ކުރިއަށްގެންދާ ކުއިޒް މުބާރާތެކެވެ. މި މުބާރާތް އަމާޒުކުރެވިފައިވަނީ 18 އަހަރާއި 25 އަހަރާ ދެމެދުގެ ޒުވާނުންނަށެވެ. މި މުބާރާތުގައި ފައިސާ ރައްކާކުރުމާއި، ބަޖެޓް ހެދުމާއި، ހަލާލު އިންވެސްޓްކުރުމާއި، ރިސްކް ހިއްސާކުރުމާއި، އަދި އިސްލާމިކް ފައިނޭންޝަލް ނިޒާމުގެ އަސާސްތަކާ ބެހޭ މައުލޫމާތު ޓެސްޓުކުރެވޭނެ އެވެ. މި ޗެލެންޖްގެ މަގުސަދަކީ ބައިވެރިންނަށް ޢަމަލީ ދިރިއުޅުމުގައި ބޭނުންކުރެވޭނެ ހުނަރުތައް ދަސްކޮށްދިނުމާއެކު، ޝައުޤުވެރިކަމާއެކު ދަސްކުރުމުގެ މާހައުލެއް ގާއިމުކުރުމެވެ. 

އަދި، އިކޮންކުއެސްޓް ބަހުސް މުބާރާތުގައި 16 އަހަރާއި 25 އަހަރާ ދެމެދުގެ ބައިވެރިންނަށް މުހިންމު އިގްތިސޯދީ މައްސަލަތަކާ ބެހޭގޮތުން އިލްމީ ހެކިތަކުގެ މައްޗަށް ބިނާކޮށް ބަހުސްކުރުމުގެ ފުރުސަތު ލިބިގެންދާނެ އެވެ. ދެމެހެއްޓެނިވި ތަރައްގީއާއި، ވަށައިޖެހޭ މުޖުތަމައުއެއް ބިނާކުރުމާއި، ދުނިޔޭގެ އިގްތިސޯދީ ކުރިއެރުންތަކާ ހަމައަށް، ޒުވާން ބަހުސްވެރިންނަށް ގައުމީ އަދި ބައިނަލްއަގްވަމީ ދުނިޔޭގެ ގޮންޖެހުންތަކަށް އައު ޙައްލުތައް ހުށަހެޅުމުގެ ފުރުސަތު ލިބި، އެމީހުންގެ މަދަނީ ހޭލުންތެރިކަމާއި ވިސްނުން ވަރުގަދަވެގެންދާނެ އެވެ.

ފެސްޓިވަލްގެ މައިގަނޑު އެއް ހަރަކާތްކަމުގައިވާ އިމްޕެކްޓް ޕިޗް ޗެލެންޖް ފަރުމާކުރެވިފައިވަނީ ދިވެހިރާއްޖޭގައި ފައިނޭންޝަލް ލިޓަރަސީ ކުރިއެރުވުމަށް ޝަރީއާއާ އެއްގޮތްވާ އާ ހައްލުތައް ހޯދުމަށެވެ. 18 އަހަރުން މަތީގެ ބައިވެރިންނަށް ހުޅުވާލެވިފައިވާ މި ޗެލެންޖްގައި ތިން މައިގަނޑު ދާއިރާއަކަށް އަމާޒުކުރެވޭނެ އެވެ. އެއީ ފައިނޭންޝަލް ލިޓަރަސީ ޓޫލްތައް ތައްޔާރުކުރުމާއި، ހިދުމަތް ނުލިބޭ މުޖުތަމަޢުތަކަށް އެކުލެވޭ މާލީ ހައްލުތައް އުފެއްދުމާއި، އަދި ފިންޓެކްގެ ޒަރީޢާއިން އިސްލާމީ ފައިނޭންސްގައި އާ ގޮތްތައް ހޯދުމެވެ. 

ޝޯޓްލިސްޓްކުރެވޭ ބައިވެރިން، އަންނަ ނޮވެމްބަރު 15 ހައި އޮންނަ ބޫޓްކޭމްޕެއްގައި ބައިވެރިންގެ ހިޔާލު (އައިޑިއާ) ހުށަހެޅުމަށް ފުރުސަތު ލިބޭނެ އެވެ. ކާމިޔާބުކުރާ ފަރާތްތަކަށް 30,000 ރުފިޔާއާ ހަމައަށް ފައިސާގެ އިނާމުގެ އިތުރުން، ވިޔަފާރި ފަންޑިން ކާމާގުޅޭ ފަރާތްތަކާއެކު މަސައްކަތްކުރުމުގެ ފުރުސަތު، އަދި ތަމްރީނު ޕްރޮގުރާމުތަކުގެ ފުރުސަތު ލިބިގެންދާނެ އެވެ.

މި ފެސްޓިވަލްގައި އުފެއްދުންތެރި އަދި ބިނާކުރަނިވި ޚިޔާލުތައް ފާޅުކުރުމުގެ ފުރުސަތުވެސް ހިމެނެ އެވެ. ފިއުޗާ ފައިނޭންސް މަޒުމޫނު މުބާރާތުގައި، ސްކޫލް ދަރިވަރުންނަށް އެކުދީންގެ ވިސްނުމުގައި މާލީ ދާއިރާއާ ދެތޭރޭ އޮތް ތަސައްވަރު ހާމަކުރުމަށް ފުރުސަތު ލިބިގެންދާނެ އެވެ. ވެލިއުސް އެންޑް ވިޝަން އާޓް ޝޯކޭސްގައި ޒުވާން ކުރެހުންތެރިންނަށް ހަމަހަމަ މާލީ ނިޒާމެއްގެ މުސްތަގުބަލެއް ކުރެހުމުގެ ޒަރީއާއިން ދައްކުވައިދިނުމަށް ފުރުސަތު ހުޅުވާލާފައިވާނެ އެވެ. ޑިޖިޓަލް ދާއިރާގެ ހުނަރުތައް ދެއްކުމަށްޓަކައި ފެސްޓިވަލްގެ ވީޑިއޯ ޗެލެންޖްގައި ބައިވެރިވުމަށްވެސް އެމްއެމްއޭގެ ފިންލިޓް ފެސްޓިވަލްއިން ވަނީ ފުރުސަތު ހުޅުވާލާފައެވެ. މުބާރާތުގެ ބައިވެރިން 15 ސިކުންތާއި 60 ސިކުންތާ ދެމެދުގެ ވީޑިއޯތައް ހަދައިގެން ފައިނޭންޝަލް ލިޓަރަސީ އަދި އިސްލާމިކް ފައިނޭންސްއާ ބެހޭ ހޭލުންތެރިކަން އިތުރުކުރުމަށް މަސައްކަތްކުރާނެ އެވެ.

އެމްއެމްއޭ އިން ބުނާގޮތުގައި، ތަމްވީލް ފިންލިޓް ފެސްޓްއަކީ އަދުގެ މާލީ މާހައުލެއްގައި ކަންކަން ކުރިއަށްގެންދިއުމަށް ބޭނުންވާ މަޢުލޫމާތާއި ހުނަރު ދިވެހިންނަށް، ހާއްސަކޮށް ޒުވާނުންނަށް ދިނުމަށް އެ މުއައްސަސާއިން ކުރާ މަސައްކަތުގެ ތަސައްވުރެކެވެ. މި ފެސްޓިވަލްގެ މަގުސަދަކީ މާލީގޮތުން ޒިންމާދާރު، އަގުހުރި ސިފަތަކެއް ލިބިފައިވާ އާ ޖީލެއް ބިނާކުރުންކަމުގައިވެސް އެމްއެމްއޭއިން ހާމަކުރެ އެވެ.