މިދިޔަ ހަ މަސް ތެރޭ ވީއައިއޭ | 4.1 މިލިއަން ފަސިންޖަރުން ބޭނުންކުރި

މިދިޔަ ހަ މަސް ތެރޭ ވެލާނާ އިންޓަނޭޝަނަލް އެއާޕޯޓް 4.1 މިލިއަން ފަސިންޖަރުން ބޭނުންކޮށްފައިވާ ކަމަށް އެމްއޭސީއެލް އިން ބުނެފި އެވެ. 

އެމްއޭސީއެލްގެ ތަފާސް ހިސާބުތައް ދައްކާ ގޮތުން މިދިޔަ ހަ މަސް ތެރޭ 4.1 މިލިއަން ފަސިންޖަރުން ވީއައިއޭ ބޭނުން ކުރިއިރު، މިއީ މިދިޔަ އަހަރުގެ މި މުއްދަތާ އަޅާބަލާއިރު 4 ޕަސެންޓްގެ އިތުރުވުމެކެވެ. މިދިޔަ ހަ މަސް ތެރޭ ބޭނުންކުރި ފަސިންޖަރުންގެ ތެރޭން ބައިނަލްއަގުވާމީ ދަތުރުތައް ކޮށްފައިވަނީ 2.6 މިލިއަން ފަސިންޖަރުންނެވެ. އަދި އެތެރޭގެ ދަތުރުތައް 579،079 ފަސިންޖަރުން ކޮށްފައިވާއިރު ،ސީޕްލޭންގެ ހިދުމަތް 859،797 ފަސިންޖަރުން ކޮށްފައިވެ އެވެ. 

މިއަހަރުގެ މިހާތަނަށް އެންމެ ގިނަ ފަސިންޖަރުން އެއް ދުވަހެއްގެ ތެރޭގައި އެއާޕޯޓް މި އަހަރުގެ ޖެނުއަރީ ހަތަރު ވަނަ ދުވަހު ވެެ. އެ ދުވަހު 26،658 ފަސިންޖަރުނަށް ހިދުމަތް ދިނެވެ. އަދި ސީޕްލޭން އިން އެންމެ ގިނަ ބަޔަކު ދަތުރުކުރީ ފެބްރުއަރީ 16 ވަނަ ދުވަހު އެވެ. އެދުވަހު 7،439 ފަސިންޖަރުން ދަތުރުކުރި އެވެ. އެވްރެޖުކޮށް މިދިޔަ ހަ މަސް ތެރޭ ދުވާލަކު ހިދުމަތް ހޯދި މީހުންގެ އަދަދު އުޅެނީ 22،000 އިން މަތީގަ އެވެ. 

މި އަހަރު ވީއައިއޭގެ އެއާޓްރެފިކް މޫވްމެންޓު ވެސް ވަނީ އިތުރުވެފަ އެވެ. އެއަރ އެއާޓްރެފިކް މޫވްމެންޓް މިދިޔަ އަހަރާ އަޅާ އަޅާބަލާއިރު ހަތް ޕަސެންޓް އިތުރުވެފައިވެ އެވެ. އެއާ ޓްރެފިކް މޫވްމަންޓްސް އެވްރެޖުކޮށް ހުރީ 124،665 ގަ އެވެ. މި މުއްދަތުގައި ބައިނަލްއަގްވާމީ ފްލައިޓްތަކުގެ މޫވްމަންޓްސް ހުރީ 17،614 ގަ އެވެ. އަދި ޑޮމެސްޓިކް މޫވްމަންޓްސް ހުރީ 14،110 ގައެވެ. ސީޕްލޭން މޫވްމަންޓްސް ހުރީ 92،941 ގަ އެވެ. އަދި މިދިޔަ ހަ މަސް ތެރޭ 34،000 ޓަނުގެ ކާގޯ ވަނީ ކްލިއަކޮށްފައިވެ އެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު ހަ ޕަަސެންޓުގެ އިތުރުވުމެކެވެ.