ބޭރު ފައިސާ ވިއްކުން ހަރުދަނާ ކުރާ ފިޔަވަޅުތަކާއެކު 34 ލައިސަން ދީފި

ބޭރު ފައިސާ ގަނެ ވިއްކުން ހަރުދަނާ ކުރަން އެކުލަވާލި ގަވައިދާއެކު އިތުރު ފިޔަވަޅުތައް އަޅައި، މުޅިން އަލަށް 34 ފަރާތަކަށް ލައިސަން ދީފި އެވެ. 

އެމްއެމްއޭ އިން "މަނީ ޗޭންޖިން ވިޔަފާރިއާބެހޭ ޤަވައިދު" ގެ ދަށުން ލައިސަންސްއަށް އެދި ހުށައެޅުމަށް އެމްއެމްއޭއިން ހުޅުވާލީ މިދިޔަ އަހަރުގެ އޮކްޓޫބަރު މަހުގެ ދެ ވަނަ ދުވަހު އެވެ. އަލަށް އަމަލުކުރަން ފެށި ބޭރު ފައިސާއާ ބެހޭ ޤާނޫނުގެ ދަށުން ބޭރު ފައިސާ ގަނެ ވިއްކުމުގެ ޚިދުމަތް ދެވޭނީ އަލުން ރަޖިސްޓްރީކޮށްގެންނެވެ. މިގޮތުން މި ގަވައިދުގައި ހުރި ގިނަ ކަންކަން ފުރިހަމަ ކުރުމުގެ މަސައްކަތްތައް އެމްއެމްއޭއިން ދަނީ ފިޔަވަހިތަކަށް ބަހާލައިގެން ކުރަމުންނެވެ. މީގެ އެންމެ ބޮޑު އަމާޒަކީ މި ތަންތަން ކައިރިން ބެލެހެއްޓޭނެ ޒަމާނީ ނިޒާމެއް ތައާރަފު ކުރުމެވެ. 

ރާއްޖޭގައި 1987 ވަނަަ އަހަރުން ފެށިގެން އަމަލުކުރަމުން އައި "މަނީ ޗޭންޖާ ކަމުގެ ލައިސަންސް ލިބިގެން ބޭރު ފައިސާ ގަނެ ވިއްކާ ފަރާތްތަކުން ކަންތައް ކުރަންވީ ގަވާއިދު" އުވައިލުމަށްފަހު މިއަދު މަރުކަޒީ ބޭންކުން އަމަލުކުރަން ފެށި "މަނީ ޗޭންޖިން ވިޔަފާރިއާ ބެހޭ ގަވާއިދު"ގެ ދަށުން ދެ ބާވަތެއްގެ މަނީ ޗޭންޖިން ލައިސެންސް ދޫކުރާނެ އެވެ.

ޓިއާ އެކެއް: ބޭރު ފައިސާ ގަތުމާއި ވިއްކުމުގެ ވިޔަފާރިކުރުމުގެ ލައިސެންސް
ޓިއާ ދޭއް: ބޭރު ފައިސާ ވިއްކުމުގެ ވިޔަފާރިކުރުމުގެ ލައިސެންސް

ޓިއާ އެކެއްގެ ގެ ކެޓަގަރީގެ ވިޔަފާރިތަކަށް ދޫކުރަނީ ބޭރުފައިސާ ގަނެ ވިއްކުމަށް ދޫކުރާ ލައިސަންސެވެ. ޓިއާ ދޭއްގެ ލައިސަންސަކީ ހަމައެކަނި ރިސޯޓްތަކަށް ބޭރުފައިސާ ވިއްކަން ދެވޭ ލައިސަންސެކެވެ.

އެމްއެމްއޭއިން މަނީ ޗޭންޖިން ގަވާއިދުގެ ދަށުން އަލަށް 34 ފަރާތަކަށް ލައިސަންސް ދީފައިވާއިރު ޖުމްލަ ލައިސަންސް ދިން ފަރާތްތަކުގެ އަދަދު 62 އަށް އަރަ އެވެ. މި އަދަދު 62 އަށް އަރާފައިވަނީ މިހާރުވެސް މި ހިދުމަތް ދޭ 28 ފަރާތެއް އާ ގަވައިދުގެ ދަށުން މި ވިޔަފާރި ކުރަން ބޭނުންވެ ހުއްދަ ނެގުމުންނެވެ. 

ގަތުމާއި ވިއްކުމުގެ ލައިސަންސް - ފުރަތަމަ ބާވަތުގެ ލައިސެންސް ދޫކުރާނީ ކުންފުނީގެ ގާނޫނުގެ ދަށުން ހަމައެކަނި ފައިސާ ގަތުމާއި ވިއްކުމަށް ރަޖިސްޓަރީކޮށްފައިވާ ކުންފުނިތަކަށެވެ. އަދި އެ ކުންފުނިތަކުގެ ހަގީގީ ވެރިންނަށް ވާންޖެހޭނީ ދިވެހިންނެވެ. މާނައަކީ އެއިން ކުންފުންޏެއްގައި އެހެން ވިޔަފާރިއެއްގެ ހިއްސާ އޮތަސް އެ ވިޔަފާރީގެ މިލްކުވެރިންނަކީވެސް ދިވެހިންކަމަށްވާން ޖެހޭނެ އެވެ. އަދި އެ ވިޔަފާރީގައި ހަރަކާތްތެރިވާ މުވައްޒަފުންވެސް ދިވެހިންނަށް ވާންޖެހޭނެ އެވެ.

ފަސް އަހަރުގެ މުއްދަތަށް އެފަދަ ވިޔަފާރިތަކަށް ދޫކުރާ ލައިސެންސް ހޯދުމަށް ހުށަހަޅާއިރު އެޕްލިކޭޝަން ފީއެއްގެ ގޮތުގައި 20،000 ރުފިޔާ އަދި ލައިސަންސް ފީއެއްގެ ގޮތުގައި އަހަރަކު 24،000 ރުފިޔާ ދައްކަންޖެހޭނެ އެވެ. ޑިޕޮސިޓުގެ ގޮތުގައި 50،000 އެމެރިކާ ޑޮލަރު ބަހައްޓަންޖެހޭނެ އެވެ.

މި ކެޓަގަރީގެ ވިޔަފާރިތަކަށް އެއް ފަހަރާ ކަސްޓަމަރަކަށް ނަގުދު ފައިސާއން ގިނަވެގެން މުއާމަލާތްކުރެވޭނީ 50،000 ރުފިިޔާ ނުވަތަ އެއާ އެއްވަރުގެ އަދަދަކަށް ބޭރު ފައިސާއިންކަމަށް ގަވާއިދުގައި ބަޔާންކޮށްފައިވެ އެވެ. އަދި އެ ފަރާތުން ކުރާ ބޭރު ފައިސާ ގަނެ ވިއްކުމުގެ ހުރިހާ މުއާމަލާތްތަކެއް މޮނީޓާ ކުރެވޭނެ އިލެކްޓްރޯނިކް ނިޒާމެއް ގާއިމުކުރަންޖެހޭނެ އެވެ. 

ބޭރު ފައިސާ ވިއްކުމުގެ ލައިސެންސް - ބޭރު ފައިސާ ވިއްކަން އެކަނި ހުއްދަ ދޭނީ ޓޫރިޒަމް ރިސޯޓު ހިންގުމުގެ ހުއްދަ އޮންނަ ކުންފުނިތަކަށް އެކަންޏެވެ. އެ ދަރަޖައިގެ ހުއްދައަށް އެދޭއިރު ފީގެ ގޮތުގައި 1،300 ޑޮލަރު އަދި ލައިސެންސްގެ އަހަރީ ފީގެ ގޮތުގައި މަހަކު 1،800 ޑޮލަރު ދައްކަންޖެހޭނެ އެވެ.

އެ ކުންފުނިތަކަށް ބޭރު ފައިސާ ވިއްކުމުގެ ވިޔަފާރިކުރެވޭނީ ބޭންކެއް މެދުވެރިކޮށް ކަމށާއި، އަދި އެއްވަނަ ދަރަޖައިގެ ހުއްދަ އޮތް ވިޔަފާރިއަކާއެކު ނަގުދު ފައިސާއިން މުއާމަލާތް ކުރެވިދާނެ ކަމށްވެސް ގަވާއިދުގައި ބުނެފައިވެ އެވެ. މި ކުންފުނިތަކުންވެސް ލައިސެންސް ހޯދުމަށް ހުށަހަޅާއިރު 50،000 ޑޮލަރުގެ ޑިޕޮސިޓެއް ބަހައްޓަންޖެހޭނެ އެވެ.

ކުރިން ބޭރު ފައިސާގެ މުއާމަލާތް ކުރުމުގެ ހުއްދަ ދީފައިވާ ވިޔަފާރިތަކަށް، އައު އުސޫލުން ލައިސެންސް ހޯދަން ހުށަހަޅަން ދެ މަސް ދުވަސް ލިބޭނެ އެވެ. އެ މުހުލަތުގައި ލައިސެންސް އާކުރަން ހުށަނާޅައިފިނަމަ ލައިސެންސް ބާތިލުވާނެ އެވެ. ނަމަވެސް ލައިސެންސް ހޯދުމަށް އެ މުހުލަތުގައި ހުށަހަޅާ ވިޔަފާރިތަކަށް ލައިސެންސްއާމެދު އެމްއެމްއޭއިން ގޮތެއް ނިންމުމާ ހަމައަށް ވިޔަފާރި ކުރެވޭނެ އެވެ.

އެމްއެމްއޭއިން މި ގެނައި ބަދަލާއެކު ރާއްޖޭގައި ބޭރު ފައިސާގެ މުއާމަލާތްކުރުމުގެ ހުއްދަ އޮންނަ ވިޔަފާރިތައް މަދުވާނެ ކަމަށް ބެލެވެ އެވެ. މިހާރު 210 ވިޔަފާރިއަކަށް އެމްއެމްއޭއިން އެ ހުއްދަ ދޫކޮށްފައިވެ އެވެ.