ދޯންޏެއް ބަންޑުން ޖަހާލައި ކަނޑުވި މީހުންގެ ތެރެއިން އެކަކު މަރުވެއްޖެ

ހދ. ކުމުންދޫ ކައިރިން ދޯންޏެއް ބަންޑުން ޖަހާލައި، ކަނޑުވި މީހުންގެ ތެރެއިން އެކަކަށް ފަރުވާ ދެމުން ދަނިކޮށް މަރުވެއްޖެ އެވެ.

ބަންޑުން ޖަހާލައިފައި ވަނީ ހދ. ކުޅުދުއްފުށިން ށ. ފުނަދޫއަށް ހަތަރު މީހުންނާއެކު ދަތުރުކުރި "ކާނި" ނަމަކަށް ކިޔާ ސަޕްލައި ދޯންޏެކެވެ. އެމްއެންޑީއެފުން ބުނީ އެ ދޯނި ބަންދު ޖަހައިލި ކަމުގެ ރިޕޯޓް ލިބުނީ ހެނދުނު 8:45 ހާއިރު ކަމަށެވެ.

މައުލޫމާތު ލިބުމާ އެކު، ކޯސްޓްގާޑު ހާބާކްރާފްޓް ލޯންޗު އެ ސަރަހައްދަށް ގޮސް، ކަނޑުވެފައި ތިބި ހަތަރު މީހުން ވަނީ ސަލާމަތްކޮށްފަ އެވެ.

އޭގެ ތެރެއިން ދެ މީހެއްގެ ހާލު ދެރަވުމާ ގުޅިގެން އެމްއެންޑީއެފްގެ އެހީގައި ހދ. ކުޅުދުއްފުއްޓަށް ވަނީ ގެންގޮސްފަ އެވެ. އެ ދެމީހުންނަށް ކުޅުދުއްފުށީ ރީޖަނަލް ހޮސްޕިޓަލުގައި މިހާރު ފަރުވާ ދެމުންދަނިކޮށް އެކަކު ވަނީ މަރުވެފަ އެވެ.

ފުލުހުން ބުނީ ފަރުވާ ދެމުން ދަނިކޮށް މިއަދު 10:30 ހާއިރު މަރުވެފައި ވަނީ 66 އަހަރުގެ ދިވެހި ފިރިހެނެއް ކަމަށެވެ.

އެ ދޯނިން ކަނޑުވި ބާކީ ދެ މީހުން، ވެރިފަރާތުން ފޮނުވި ސަޕްލައި ދޯންޏަކަށް ވަނީ ނަގާފަ އެވެ.

މި ހާދިސާއާ ގުޅިގެން ބަލަން ޖެހޭ ކަންކަން ބަލަމުންދާ ކަމަށް ފުލުހުން ވަނީ ބުނެފަ އެވެ.