އެސްޓީއޯ އިން 15 ރުފިޔާއަށް ފިޔާ ކިލޯއެއް ވިއްކަން ފަށައިފި

މިދިޔަ ހަފްތާ ތެރޭގައި މޫސުން ގޯސްވުމުގެ ސަބަބުން މުދާ ކްލިއާ ނުކުރެވި، ބާޒާރުން ފިޔާ ހުސްވަމުންދާތީ އެސްޓިއޯ އިން އިންޑިއާއިން ގެނައި ފިޔާ ޝިޕްމެންޓް ބާޒާރަށް ނެރެފި އެވެ.

އެސްޓިއޯ އިން ބުނީ ބާޒާރަށް ނެރުނު ފިޔާ ޝިޕްމެންޓަކީ މޫސުމީ ލޮޅުންތަކުގެ ސަބަބުން ރާއްޖޭގެ ފިޔާ ސަޕްލައިއަށް ދިމާވި ދަތިތަކަކާއި ގުޅިގެން ރާއްޖޭގެ ބާޒާރުގައި ފިޔާ ލިބުމަށް ދަތިވުމުގެ ސަބަބުން މާކެޓް ސްޓޭބަލައިޒް ކުރުމަށް ގެނައި ޝިޕްމެންޓެއް ކަމަށެވެ.

އެސްޓީއޯ ޕީޕަލްސް ޗޮއިސް އަދި އެސްޓީއޯ ހޯލްސޭލްސެންޓަރުން މިވަގުތު ފިޔާ ލިބެން އެބަހުއްޓެވެ.

"އެސްޓީއޯއިން ޕީޕަލްސް ޗޮއިސުން ފިޔާ ކިލޯއެއް މިވަގުތު ލިބެން ހުންނާނީ 15 ރުފިޔާއަށް. އަދި އެސްޓީއޯ ހޯލްސޭލް ސެންޓަރުން ހޯލްސޭލްކޮށް ވެސް މިވަގުތު ފިޔާ ލިބެން ހުންނާނެ،" އެސްޓިއޯ އިން ބުންޏެވެ.

މިދިޔަ ހަފްތާ މޫސުން ގޯސްވުމުގެ ސަބަބުން، ޕެރިޝަބަލް މުދާ (އަވަހަށް ހަލާކުވާ ޒާތުގެ ކާބޯތަކެތި) ހިފައިގެން އައި ބޯޓުތަކެއް ކްލިއާ ނުކުރެވި ލަސްތަކެއް ވެގެން ދިޔަ އެވެ. އެހެންވެ، ފިޔާ ލިބުން ދަތިވެ، ބާޒާރުގައި ފިޔާ ބަސްތާއެއް 500 ރުފިޔާއަށް ވެސް ވިއްކި އެވެ.

ނަމަވެސް އެމްޕީއެލުން ވަނީ އެ ބޯޓުތަކުގައި ހުރި މުދާ އަވަހަށް ކްލިއާ ކޮށްފަ އެވެ. މިހާރު ބާޒާރުގައި އާންމުކޮށް ފިޔާ ކިލޯއެއްގެ އަގު އުޅެނީ 18 އާއި 20 ރުފިޔާއާއި ދޭތެރޭގެ އަގެއްގަ އެވެ. ނަމަވެސް އަދިވެސް ރަށްރަށުގައި ފިޔާ ލިބުން ދަތިވެ، އަގު ވަނީ އުފުލިފަ އެވެ.